AYUB 16
16
Ayub
1-2Bai Ayub timbiliyo,
“Idan luunggon kulengele kopandapat mobuno doiya;
komuhiburan tolongokai sakisaawan.
3Oila kotempono kopoo atadeano kobakala-bakalaanoo?
oila komo sunggele komuyu tuuk beena potimbili?
4Kalukai komuyu nia yaku, tukon yaku komuyu,
yakukai moola basilingan pokakana buno doiya.
Badaang tuuno komuyu napenuturan;
koolunggu naikon sua-sualiling.
5Yaku naikon keenggele konoamu tukon moisalomo koteteba
daku bantilan-bantilan naikon buno hiburan.
6Kalu yaku basilingan, daku susaan aki nambeeng;
kalu yaku aki kubiyok, oila koidan kotakoso?
7Ko Mian Bisa kubaiyo yaku payah;
sasaibino daku kaluargaa linopumo.
8Yana tantange tukon lakoyo yaku.
Diabudodoo kobutonggu molisuko tuuno,
tukon doi mian badaang doiyamo kobukutiino
baikon yaku mobaladosamo.
9Tukon nggimalan ko Mian Bisa bending-bendinge kobutonggu
tukon namisikitan tuuno yana mbalengaku.
10Komian badaang totulaiyaku tukon tobuka babasal kosuungo;
yaku pinook tukon tinapi kopidalinggu.
11Ko Mian Bisa salakanggene yaku doi mian molokis;
yaku inotuwong doi mian lokis limano.
12Budoiya dakutuboan aman tukon monondok,
bai ko Mian Bisa lobosiyaku tukon sosinggot.
Yana lakoyo kobulunggu tukon yaku sinakukono;
Yana tealikene yaku sasaran tuuk latihan.
13Tukon akiyo koseang Yana banggadudul mopanaaku,
tobikon sasabulo kotianggu antoko.
14Yana molobosi buno meeng komian mobaladuang,
tukon pokoloniaku badaang luunggon.
15Yaku pakeyo kokarung susaan paloosano,
tukon osulang doi ambata lalomo sabab kinalamo.
16Memela kodudusonggu sabab kukokiilan;
komatanggu lalomo boboongan tukon manampal.
17Bai yaku aki kulakukene komatikasan;
tokita dakusambeang moloyos doi Temeneno.
18He dunia, inai moseekene daku kulokisan;
inai moaki mubiekene daku nggeleamonan kabiyo kokaadilan.
19 #
Ayb. 19:25
Yaku toiyo baikon daku pombela daano doi surgaa;
Yana kosakisii baikon yaku aki kubaladosa.
20Kotula-tulanggu totulaiyaku tukon kokumbitaku;
daanoon mokokiil yaku mangadap doi Mian Bisa mangkabi potombonii.
21Ah, boliisi ko Mian Bisa susuungo nabelaaku doi salaano,
buno meeng komian mobelayo konasobat tukon sanaang.
22Daku taun-taun labino akimo koidan nabadaang;
naapa koidan yaku tauso tukon akimo naikon kuabali.
Currently Selected:
AYUB 16: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
