AYUB 20
20
Zofar
1-2Maka Zofar timbiliyo, “He Ayub, yaku rasayo ikoo tosinggungo,
diabudoo yaku yase namosobit beekene dakupotimbili.
3Domubantilan-bantilanoo tutuu mototulai,
bai yaku toiyo bulaando daku timbiliyano.
4Ikoo aki mutoiyo baikon luwedoi loolukoo,
salataa tumbe-tumbeno komanusia nainabosan doi dunia,
5komian lokis natedesan tolongo soisikeen,
tukon komian lokis nakasanangan tongo sopioman mata?
6Maukai konakinabasalan polong doi dapang,
sampe kooluno singgile kobunom
7maukai yana naikon nalapus sidutu posidutukon,
lapu luwedoi dunia tukon kokubai motinotulai.
Komian-mian moidano natingoniiyo yana,
naikon masadai, “He, inaando konatausan?”
8Yana naikon lapus buno pakias doi olumon,
lapus buno batokitaan doi popook oloyono.
9Komatanggita akimo koidan nakitayo yana;
yana akimo koidan nadaano doi natampat dungolan.
10Doi loolukoo yana mondikuke luwedoi mian motalalais,
sio napau-pau komo soboliyo.
11Maukai yana namongula tukon barani,
bai naapa koidan yana teali ambata tolong.
12-13Bukamaen maamis kokulokisan doi suungo lalomo!
Rasayo seange kalu mosobit nalemese;
tobikon doiya yana abese doi alepo bilit,
sulano namalumbit kona tamisano.
14Bai dokinaanoo tobolii doi tiano lalomo
teali lasum momosopot babayo komatean.
15Kona linomos buat mondinikuk, tapakisaa yana toluwekene;
ko Mian Bisa kaluare luwedoi tiano lalomo.
16Komian lokis naikon monginum lasum mokanggiyo kolokisan,
yana naikon matekene buno sinoku binda moano koupaso.
17Yana aki naikon namotoupi zaitun lisisono molobian,
kai susu tukon dokot motoku-tokumbe.
18Sasaibino konauntung sio naabalinggene,
konausaha hasilo aki naikon natoupiyo.
19Sabab yana pipiike tukon allaise komian moakiyo koona;
yana lambase kobonua-bonua mobolikon yana komo bangune.
20Sabab namodokoan motodudulo lobian,
maka yana akimo naikon nateali biyai.
21Kalu yana kaan sasaibino inakabus,
tobikon doiya konamonondokan aki natataan.
22Salataa tuboi konamonondokan,
kosusaan tukon matean lubat motepokiiyo.
23Salataa yana sibuk mototuiyo kotiano,
ko Mian Bisa teali nggimal tuuno tukon hukume.
24Kalu yana obulen basilaton luwedoi sabel besi,
yana pinokoloni pana tambaga.
25Yana kanakon pana, tobikon napakolon;
pana mangano mangkilap tadule kobutongo,
maka komatakutan kuasaiyomo konoano.
26Manaso sasaibino konabuat inabos;
yana tukon sasaibino konakaluargaa
tosua doi aung mobolikon bangkapi komookoitiyo.
27Kotimbu bukayo konakulokisan;
kodunia bangkit molawane yana.
28Sasaibino konakaasaan naikon kabus,
sabab ko Mian Bisa nggimalo tuuno.
29Doiyamo komian lokis natuboan,
Mian Bisa natuboan tinantukon doiyana.”
Currently Selected:
AYUB 20: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
