AYUB 21
21
Ayub
1-2Ayub timbiliyo,
“Ndongoliiyo oila naikon daku binantiloo;
tolongo doiya daku kinabi salaku hibulan.
3Pataikanakukai kumabalos silingan,
nalapa doiya moolamo koidan pomototulai!
4Bolikon tukon bangkapi daku podangaanian,
jadi aki nabulaandokon kalu kinduungo daku sabaran.
5Mbalengakukai, maka komuyu naikon manganga,
komuyu totuku tukon aki pobasilingan.
6Kalu kupikikene daku ndondoong nia
yaku mbombokon sabab matakut.
7Bulaando ko Mian Bisa mobeena tuboan momalumbit doi mian molokis,
tukon konapoo buat pololokon tosuungi?
8Yanila sukupo malumbit konatuboan
sampe kitayo konapoo tumbu motealimo tabo.
9Konapoo bonua tumbuno sidutu aman;
ko Mian Bisa aki nalubatene kosilakaan doiyanila.
10Konapoo iyayon piniala pololokon mosuungi,
tukon akiyo konakasulitan, momosuung.
11Komian lokis napau-pau osuut tukon tedes,
buno domba mongula mosu-osuut.
12Linolaing rebana, seruling tukon kasapi alalo,
yanila lame momanani tukon osu-osuleng.
13Yana akabusemo konaoloyo-oloyo doi lalabaan lalomo
tukon yanila mate doi podamean lalomo.
14Baanggokai yanila lapamo bantile doi Mian Bisa,
“Pobadodoonggonokai doi kami tukon potauso!
Kami aki mapaduli tukon aki maiyase momangalati
komu makisud tukon Mumongiasan motuuk doimai tuboan.”
15Yanila pikikene, “Moleleaniyo ko Mian Bisa akiyo konatotuuk,
tukon basambeang doiyana akiyo kotakoso.
16Bolikonkai sabab ndabukuanan tolong,
laatemokai sasaibino komakisud tukon mopinakituu?”
Bai yaku naikon sabole-bole aki kuyase
tukon pikilan naambakonan tukon pandapat mobuno doiya.
17Kai biasamo mopinosoi komian lokis naposi,
kai balaa tukon silakaan lupayo yanila?
Kai biasamo ko Mian Bisa nggimoliiyo yanila,
sampe yanila Yana ukume?
18Kai biasamo yanila buno paoli batango tukon ambata
sokoi mopuule tukon mbobuul moalo?
19Komuyu bantile, “Ko Mian Bisa ukume ko Pau sabab tamano nalalim.”
Bai kubantilan: Mian mobaladosa,
doiyamo ko Mian Bisa sio nahukume,
sulano yanila toiyo baikon sabab yanila nalalim,
maka Mian Bisa kirime Kona ukuman.
20Sobiiyo komian modaano konalalim natanggunge konalalim susuungo,
sobiiyo natoupiyo ko Mian Bisa Moinakatandak Tuuno nanggimalan.
21Kalu kobangkapi kabuso konatempo doi dunia,
kai yana daanoon moneneke kona kaluargaa nasanang?
22Kai moola kobangkapi naotunggule ko Mian Bisa,
sabeakai Mian Bisa susuungo komo ukume lobo matubo doi surgaa?
23-24Daano komian moaki namasakit doi tempo natuboan;
yana mate tukon monondok tukon sanaang.
Kona matean tenang rasa sanang,
bai kobutongo daano mobukuan.
25Bai daanokai komo mate sakisaa,
aki natoupiyo konamonondokan.
26Mau doi kibul, yanila polaing-laing tongokoolo;
tinokuuni besuk tukon ngganggalang.
27Bisakai yaku toiyo oila kopoo pinikikon,
tukon sasaibino kokulokisan pobinatetelkon.
28Mupasadai, “Inaando doponguasadoo nabonua
molakukene kokokubai palalentelan?”
29Kai akiyoon posadaiyo komian badaangoo lunggon nataus?
Kai aki poanggayo konapoo bilita pinolonggon?
30Yanila bantile, “Doi oloyo ko Mian Bisa nabeenano ukuman,
sasaibino komian lokis naikon sinalamaton.”
31Konakalakuan akiyono komo gugate;
akiyono komo balase konakulokisan.
32Yana binaba doi bakibulan, tukon inusokon doi buang lalomo;
kona kinibulan dinagai tukon binilisii.
33Doi lolono komian moampakon polainggene kobajano;
tukon muyuk kobuta koidan sokoiyomo yana.
34Jadi, domuhiburandoo kosong
tukon sasaibino komupotimbili kala!”
Currently Selected:
AYUB 21: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
