AYUB 32
32
Elihu nabantilan-bantilan
(32:1–37:24)
1Sabab Ayub anggayo tuuno kobutongo naikon natalakanaan, maka tolu konasobatoo akimo nayase natimbiliyo koidan. 2Bai idoo daano komeeng komian kosambuno Elihu Burakheel napau, meeng komian mobatulunanggene Bus luwedoi Ram namondopulian. Yana aki namoola tahane konanggimalan, sabab Ayub bisakene kobutongo susuungo tukon salakene ko Mian Bisa. 3Yana koidan nggimoliiyo Ayub nasobat toluiladoo sabab yanila aki namoola lawane Ayub nabantilan-bantilan, maukai yanila nasalakene. 4Elihu momongula tuuno doi antara yanila, tobikon doiya yana totiili polong lapa sasaibino basilingan. 5Sambuno kitayo baikon mian motoluiladoo aki namoola motimbiliyo, yana nggimalo, 6tukon bunonaiya konabantilan,
“Yaku daano motabokon,
bai komuyu motuamo,
tobikon doiya yaku matakut tukon baingotii
momatailukene dakupandapat.
7Yaku pikikene, komuyukai komo sio pobasilingan,
momotuamo tuuno sio naebese namontoiyan.
8Bai komo beena montoiyan doi bangkapi,
tolongokai Mian Bisa Naroh Mo Balakuasa.
9Komian moteali pandoi, bolikon sabab tatandako konaumur;
komian momangalati motalakana, bolikon sabab tatandak konaumur.
10Tobikon doiya, ndongoliiyo yaku;
pataikanakumo kubantile dakupandapat.
11Tukon sabar yaku momondongolii doi tempo pobasilingan,
tukon mototiili salataa komuyu
mounggolii pandoiyan mobantil-bantil.
12Kupalatikanggene tukon tutuu;
kundongoliiyo komuyu moposuunggenemo komo aki nateali.
Ayub nasalaan doi nabantilan-bantilan
aki pomoola buktikanggene.
13Bulaando kopoo bantilano
baikon komuyu molapamo laate komontoiyan?
Sabab komuyu tapakisaa kalah.
Tolongokai Mian Bisa komo moola timbiliyo Ayub.
14Ayub nasilingan doikoomokai, tukon bolikon doiyaku,
bai yaku naikon aki kumotimbili buno komuyu.
15Ayub, yanila bingung tukon akimo namotimbili;
akiyono komo moola yanila bantile.
16Yanila kokondong tolong, akimo koidan nabasilingan.
Kai sio kumototiili maukai yanila naakimo nabiyok?
17Aki, diabudodoo naikon kutimbiliyomo;
yaku naikon pelenggenemo dakupandapat.
18Akimo koidan kusabar momototiili.
Akimo namoola koidan kutaane dakubantilan-bantilan.
19Kalu akimo kubiyok tolong, naikon yaku susahmo
buno bondeng momoonoh tukon anggur moboolu.
20Sio kubasilingan sulano natanaang konoanggu;
sio kubukayo kosuunggu tukon kumebee potimbili.
21Mau indee akiyo daku binela nai podangaanian nia lalomo
tukon akiyo komeeng komiankai naikon daku ngginaal-nggaal.
22Mau kokubai nggaalano komian, aki kutoiyo,
tukon kalukai yaku lakukene doiya,
Ko Mian Bisa naikon mosobit naukume yaku.
Currently Selected:
AYUB 32: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
