AYUB 18
18
Bildad
1-2Maka Bildad timbiliyo,
“He Ayub, oila kotempono kona pupusan komusilingan?
Inai mobiyok, tukon ndongoliiyo diabudodoo kami yase mobantil-bantil.
3Bulaando ikoo moanggene kami longas,
tukon ikoo pokanakene kami tukon saapi?
4Komunggimalan tolongo kollosiiyo kobutomu.
Siokai tuuk mukapantingan
dunia lapuso kopodungolino,
tukon bunggul-bunggul biniolo luwedoi natampat?
5 #
Ayb. 21:17
Komian molokis naposi tantu pinosoi;
kona aung naikon aki nainokoiti koidan.
6Komadialangan doi nasandung tealimo kinduung konatarangan;
posi mokadiolongiiyo akimo natarang koidan.
7Konalaakonan momonondok tealimo tasalah-salah;
kona rencana susuungo mangaanikene yana takait.
8Yana ampakon doi pukat lalomo, maka sambit koaino.
9Takaiton kototunano doi perangkap, tobikon yana linakomo.
10Doi buta, tosookon koalos talongo;
doi loloon, tapasang kokobo tukon pokoot.
11Komatakutan odinggalayo komian lokis doi sasaibino konatausan;
komatakutan lolainge yana doi sasamba kona laakonan.
12Looluk yana bukuan, diabudodoo yana susahmo;
kosilakaan lolaingemo doiyayaa.
13Kokulito kanakon sesel mokulokis tuuno;
kobotokono tukon aino banana boowan.
14Yana linaniton luwedoi nasandung, tampat nalasaano aman,
maka binubut tuuk mangadap matean.
15Diabudodoo indee tolong komo moola dungol doi nasandung lalomo,
tukon idoo tiniposiikon kobelerang, moakiyenggene konapanakit.
16Koanggo-anggolo motuul tukon mokukut;
kolanga-langaano motuul tukon mokukut.
17Yana akimo natiningonii koidan mau doi lalom mau doi kota tonggulungo;
akiyono komeeng komiankai modaano moneneeke kosambuno.
18Luwedoi madialang yana siniika doi kalipookan lalomo;
luwedoi mian tubo nadunia yana siniika.
19Yana akiyo konapau tukon nakatulunan; doi nakampung lalomo
meeng komiankai akiyono kolabino.
20Mondongolii natuboan ngginggim kolipu tumbuno doi talise,
sabeakai kolipu tumbuno doi tolopot mbombokon sabab matakut.
21Bunomodoiya komian lokis natuboan,
yanila moaki naanggayo ko Mian Bisa.”
Currently Selected:
AYUB 18: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
