YESAYA 9
9
1 #
Mat. 4:15
Kobangsa motubo doi kalipookan lalomo
kitayo komadialan molalaangan.
Modungol doi matean bayangano lalomo
kinodiolonii madialan laango.
2 #
Mat. 4:16; Luk. 1:79 Temeneno, Ikoo beena yanila lalabaan mobabasal.
Ikoo kubaiyo yanila toloukon kokuweis.
Yanila laba sabab mumonondokan,
pokakana komian molalaba
doi tempo napototongikanano konapo asi hasilo,
kai doi mongobosan langge molinambas.
3Ikoo alayomo konapo tanggungan mobabalat
tukon napo kayung tinanggung doi bengenoila.
Ikoo lungguiyomo dobangsadoo molai-lainggene komian
motongo lailainggene Komu umat.
Buno pokakana doi loonu loolukon
doi tempo Mulungguiyano ko Median miano nasuludadu.
4Ko suludadu nasapatu molauk-lauk
tukon kona kalambi momoono sau,
naikon kabus aung mokaane.
5Tosuungo komeeng kopau tuuk doi kita,
kita binee meeng komalane.
Yanamo naikon komo katuaiyo kita.
Yana sinombuikon:
“Pongotunggul Pandoy”, “Mian Bisa mo Barani Tambongan”,
“Tama Posidutukon”, “Tomundo Podamean”.
6Yana maparenta salaku tomundo Daud nakaturunan,
kona kakuasaan babasal tuuno.
Kotanono sidutu aman tukon monondok;
kona maparentaan yana tealikene dasar luwedoi hukum tukon kaadilan diabudodoo polong sidutu-posidutukon.
Ko Temeneno Mobabasal Konakuasa pasti laksanakanggene.
Ko Temeneno naikon hukume ko Israel
7 #
Luk. 1:32-33
Ko Temeneno lapamo tuwongikene kohukuman doi Israel nabatomundoan. 8Sasaibino kobangsa Israel tukon Samaria tumbu-tumbuno yanila naikon toiyomo baikon komo lakukanggene doiyamo Temeneno. Budodoiya yanila sombong tukon batinggai. 9Konapobantilano, “Bangunan-bangunan moluwedoi batutela tolubango, baikai naikon mokubai bangunan-bangunan mo tongo luwedoi batu. Koara-ara batango tinapemo, bai kami soboliyo tukon kayung kauwalu Libanon momonondok tuuno.”
10Ko Temeneno gerakanggenemo konapo musuh sulano nalawane yanila. 11Kobangsa Siria taalikon tolopot tukon bangsa Filistin doi talise yanila lungguiyomo ko Israel. Bai ko Temeneno daanoon monggimal tukon tataap hukume yanila.
12Maukai nabuno doiya bai dobangsa Israeldoo miano aki napo yase mobadodoloon, maukai do Temeneno doo Mobabasal Konakuasa nahukumemo yanila bai aki napo badodoloon doi Yana. 13Tobikon doiya ko Israel miano nakatua sasaibino tukon korayat tongo meeng kooloyo ko Temeneno nahukumano yanila sasaibino kabus. Yana uange kooluno tukon puuso. 14Kooluno doiyamo paupaulanggai tukon mian moinodotii, kopuuso doiyamo sasaibino konabi momebee otunggul mosalah. 15Sasaibino komo katuaiyo dobangsadoo sesatkanggenemo tukon nggalanggabutemo korayat napikiran. 16Dobangsadoo murtato tukon kapala batumo tukon konapo bantilan sasaibino lokis. Tobikon doiya sasaibino konapo tabo-tabo akiyokai maunabaino meeng komian komo luput doi Temeneno doo nahukuman. Akimo naiyase mamaasikene kobalu-balu tukon pau-pautuboon. Bai ko Temeneno tataap nggimal tukon hukume yanila.
17Dobangsadoo nakulokisan pokakana koaung molalakene koanggur mo palasoniton. Kona kolotan pokakana kobokulung molinalakon mokalikobungan kotibolungo. 18Ko Temeneno Mobabasal Konakuasa nggimal tuuno, tukon konahukuman pokakana koaung mokolot-kolot tukon dobangsadoo yanilamo komo sinua kabus. Akiyokai komeeng komian momamaasikene koutuso. 19Doi posaapon dotanodoo komiano tubo doi susaan lalomo tukon tongo yanila kaan oilamo konapo moola kinaan, bai napo rasayo bobosul. Maukai koidan napo kaane kotulanoila! 20Ko Manasye tukon Efraim miano yanila polobosi, maka napo polaing-laingi molawane ko Yehuda miano. Bai ko Temeneno tataap nggimal tukon hukume yanila.
Currently Selected:
YESAYA 9: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
