AYUB 38
38
Temeneno napotimbili doi Ayub
1Doibundu luwedoi sokoi lalomo ko Temeneno basilingan doi Ayub, bunonaiya:
2“Indee ikoo miano, tobikon mubarani balasaakiyo
dakupandoiyan tukon mubantilan-bantilan molongas tukon moakiyo koalatinodoo?
3Diabudodoo, sasalaanakukai bunokai mala-malane
tukon timbiliyo napasadai-pasadai nia.
4Kai ikoo daanomo salataa kutealikanano kodunia?
Kalu bisa mobabasal komumotoiyan, popitoikene!
5Indeekai komo tantukanggene kodunia nakebelak?
Indeekai komo banatene koalos posukat doiyana?
Kai ikoo toiyo timbiliyo?
6Bulaandokai kosudong-sudong potumbokii dunia motongokokondong moonggol?
Indeekai komo abese kobatu posokol dunia tukon moonggol,
7doi tempo komandala-mandala alani komodoa namananian posinggat-singgat
tukon komalaekat-malaekat doi surgaa mosanaang mokoku-kokuweis.
8 #
Yer. 5:22
Indeekai komo tutupe kotataapon sulano natodimbol kondalangon
salataa luwedoi dunia lalomo bukal sumbot kopaisuno?
9Yakumokai komo tutupiyo kotobun tukon bunom
tukon bungusikene kokalipookan.
10Yaku tantukene kondalangon kalalatano
maka Yaku dupele tukon tataapon mo sinupat.
11Yaku Bantile doiyana, ‘Naiyamo kobataso. Inai moliisiyo!
Dimbaamokai komu bokol-bokol momakansang natadean.’
12He Ayub, kai ikoo biasamo idan,
mosumboliiyo lubat kododowasoono?
13Kai biasamo ikoo mosumboliiyo kopanah nataaniyo kodunia
tukon tipasene komian lokis luwedoi napoo tampat sapitan?
14Kooloyo namadialangan okitakene tukon tontong kobunggo tukon pepelako
bunokai cap doi butatina tukon doi meeng kojubah nalinipatan.
15Kooloyo namadialangan todudul taraang tuuk doi mian moakiyo kona temeneno,
tukon taane yanila molakukene komotikasan.
16Kai ikoo biasamo moobulus doi tobun naatean, mododoon taalikon doi bilit?
Kai biasamo ikoo moampa-ampakon doi ndalangon mobabasal saano bunggono?
17Kai biasamo komian motudoikonggon kotataapon babasal
doi tampat matean salaano mokalipookan tuuno?
18Kai moola mutantukene nadunia nia nakebelak?
Timbiliyokai kalu ikoo toiyomo.
19Kai ikoo toiyo luwedoiyaa komadialan nalubatan,
tukon doiyaa konabiasaan kokalipookan naluwean?
20Kai moola mutantukanggene kokalipookan tukon madialan kalalatano?
kai sumboliiyomo namule kalu yanila lubato?
21Tantu ikoo laate, sabab ikoo motuamo,
tukon salataa kodunia napinasitakaan, ikoo daanomo.
22Kai biasamo ikoo duutiyo dakugudang-gudang
es tukon udan batu natampat,
23Yaku moabese tuuk doi lounu nasulitan,
tuuk tempo polobosian tukon oloyo-oloyo molobosian?
24Kai ikoo toiyo kooloyo matano naluwean?
kai luwe doiyaa komombuul tolopot naluwean?
25Indeekai komo kaliyo tuuk koudan mobabasal naloloon
tukon beean loloon koguluk tukon didip?
26Indeekai komo obulusene koudan doi padang lalomo bunggono,
tukon doi buta bunggono moakiyo kobanggapi modungoliyo?
27Indeekai komo bubusiyo kodunia momotuul tukon momolooyu
tobikon nasopii sasaibino kobulung?
28Oilakai koudan daano kotamano tuu?
Indeekai kotamano kosoiluk paisuno mobatitik-titik?
29Oilakai ko es paisuno daano kotinano?
Indee komo suunge kosoiluk mokoyol?
30Indee komo boliiyo kopaisu teali batu,
tukon kubaiyo kotobun bunggono teali kaku?
31 #
Ayb. 9:9; Am. 5:8 Kai moola mupototongikene komandala Kartika poboino?
kai ikoo bukase komandala Belantik pounguno?
32Kai moola ikoo ajare kobituwon-bituwon pauno samba kolounu,
tukon mandala Biduk mobabasal tukon mopoipoisik, ikoo tantukene konaloloon?
33Kai ikoo toiyo koukum-ukum doi dapang?
Tukon kai moola moutunggulikene doi dunia?
34Kai moola muwookenggene koparenta doi bunom,
tukon sumboliiyo nalelene ikoo tukon udan?
35Tukon kalu ikoo sumboliiyo koselese-selese napotuloki-tuloki
kai moola napoo lubat tukon bantile, “Yaku Tuan!”?
36Luwedoi indee kotomisi kolu toiyo kotempono ko Nil Paisuno batango naikon molelang?
Indee komo popitoikene komanuk tanggoloko baikon koudan naikon lubat?
37Indeekai komo toiyo tuuno tuuk moaite kobunom
tukon moabalinggene tobikon nalubat koudan,
38udan mootikase koambata teali patiku,
tukon buta teali polombot-lomboti?
39Kai moola mumangasukene kosinga-singa nakinaan
tukon mukobbosuliyo konapau-pau tiano,
40doi tempo nasoopan doi leeng lalomo
kai salop doi natelea lalomo?
41Indee komo tomboniiyo kotomisi gagak momalaal
tukon posinggabut dombalaa doisumai mounggolii kinaan?
Indeekai koidan komo tomboniiyo
kalukai konapau-pau bantil doiyakumakabi kinaan?
Currently Selected:
AYUB 38: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
