ANDEAN 27
27
1 #
Yak. 4:13-16
Inaimo mopikikon kooloyo modoa,
sabab akimutoiyo oila naikon komo teali.
2Inaimokai monggale kobutomu susuumu,
sodiikene komian bailon mo kubaiyo langge doo, tukon mian moaki mutingoniyo.
3Batu tukon bone daanon momamalaang,
kalu pinosalakon tukon noamasakit mian molongas komo sumbutene.
4Nggimalan doo lokis tukon momanase,
bai masasalaan nggimalaan indee komo taane?
5Tadukai panganukon mo talang-talangan
luwedoi maasih moakiyo kobantilan.
6Tulano umbase tukon babilian
bai musuh moola napokindokene.
7Kalu bobosul, dokotoo tinolak;
kalu malaal, momosopot doo kotamiso maanis.
8Komian motinggale kona bonua,
buno tomisi mo tinggalle kona teleaa.
9Bunokai lisoson mobabangi tukon mobabangi-babangi mosanaanggene konoano,
bunodoiya koidan kotulano namondokan sanaangkai konoano.
10Inai motoliminggene kotulamu kai tamamu tulano.
Doi kasukaran lalomo; inaikai makabitolong doi utusomu;
tanaga mololani daano kagunamo
luwedoi utusomu moddoon.
11Kupau tadukai ikoo namangan komu pikiran,
sulano kusanaang tukon laate motimbili kalu sinosibolii.
12Komian mamangan konapikiran bala usaha kalukai kitayo kosilakaan;
mian longas ampakon banggadudul maka kanakon silakaan.
13Inde komo yase tanggunge komian bailon samea,
moola inala koona salaku pobeal naperjanjian.
14Indee doa-doa soono mobantile kona salam doi tulano tukon nalalo mobabasal,
inanggon bantilan molokis.
15Boloki moyase podanggani
buno udan kona bulunganan mo maturun pasapokon kooloyo.
16Aki namoolakene yana sinumbolii aki nabiok,
buno mombuul aki nanggoola tinaan
tukon likison aki namoola tinaani.
17Bunokai besi mobinilas besi,
bunomo koidan kobanggapi monggitunggukon luwedoi tulano.
18Indee komo mopiala kayung naikon kaane kosaono.
Pelleani naikon inangga kalu sodiikenemo konatuan.
19Bunomokai paisu mototiposii kodudusomu,
bunomokai koidan noamu menunjuk butomu.
20Doi mian mate nadunia sidutu daano kotampat;
bunomo koidan kobanggapi naminomooton akiyo kokalatano.
21Mosoni tukon salaka inudi doi balah;
komian tiningonii luwedoi nandodoong terhadap manggaalan.
22Maukai mian longas inumbas kokobukuan, akikai naikon lapus konalongasan.
23Pialayo mono-monondok kamu iyayon piniala, 24Sabab kokaasaan aki naikon naposidutukon, tukon kai kuasa tuuk maparentah kai aki naikon natataap sidutu-posidutukon. 25Kobulung doi asi tukon doi bunggul pinatol tukon pinotongikon tuuk muiyayon piniala doo, bai salataa aki namalumbit tubomo kobulung moboolu. 26Luwedoi mu domba-domba bullono ikoo malaat pakean, tukon luwedoi doy pongolino bagian mumbembe ikoo malaat mongoli buta moboolu. 27Luwedoi mbembe-mbembe bailon ikoo malaat susu tuuk doi butomu tukon mukaluargaa tukon mu peleleani-peleleani.
Currently Selected:
ANDEAN 27: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
