AYUB 39
39
1Kai ikoo toiyo kotempono kotinano nasuungano kombembe doi bunggo?
Kai biasamo ikoo kiteese kodonga mombosolo mosuunge konapau?
2Kai ikoo toiyo bulaa konakalumbit yanila natiananan?
Kai moola muaite doi tempo namosuungan?
3Kai ikoo toiyo oila kotempono konapoo talungguano kobutongo,
maka nasuunge konapau-pau?
4Konapau-pau babasalo tuuno tukon bukuan doi padang lalomo;
yanila taus tukon akimo naabali doi tinano.
5Indee komo sobiiyo kokaladai mombosolo doi bonggulung?
indee komo bukayo koaloso tukon sodiikene yana nadampas?
6Kubeekene doiyana kopadang lalomo teali nabonua
tukon padang-padang timuson teali natampat dungolan.
7Yana dedeenggene kokota-kota tukon nalamean,
akiyo komo moola kamaluwo tukon mosumboliiyo balimang.
8Bulung tukon padang doi bunggul tampat nakaanan,
yana umboliiyo kolobo momanampal indaa.
9Oilakai kosaapi mbosolo yase mobalimang tuuk doi komuyu?
Kai yana yase mobamoolokon doi mutondok lalomo?
10Kai moola mukeete yana tukon mupakisaayo nabapajeko tuuk ikoo?
Kai moola ikoo sumboliiyo yana napasele komuasi?
11Kai moola mumoinikene konatanaga mobukuan,
tukon ikoo salakanggene doiyana komulimang mobabalat?
12Oilakai ikoo maanggakene doiyana mopototongikene komu bapupuian,
tukon babayomo doi tampat mubambasonan?
13Bukamaen konamosobitan konabakipasan kotomisi unta kapilo!
Bai kotomisi kolong nabenga akiyo komo moola liisiyo yana.
14Tomisi unta manggalau doi buta, maka natinggale;
maka bonekai naikon komo buungikene konanggalau.
15Yana aki natoiyo baikon komian tudongiiyo yana
tukon koiyayon-iyayon mombosolo bai tudongiyo.
16Yana konasikap kakaadukon baikon konapau bolikon koona
yana aki napaduliyo kalu konalimang akiyo kotakoso.
17Yakumo komo kubaiyo yana longas tukon akiyo kona tinoi,
aki kubeekene doiyana kopandoiyan tukon pikilan.
18Bai kalu yana tambuuno moobulen mosobit,
yana kalayo koadalan tukon polokitino.
19He Ayub, kai ikoomo komo beena bukuanan doi adalanoo
tukon nabuk mobapail-pail doi okuna?
20Ikoomokai komo sumboliiyo osuut buno betek,
tukon nambongusonan mooto-otokutiyo komian?
21Yana badunge kobuta doi pepelakon tukon tetedes,
tukon samangat tuuno yana lobosiyo doi tampat polobosian.
22Yana aki natoiyo koalatino kombombokonan tukon matakutan;
akiyo kosabel mokubaiyo yana abali.
23Komolokitiyo ingite konasinapan
ponggololisa tukon motontilang kanakon pana laango.
24Tukon namololean tutuuno adalanoo obulen;
kalu bulungan kotorompet yana aki nanggoola taane kobutongo.
25Yana mbonguson doi sasamba kotorompet nabulungan
luwedoi naodoonan yana somakenemo kopolobosian boono.
Yana lengele sasaibino kosuludadu kapalano nakeisonan
doi tempo napoo mebeean komando.
26Kai kotomisi alai ikoo otunggule benga
kalu yana pakituuwo ko lalom tukon kapilo motebeleka?
27Kai muparentahmo kotomisi rajawali nalinoingi
doi naakiyoonan nakubaiyo konatelea doi bunggul motatandak?
28Doi bunggul batu bunggono tuuno yana kekendenge konabonua;
kobatu-batu bunduno momamangan teali nabenteng.
29Luwe idoo yana badagai doi sasamba kolipu pasuno
yana pokosimbaleng komatuno mounggoliiyo konakinaan.
30 #
Mat. 24:28; Luk. 17:37 Yaando konadaanoan komomate, idoomo yana,
tukon konapau-pau inume kaane sauhnodoo.
Currently Selected:
AYUB 39: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
