AYUB 37
37
1Kosokai kubaiyo lolondong konoanggu tukon pakkandang dakutibubung.
2He komuyu sasaibino, polengele ko Mian Bisa nalalo;
polengele koguluk motobuat luwedoi Suungo.
3Posaapon kotimbu, Yana sodiiyo konadidip;
Yana kapatuwe Konaselese doi dunia bundu-bunduno.
4Lapadoiya, longolo konalalo motimbuukan
guluk tukon bubuung momonondok konabulungan
tukon nalalo tangano moselesean
selese didip poala-ala.
5Sabab Mian Bisa naparentah, maka teali komominasaindinggon
laba-laba moajaib moaki ndapahamiyo.
6Linggous otuwong doi dunia luwe Naparentah;
babasal koudan molubat luwe Nasosumbolii.
7Yana atadeiyo kobangkapi nalimang,
sulano napoo toiyo baikon Yana daanoon mobalimang.
8Koiyayon mombosolo usok koidan doi buang tukon leeng lalomo
tukon soop doi natelea lalomo.
9Luwedoi lalom lubat komombuul makansang
tukon luwedoi lembet lubat kokumel.
10Ko Mian Bisa Naroh tealikene kundot kopaisu moluas bunggono,
yana boliiyo teali es momatikas.
11Kobunom Yana muatiyo tukon paisu,
tukon lalaangan kobunom didip mokadiolongiiyo.
12Kobunom-bunom tebeas posaapon kodunia,
luwe Mian Bisa naparentah yanila palabiyok doiyayaa.
13Mian Bisa lubatene koudan tuuk mbetokiiyo kobuta,
kai koidan tuuk ukume kobanggapi;
moolakai koidan tuuk okitakene doi yanila,
Konamaasi Nababasalan tuuno motataap tuuk posidutukon.
14Hai Ayub, inai mobiyok soisikeen, tukon ndongoliiyokai;
palatikanggene ko Mian Bisa nalangge mominasaindinggon-minasaindinggon.
15Kai ikoo toiyo bulaando ko Mian Bisa namebeean kumando,
tobikon palapiit kodidip luwedoi bunom tukon bunom?
16Kai ikoo toiyo bulaando kobunom-bunom natebengakonan
salaku Mian Bisa napandoiyan limbako mominasaindinggon?
17Aki, ikoo tolongo moola mondommuk sabab namoonasan
kalukai mombuul lalom lupayo kodunia.
18Kai ikoo moola buno Mian Bisa mobeleatene kodapang
tukon mokatikase buno tambaga kai kaca doi suangan?
19Otunggulekai kami oila komo sio mai bantile doi Mian Bisa;
akiyono komo moola kami jelaskanggene, akiyono komai pikilan.
20Akimo kuiyase makabi basilingan doi Mian Bisa
inai-inaikene Namalaat alasan mokubaiyo yaku silaka.
21Diabudoo kotimbu laango madialang tuuno
tobikon naakimo natontong kondambinaleng,
mbombuul mopuul bilisiiyo kodapang.
22Pana momosoisoni sumbot doi lembet,
tukon ko Mian Bisa namoliyousan kindendeke konoanggita.
23Tutuu babasal konda Mian Bisa Nakuasa;
aki nateali kita koolaniyo
Yana moloyos konoano tukon sidutu adil;
aki nabiasa Yana lailainggene kobanggapi.
24Doiyamo kosababpo Yana patut nainodotii luwedoi indeemo komiano tolong,
tukon komian momangaku toiyo, Yana aki napopusinggon.”
Currently Selected:
AYUB 37: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
