AYUB 33
33
1Diabudodoo, he Ayub, ndongoliiyokai tukon tutuu
nabantilan-bantilan nia yaku naikon mopolonggene.
2Yakukai siapo
naikon mobantil-bantil.
3Tukon noanggu namoloyosan yaku basilingan,
daku binantil daanoon motutuu.
4Ko Mian Bisa Naroh pasitakayo yaku
tukon beena tuboan doiyaku.
5Jadi, kalu moola, timbiliyomokai yaku.
Sadiayomokai komu pembelaan.
6Doi Mian Bisa, ikoo tukon yaku akiyo konaposasalaan
luwedoi buta kondakinubaiyan.
7Jadi inaimokai momatakutanaku;
aki kumakisuutiyo mokalayo ikoo.
8Jadi, lapamo kulengele oilano komu binantil,
tukon yaku mangalatikene oila komu minakisuuti.
9Ikoo bantile, ‘Yaku bilisii, aki mokubai palanggaran.
Yaku akiyo kososiboliimo tukon aki kumokubai kasalahan.
10Bai ko Mian Bisa mounggolii sabab molawane yaku,
tukon lakukanggene yaku buno musuh.
11 #
Ayb. 13:27
Yana konoikene korante doi ainggu;
tukon awasiyo sasaibino dakusipat-sipat.’
12He Ayub, komupandapat salah tuuno?
sabab ko Mian Bisa babasal tuuno luwedoi bangkapi.
13Bulaando ikoo molaite ko Mian Bisa
baikon Yana aki napaduliyo kobangkapi namondommukan.
14Ko Mian Bisa nabasilingan tukon moisalomo kokaliangano,
bai akiyokai komeeng komian mopalatikanggene konabantilan.
15 #
Ayb. 4:13
Daanoon komian momoolo tombosookon doi tempo popook;
ko Mian Bisa basilingan doi olumon tukon doi batokitaan lalomo.
16Ko Mian Bisa sumboliiyo yanila namondongolii;
Yana donggalaiyo yanila tukon panganukon-panganuukon.
17Konamakisuut sulano napoo tade momokubai lalim
tukon tinggalemo konapoo batinggaiyan.
18Yana aki nasodiikene yanila motaupe kokulokisan;
yanila dinagai luwedoi matean.
19Ko Mian Bisa nggalakene komian tukon lubatene kopanakit
tobikon sasaibino kobutongo yana neemiyo malalas.
20Momasakitoo akimo naiyase kaan,
kokinaan momonondok tuuno kai tinoluwekon.
21Kobutongo teali molisuk tuuno,
kobuku-bukuno tokita sasaibino.
22Yana kabimo mate,
komian namate nalipu loolanimo doiyana.
23Baanggokai daano komeeng ko Mian Bisa namalaekat
moingotiikene kobangkapi nalimang,
naikon lubat tulungiyo yana.
24Tukon sedih domalaekatoo naikon bantile,
‘Sodiiyomo yana,
aki namoola yana loboson doi mian mate nalipu.
Naiyadoo kodoy potolos, sulano yana natongosodii koidan.’
25Kobutongo naikon teali bukuan barani
sehat buno tatabo.
26Kalu yana sambeang, ko Mian Bisa naikon seseange,
maka yana naikon nggaale ko Mian Bisa tukon sanaang,
tukon ko Mian Bisa naikon abalinggene konandondoong.
27Maka doi mian badaang salaano yana naikon bantil,
‘Molokis kuanggene monondok, babasalo dakudosa,
maukai ko Mian Bisa naaki naukumaku.’
28Ko Mian Bisa pantane yaku motaus doi mian mate nalipu
tobikon diabudodoo yaku daano motubo.
29Tukon abali koidan,
ko Mian Bisa lapamo lakukene sasaibino nia,
30sulano yana namoola salamatene kobanggapi,
tukon beena namonondokan doi natuboan lalomo.
31Maka Ayub ndongoliiyo, dingate kotolingaimu
inai mobiyok, diabudodoo yakumo komo basilingan.
32Bai kalu daano komu binantil silakan basilingan;
tukon kalu ikoo bisa, yaku naikon sadia momangakukene.
33Bai kalu aki, inai mobiyok tukon lengelemo yaku,
yaku naikon otunggulikene komontoiyan doikoo.
Currently Selected:
AYUB 33: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
