AYUB 29
29
Ayub napasadai modoibundo napalakala kaliangano
1Ayub banggadudukene konasilingan, nabantilano,
2“Boliisi dakutuboan nabuno koidan doi lolukoo,
tempodoo Mian Bisa nalindungiyano yaku.
3Yaku sidutu yana bambenggu tulung,
yana kadiolongiiyo doi tempo kuampakonan doi kalipookan lalomo.
4Doiyamo daku oloyo-oloyo monondokan,
salataa ko Mian Bisa sanaang molindungiyo daku bonua.
5Tempodoo, Mo Babasal konakuasa daanoon molaingaku,
tukon dakupau-pau daanoon doi kupotikunggonan.
6Daku iyayon piniala badaang tuuno kosusu nahinasilkanggon.
Daku kayung-kayung zaitun lisisono badaang tuuno,
maukai doi buta mobatuon konasinakakonan.
7Kalu sasaibino kokota kolaka-lakaino polaing moosulang,
yaku mangala osulangan doi yaniladoo,
8saakonokai kotabo-tabo,
tukon mosobit sambuno yanila kitayo yaku.
Koidan kolaka-lakaino kokondong tukon namontoiyan;
tuuk momebee pongodotii.
9Mau sasaibino kosambu bai tade mobantil-bantil,
10tukon mian motaangga akimo nabasilingan.
11Maukai indee komiano masainding kalu molongol tentang yaku,
indee komo kitaaku nggaale daku jasa.
12Sabab komian motalalais momakabi bantuan yaku tulunge;
yaku belayo kopau tuboon moakiyo konabuat.
13Komian mosusah nggaale yaku,
yaku tulungiyo kobauntal tobikon yanila tanaang.
14Daku kokubai monondok akiyo kososiboliino;
yaku sidutu palataanggene kokaadilan.
15Bai komian piit, yaku komo teali matano
tukon komian molemat, yaku teali aino.
16Tuuk mian motalalais, yaku teali tamano;
tuuk mian molulubaton, yaku teali napembela.
17Bai komian mongginggimolon nakuasa, yaku lotoyo,
tukon yaku salamatene yanila sosubakon.
18Yaku moinikene kumalaat tuboan momalumbit,
tukon mate tanaang doi kubonua susuunggu.
19Yaku buno kayung momolumbang konatuboan,
koanggolo sukup paisu tukon soiluk mbetokiiyo kolangaano.
20Sasaibino komian sidutu nggale yaku,
tukon aki nabiasa mbeeng daku bukuanan.
21Kalu yaku mongotinau, komian-mian aki nabiyok;
sasaibino daku bantilan yanila ndongoliiyo tukon tutuu.
22Sambuno lapa yaku basilingan, akiyokai komo palaluu sinuungi;
kobantilan telem buno paisu udan mototook.
23Sasaibino komian talimayo dakubantilan-bantilan tukon sanaang,
bunokai tani miano motalimayo koudan bunga tempono.
24Yaku boit doi yanila salataa yanila susamo;
kodudusonggu mosanaang suungiyo konapoo bukuanan.
25Yakumo komo taaniyo kokatua,
tukon kubaiyo sasaibino kokaputusan.
Kukatuaiyo yanila buno tomundo doi napasukan tanga-tangano,
tukon kuhibure yanila doi napoloonan lalomo.
Currently Selected:
AYUB 29: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
