AYUB 30
30
1Bai komian motabokon diabudoo totulaiyo yaku,
lalukko yanila tamano kukitayo todudulo hina
tuuk modagaiyo dakudomba polaing koasu padagai.
2Yanila akiyo kotakoso doiyaku
sabab kabuso konapoo bukuanan.
3Yanila malaal tukon sakisaa tuuno,
tobikon nakaane kokayung anggolo momotuul doi bonggulung mokiis.
4Yanila kibute kosonit doi padang lalomo
maka nakaane maukai loono maukai anggolo.
5Yanila siniika tukon panggalai
buno mian mosiikayo kopondikuk.
6Yanila dungol doi leng-leng lalomo;
kobunggul sanggalo buang-buango
teali napoo bonua.
7Yanila tataluuwang doi bonggulung buno iyayon,
pototongi doi mosolot lalomo doi sonit suukano.
8Yanila akiyo kosambuno tukon akiyo koanggano,
komian-mian molapamo siniika luwedoi natano.
9Yanila lubat diabudoo tukon kokumbite yaku,
tuuk yanila, yakunia tolongo maenan moakiyo konatotuuk.
10Yanila kitaaku akiyo kotakoso tukon minosikiton,
tukon koidan yanila tupeiyo kodudusonggu.
11Sabab ko Mian Bisa tealikene yaku lemat tukon aki kubukuan,
yanila pololokon suungiyo konapoo nggimalan.
12Dopoakoolanoo lobosiaku luwedoi salaanggu,
tukon yanila pikikenemo daku tuwongan.
13Yanila semba-sembange daku loloon tuuk silakaiyo yaku;
akiyokai komeeng komian momoola halangiyo yanila doi tempo napoo molobosian.
14Bunokai eaba yanila duduwo kobetoon kubataanggonan;
rame-rame yanila lubat mopisaiyo kobutonggu.
15Kona hebatan sunggunio kabutonggu;
buno mbombuul napuulan kobutonggu anggano natausan;
bunokai bunom moalon, daku monondokan nalapusan.
16Diabudoo kabimo yaku mate;
kiyono kona mamalaangan tuuk doi kususaan.
17Doi tempo popook sasaibino kobukunggu ngilu,
kona malalasan buno tinuk akiyo konatadean.
18Ko Mian Bisa lakoyo yaku doi kubokukum bulungo,
tobikon dakupakean nalambot doi butonggu.
19Yana lambitanaku doi dolaak lalomo,
yaku tealimo buno limbut tolong!
20Yaku nggeleamon doi-Koo, oh Mian Bisa, Ikoo aki mutimbiliyo;
kalu yaku sambeang, Ikoo aki mupalaatikanggene.
21Ikoo tolonggimolon doiyaku,
tukon sasaibino komubukuanan ikoo lailaingganaku.
22Ikoo batadikene kombombuul nabengakanaku;
ikoo nggabutemo kobutonggu doi mbeyus lalomo.
23Yaku toiyo, ikoo babayo yaku doi matean lalomo,
sasaibino komotubo natampat pinototongikonan.
24Bulaando ikoo molobosiyo komian mosilaka,
moakimo nateali mokubai oioila mobaino moinikene komaasi?
25Bolikonkai yaku kokiil pososinggat komian mosusah
tukon seseange komian mokakulangan?
26Yaku moinikene komondokan tukon madialang,
bai kosusaan tukon kalipookankai komo lubat.
27Komatean tukon susaan lubotiiyaku
oloyo paisoboli kooloyo pololokon badaang dakutinoupi.
28Doi kalipookan lalomo, yaku dombalaa doisumai;
yaku kokondong doi mian badaang salaano makabi tulung.
29Koalalonggu poloon moono bamaasian
buno asu lobo tukon tomisi unta nakokiilan.
30Kokulitonggu teali mopook;
kobutonggu tosua tukon maligoot.
31Looluk kulengele komusiik tedes-tedes,
diabudoo bainokai kokiilan tukon mandaungan.
Currently Selected:
AYUB 30: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
