AYUB 19
19
Ayub
1-2Bai Ayub timbiliyo,
“Bulaando komuyu mobanggadudul nggimoliiyaku,
tukon komuyu sakisaayo tukon bantilan?
3Badaang luunggon pototulaiyaku,
tukon komuyu loi-lokisaku aki porasayo mammaa.
4Kalukai salah daku kokubai,
doiya bolikon komuyu porugi.
5Komuyu pikikene kobutomuyu lobian monondok luwedoi yaku;
dakususaan komuyu anggene kusalaan bukutiino.
6Potoiyokai baikon ko Mian Bisa daanoon mosakisaayo yaku,
tukon lakoyo doi Napatalonggon lalomo.
7Yaku nggimal sabab Nakulokisandoo,
bai akiyokai komeeng komian komo palatikanggene yaku.
Yaku wookon, “Yaando kokaadilan,”
bai akiyo komo ndongoliiyaku.
8Ko Mian Bisa tutupe dakuloloon, aki nateali yaku aloi,
Yana kubaiyo kalipookan tuuno daku lia-liasan.
9Yana lambase sasaibino daku buat,
tukon namonondokan Yana rusake.
10Yana lobosiaku luwedoi sasaibino kololoon,
buno mian mokibute kotatanaman anggolo,
maka nabatadikene motuul tukon moloyu,
bunomo doiya Yana taane daku minoinikon saibino.
11Kai-kaito ko Mian Bisa nanggimalan doiyaku;
Yana anggene yaku salaku namusuh.
12Kona Pasukan namolobosian aki nateali inatasi;
dinimbolo daku loloon, tukon kinepuungo dakusandung.
13Dakumotolutusan Yana dedenggene luwedoi yaku;
yaku tealimo mian sangalaasan tuuk sasaibino daku potingoniian.
14Daku: Pamanggonan saibino dedenggene kobutongo;
kotula-tulanggu aki naneneeke doi yaku koidan.
15Dakuata moluko toliminggene indee yaku, napoo tuan;
yana anggene yaku mian moakiyoon natingoniiyo.
16Kuange dakuata, bai yana aki natimbiliyo,
maukai kuoluuliyo tukon kumiyukiyo yana.
17Dakuboloki toluwe mongeekiyo daku ansaang boono,
koutusonggu kootan aki naiyase mokolaniyaku.
18Pau-pau doi loloon totulaiyaku;
kalu yaku kokondong, yaku kinokumbit.
19Kotulanggu pomanaanggonan lasayo ngginggim, kalu kitaaku;
yaku tinggalemo yanila mo seseangaku.
20Kobutonggu baimo kulit komo bunguse kobuku;
yaku kabimo mate tukon leal daku ansaang.
21He tula-tulanggu, poseseangaku,
sabab ko Mian Bisa limano umbasaku.
22Ko Mian Bisa banggadudul tekaane yaku; bulaando komuyu mololoiyo Yana?
Kai akiyoon polungguwon momasakisaa?
23Ah boliisi daku bantilan-bantilan natinulis,
sulano nasidutu ninoonook;
24boliisi tukon besi kopangamaat doi batu,
sulano nataanan doi tempo lalomo.
25Yaku toiyo baikon doi surgaa daano komo belayo yaku;
doibundu Yana naikon lubat motulungiaku.
26Maukai kokulitonggu napako-pakolon tukon mapasa,
bai kobutonggu namalumbitan naikon tanggakene ko Mian Bisa.
27Tukon matanggu susuunggu Yana naikon kukitayo,
tukon Yana naikon teali kusobat.
Manaso konoanggu sabab komuyu bantile,
28‘Bulaando kokubaiyano kalu kita balapulo?’
Komuyu mounggolii sabab tuuk mokubai palakala.
29Bai, diabudodoo matakutenemo kosabel!
Sabab ko Mian Bisa nggimal tukon hukume komian mobaladosa;
maka komuyukai toiyomo, baikon daano ko Mian Bisa moadilio kobangkapi.”
Currently Selected:
AYUB 19: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
