AYUB 31
31
1Yaku paladadimo tukon totopi
akimo naikon kumbalenge kopauboine tukon konapisuu.
2Oilamokai ko Mian Bisa nailakukon doi kita?
Bulaandokai konapabalas kobangkapidoo napalabuatan?
3Tutuu yana lubatene kosilakaan tukon kosoean
doi mian mokubaiyo kokulokisa!
4Ko Mian Bisa tantu toiyomo sasaibino daku kokubai;
Yana kitayomo sasaibino daku laakonan.
5Yaku batotopi baikon akiyoon naidan yaku momalawan
akiyoon koidan kubiasa moakakene komian.
6Sodiiyomo ko Mian Bisa natimbange yaku doi timbangan mosah bunggono,
maka Yana naikon toiyomo baikon akiyo dakusalah.
7Kalukai yaku liaso doi loloon mobisa,
kai daano konoanggu doi langge molokis,
kalu kolalim kaditiyo kolimanggu,
8maka sodiiyomo komian bailon nakaane oila daku tinipas,
tukon namanas sasaibino daku buta hasilo.
9Kalukai biasa daano konoanggu doi tulanggu kuponggaupan naboloki,
tukon tosookon, kusopitiyo yana doi tataapon sembeleng,
10maka sodiiyomo dakuboloki namasaanggene komian bailon;
sodiiyomo namoolo doi malane bailon nakoy.
11Kalu yaku takainomo lakukene dolalimoo molokis,
yaku patas kumatalima ukuman.
12Dolalimoo silakaiyo buno naraka aungo,
yana suayo kabus sasaibino dakubuat.
13Salataa kabalatan daku ata sabab yaku salakene konahaak,
kundongoliiyo yana maka kukindeke yana tukon noa moloyos.
14Kalu aki, sio nabulaando daku sasalaanano daku Mian Bisa?
Doi tempo nalubatan moadiliyaku oila daku potimbili?
15Bolikonkai Mian Bisa komo pasitakayo yaku,
tukon mopasitakayo koidan daku ata-atadoo?
16Akiyoon nabiasa aki kuiyase motulungiyo komian motalalais,
kai sodiikene sasaibino kobauntal natubo susah konoano.
17Akiyoon nabiasa yaku batadikene kopau tuboon namalaal,
sabeakai yaku susuunggu sukup daku kinaan.
18Yaku pialayo yanila salataamo doi napau-pauan;
sampe yaku mate dakubimbingano yanila.
19Kalu kukitayo komian mokakulangan,
tango natalaisan aki nanggola mongoli pakean,
20yaku kotolonosiiyo yana tukon toik wol luwedoi kudomba buluno susuunggou,
maka yana naikon nggaale yaku tukon tootubo konoano.
21Kalukai biasamo yaku loilokise kopau tuboon,
sabab anggayomo baikon daku palakala naiko manaang,
22sobiiyomokai namoloto loluakon kolimanggu
sulano natangalaas luwedoi bengenggu.
23Akimokai kumokubai bunodoiya,
sabab ko Mian Bisa naukuman todudul nggabute konoanggu.
24Akiyoon nabiasa yaku balaanggene dakubuat,
25kai babanggaakene dakukasaan.
26Akiyoon kubiasa mososubaiyo kooloyo matano momontontilang monondok
kai kobituwon laango momonondok.
27Akiyoon nabiasa daano konoanggu doiyana,
kai kulipate kolimanggu sulano kuodotiiyo.
28Lalim mobuno doiya pantas nainukum mate;
sabab ko Mian Bisa Mo Balakuasa akimo nainangga.
29Akiyoon nabiasa yaku balasanaang sabab daku musuh sakisaa,
kai tedes-tedes sabab yana malaato silakaan.
30Yaku aki kusambeang tuuk namatean daku musuh;
aki nabiasa yaku mokubai lalim mobuno doiya.
31Komian-mian mobalimang doiyaku toiyo,
baikon indemo komian yaku talimayo doi kubonua.
32Dakubonua tobuka tuuk doi mian mopakataus
aki nabiasa kusodiikene yanila namoolo doi loloon.
33Komian bailon seekene konalalim,
bai yaku aki kubiasa mokubai buno yanila.
34Komian napandapat aki kumatakutene,
tukon komian natotulai, yaku aki kupaduliyo
Yaku aki kubiasa dungol doi bonua kai aki kubiyok tolong,
sabab tolongo matakutene naikon natinotulai.
35Akiyokai komian moiyase mondongolii daku bantilan-bantilan?
Kubatotopi baikon bisamokai sasaibindoo.
Boliisi Komo Balakuasa natimbiliyo yaku.
Kalukai komusuh tuduwe doiyaku
tinulis sasaibino sulano kukitayo,
36maka tukon babanggaal naikon kupaase doi bengenggu,
tukon salaku songgo kualambete doi olunggu.
37Naikon kupelenggene doi Mian Bisa sasaibino daku kinubai;
naikon kusasalaane Yana tukon babanggaal
tukon taangkat koolunggu.
38Kalukai buta kupinasol lapamo kundikuke,
tukon kulambase luwedoi tumbuno tuuno,
39kalukai kohasilo kabuso kukaane,
tukon patani mosakakene kusodiikene namalaal.
40Sodiiyomo nabolikon jelai tukon gandum komo tubo doi asi,
bai kayung mosoniton tukon bulung padang.”
Lapamo Ayub nabantilan-bantilan.
Currently Selected:
AYUB 31: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
