AYUB 34
34
1-2Bolikonkai komuyudoo tukon daano kopoo pikilan?
Nah ndongoliiyokai sasaibino daku binantil nia.
3Komian toiyo kokinaan momonondok kalu yana tamisemo,
tukon pandoi bantil-bantil kalu yana lengelemo.
4Naiya haalia sio nda palesayo
maka ndapikikene singgat-singgat.
5Ayub bantile, ‘Akiyo kosalah doiyaku,
bai ko Mian Bisa aki naiyase beekene doiyaku komoadil.
6Yaku inaanggo kala-kala,
sabab mobantile yaku akiyo dakulalim.
Diabudoo babasalo dakupakol
maukai naakiyo dakusalah?’
7Komuyu monggitamo komian mobuno Ayub nia?
Yana sosiboliiyo ko Mian Bisa bubula luunggon.
8Yana yase polaing tukon mian-mian moaki nataat
tukon pogouli komian-mian molokis.
9Yana bantile baikon akiyo kotakosokai
kalu yana kakaate molakukene ko Mian Bisa namongiasan.
10He mian-mian mopandoi, ndongoliiyo!
Bulaa konatealian ko Mian Bisa Mo Balakuasa momokubai salah?
11 #
Sad. 62:12
Yana otungguliyo kobanggapi pokonoikene konakokubai,
molakukene yana pokokonoi kona kalakuan.
12Ko Mian Bisa Mo Balakuasa aki nalakukene kokulokisan,
sasaibino komian yana beekene kokaadilan.
13Luwedoi indee ko Mian Bisa natalimaano Konakuasa?
Indeekai komo inanggoikanggon nadunia nia doi Yana?
14Kalukai ko Mian Bisa kibute kobanggapi naansaang,
tukon alayo koidan konaansaang tuboan,
15maka matemo sasaibino komahluk modaano konaansaang,
tukon kobanggapi teali ambata buno tumbeno.
16Nah, kalu ikoo toiyo, palatikanggenekai,
pasange kotolingaimu tukon ndongoliiyomo.
17Oilakai ikoo salakene ko Mian Bisa moadil tukon baranidoo?
Kai ikoo anggene baikon ko Mian Bisa misikitene kokaadilan?
18Ko Mian Bisa ukume kotomundo tukon mokuasayo,
kalu yanila lokis tukon mopalalentel.
19Yana aki naala doi sasaibino kotomundo
kai utamakene komian mokaasa luwedoi mian motalalais.
Sabab yanila sasaibino daanoon Yana matealikene.
20Doi popook tangano, yanila moola mate tukon sosinggot.
Ko Mian Bisa ukume komokuasaiyo tukon yaniladoo kai silaka;
tukon mumunda Yana akateyo komian mobarani.
21Yana dagaiyo kobanggapi natuboan,
yana kitayo sasaibino konalaakonan.
22Akiyokai kokalipookan, mau nabulaandomo konakalipookanan,
momoola seekene komian mobaladosa.
23Aki napalaluu ko Mian Bisa motantukene kotempono,
kobanggapi nalubatan sulano Naadiliyo.
24Aki nasolidikiyo tukon palesayo
Yana pusake mokuasaiyo tukon oduduke koposobolino.
25Sabab, Yana toiyo oila konapoo linakukon;
maka Yana nggolinggene tukon manase yanila doi tempo popook.
26Sabab napoo lalim maka yanila tinapi,
yanila inukum doi umum salaano.
27Sabab, yanila aki naloingiyo Kona mongiasan
tukon aki naanggayo sasaibino Kona parentah.
28Yanila mangaanikene komian motalalais natambalais
ko Mian Bisa lengele konapoo kokiilan.
29Kalukai ko Mian Bisa putusiyo sulano naaki nabiyok tolong,
akiyokai komeeng komian naikon mobarani Nanggimoliyo.
Kalukai Yana seekene Koduduso,
akikai komeeng komian momoola Noposunggene.
30Maka kobangsa-bangsa akiyo konadaya
sulano naakiyenggene kolokis nakuasa nabalai-lainggonan.
31Ayub, kai lapamo ikoo mangakukene komu lalim doi Mian Bisa?
Kai lapamo ikoo paladandi moakimo naikon mumokubai lalim koidan?
32Kai lapamo ikoo kabiyo sulano natinudoikon komu kasalahan?
Kai lapamo ikoo batotopi moatadeyo dokokubaidoo?
33Aki nateali ko Mian Bisa naikon moloingiyo komumongiasan,
salataa ko Mian Bisa nakokubai aki muloingiyo?
Diabudoo, sio ikoo komo putusiyo, bolikon yaku.
Bantilemokai oila komu pandapat!
34Sasaibino komian motoiyo tantu naikon napomenggene;
mian mopandoi molengele yaku naikon bantil,
35baikon Ayub nabasilinganan aki naalatiyo,
tukon baikon konabantilan akiyo koalatino.
36Kalu Ayub nabantilan-bantilan sinolidiki tukon teliti,
naikon tokitamo baikon konasilingan bunokai mian molokis.
37Konasalah sinuungi koidan tukon meeng kolalim;
yana nggimoliiyo ko Mian Bisa,
tukon totulaiyo Yana doi salaanggita.
Currently Selected:
AYUB 34: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
