AYUB 14
14
1Salataamo nasinuungan kobangkapi miyuk, akiyo konabukuanan;
konatuboan palus tukon susah tuuno.
2Yana sopii tukon molooyu buno bubunga;
lapus buno mbombokouno, banggadudul lapus.
3Ooh Mian Bisa, bulaando Ikoo moiyase mbalengaku,
tukon yaku sinasalaanggon doi Mupangadilan?
4Kai moola kobangkapi mobaladosa
nalubatene kolangge motalakana?
5Kobangkapi naumur nakadaang lapamo Ikoo tantukanggene;
konabituwon nakadaang lapamo Ikoo tantukanggene.
Ikoo tataapkanggene koidan konatuboan nadumbakan;
aki namoola yana lumbaiyo.
6Batadikenemo yana nabatadei, inai ponggabute yana;
sulano namoola toupiyo konatuboan polong lapa konalimang.
7Daanokai komoinian doi kayungo motinape;
yana naikon sopii koidan, maka daano kolangaano.
8Maukai namanas koalono doi buta lalomo,
tukon mate koanggolo sabab booan
9bai kalu paisu singgile, yana tubo koidan;
buno tatanaman mosodo sinakakon, kosopi-sopiino abali tubo.
10Bai kalu kobangkapi mate, lapus kosalitano;
yana mate doi dunia, maka inaando konatausan?
11Buno paisu motoduap luwedoi talaga lalomo,
buno paisu batango momooti sampe kabus kopaisuno,
12bunomokai doiya kobangkapi momatemo:
yana akimo naikon namoola abali tubo.
Yana akimo naikon natadagai doi nadaanoan modaano kotimbu,
akimo koidan nabangun luwedoi namooloan.
13Sookanakumokai doi mian mate nadunia lalomo;
lindungiyakumokai naaki nasampe Ikoo nggimal koidan.
Bai tantukenemo kotempo
tuuk moneneeke kobutonggu.
14Sabab kalukai kobangkapi mate,
kai moola naabali tubo?
Oloyo paisoboli kooloyo yaku totiili
sampe daku tempo mosopotan nia alo.
15Maka Ikoo naikon uangaku,
tukon yaku naikon timbiliyo;
Ikoo naikon seange koidan doiyaku,
lobo saibino motubo tukon moaki Ikoo mopasitakayo.
16Maka Ikoo naikon awasia sasamba daku laakonan,
bai akimo koidan Ikoo palatikanggene dakulalim.
17Ikoo naikon ompuniyo tukon dedeenggene dakulalim;
dakusalah doi tempo loolukoo naikon Ikoo hapusemo.
18Kalu naikon tabaako tukon molombomo kobunggul
tukon batu bunggo tasaakon doi natangabosan.
19Kopaisu mosooan konalombaan naikon kikise kobatu-batu;
koudan mobabasal naikon lalinemo kobuta.
Bunomokai doiya Komu manasano kobangkapi namoinian.
20Ikoo lungguiyo yana tuuk sidutu-posidutukon;
Ikoo sumboliiyo yana taus tukon Ikoo boliiyo koduduso.
21Konapau-pau teali mian momonondok
bai yana aki namongotoi.
Tukon kalukai yanila teali talalais,
akiyo komo popitoikene doiyana.
22Tolongo nanggaulan kobutongo kona inomi;
tolongo napoloonan kona tinoupi.”
Currently Selected:
AYUB 14: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
