AYUB 22
22
POSALITAIYAN KOTOLUNO
22:1–27:23
Elifas
1-2Maka Elifas bantile,
“Doi antara bangkapi,
akiyokai komeeng komian modaano konatotuuk doi Mian Bisa.
Komian mopandoi tuuno bapikil,
tolongo daano konatotuuk doi butongo susuungo.
3Oilakai daano konatotuuk doi Mian Bisa,
kalu ikoo lakukene Namongiasan?
Oilakai daano konauntung tuuk Yana,
kalu komutuboan monondok?
4Bolikon sabab mumatakutan doi Mian Bisa,
ikoo linait tukon inaanggon salah,
5bai sabab badaango tuuno komulalim,
tukon kulokis tuuno komu kokubai tukon mukalakuan.
6Kalu koutusomu aki namola beale konasamea,
ikoo rambase sasaibino konapakean.
7Komian mopakadak aki mubeena monginum,
komomalaal aki musadiakene kokinaan.
8Ikoo pakeyo kobasambuan tukon kuasa
sulano mualayo sasaibino kobuta.
9Aki natongo sasaibino kobalu komo aki mutulungiyo,
bai ikoo lailainggene koidan kopautuboon.
10Tobikon doiya doi mupotikunggonan, diabudodoo moonomo talong,
tukon soi-sosinggot konoamu matakuto.
11Kooloyo polokono kalipookan, akimo nateali ikoo mokita;
ikoo tombul linupokii eaba mobabasal.
12Bolikonkai Mian Bisa komo dungoliyo kotimbu motatandak,
tukon mbalenge doi bilit, doi mandala-mandala motatandak tuuno?”
13Maukai mumasadaikene, “Toiya oila Yana?
Yana daano doi bunom tonggulungo tukon aki nateali moadiliyo kita.
14Ikoo anggene baikon Kona pambaleng totonggupi bunom
tukon baikon tolongo doi kalatan antara timbu tukon buta Kona ampakonan?
15Oilakai ikoo tataap loloiyo
komian badaang molokis naloloon linilik?
16Yanila inakate doi naakiyoonan nalaate konatempo matean,
tukon maanuso eaba molupayo.
17Doiyamo yanila mobarani tolayo Komo Balakuasa,
tukon anggene Yana aki nateali mokubai oioila doi yanila.
18Baanggokai Mian Bisa komo lapamo tealikene yanila kaasa!
Tutuu aki kumangalatikene komian lokis napikilan!
19Komian monondok, kokumbit moonoh tedesan,
kalu nakitayo komian lokis momalaat ukuman.
20Sasaibino komian lokis nalobo manaso,
tukon aung suayomo kabus oila komo daano mototinggal.
21Nah, Ayub, podamemo tukon Temeneno,
sulano mumalaat kaamanan.
Kalu ikoo lakukene doiya,
tantu ikoo malaat untung.
22Talimayomo oila ko Temeneno nainotunggukon doi komuyu;
abesemo doiya sasaibino doi noamu lalomo.
23Abalimo doi Temeneno tukon noa monondok
siokai muatadeyomo kokulokisan doi mubonua.
24Sakukenemo komu mosoni motuleng tuuno;
lambitemokai doi paisu batango momotuulo taalikon doi bilit.
25Sodiikenemo Komo Balakuasa nateali mumosoni,
tukon musuasa momonondok tuuno.
26Maka kalu moola anggayo mosidutu ko Mian Bisa,
tukon toiyo baikon Yanamo komonondokan naluean.
27Kalu ikoo sambeang, yana naikon timbilikon,
tukon ikoo moola tapaatiyo sasaibino komu perjanjian.
28Komuusaha sidutu naikon daano kohasilo
tukon madialang naikon kadilongiiyo komutuboan.
29 Temeneno kependeo komian mobabanggaal,
bai komo kependeo konoano sinalamaton.
30Ko Mian Bisa naikon tulungiyo ikoo kalu ikoo aki musala,
tukon kalu ikoo lakukene konamongiasan.”
Currently Selected:
AYUB 22: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
