YESAYA 8
8
Yesaya napau salaku paloosan motuuk doi bangsadoo
1Ko Temeneno bantile doiyaku, “Mangalakai meeng kobatutulis mobabasal, maka mutulise tukon huruf-huruf motontong bunonaiya: ‘Pandoiyan doi Pondikukan, Pondikukan mo Mosobit.’ 2Monguangkai salaku sakisii lua komian momoola inangga, doiyamo Imam Uria tukon Zakaria, Yeberekhya napau.”
3Baimo bubula kotempono dakuboloki tianano. Kalu domai paudoo sosuungo, ko Temeneno lapamo bantile doiyaku, “Sombuikenekai iyana, ‘Pandoiyan doi Pondikukan, Pondikukan mo Mosobit.’ 4Sabab dopaudoo akiyoon nababasal tukon akiyoon namoola bantile ‘Papa’ tukon ‘Mama’ sasaibino kobuat mobadaang doi Damsyik tukon sasaibino ko Samaria miano nabarang linambas naikon binabamo doi tomundo Asyur.”
Tomundo Asyur lubat
5Ko Temeneno basilingan koidan doiyaku, 6Konabantilano, “Naiya bangsa nia tolake kopaisu motanaang moluwedoi Syiloah Paisunobatango pauno, tukon tongo yanila sanaanggene ko Tomundo Rezin tukon Tomundo Pekah. 7Tobikon doiya Yaku, Temeneno, naikon lubatene kotomundo Asyur tukon sasaibino konasuludadu sulano nalobosiyo ko Yehuda miano. Yanila naikon maju pokakana ko Efrat Paisunobatango moodu-oduwa tukon lombaiyo kona moto-motombingan. 8Yanila naikon lubotiiyo ko Yehuda pokakana kopaisu molomba polong doi mian bulungo kona tatandakan tukon leleabono kolipu samba.”
Ko Mian Bisa loolainge kita! Kokapilo motabanaton lindungiyo konda tano.
9Eh komuyu sasaibino kobangsa, popototongimokai tukon pololondong! Polengelekai komuyu kodunia bundu-bunduno! Pobatotobomokai sulano pomolobosi bai tukon noamuyu mololondong! 10Pomokubaimokai rencana, bai sasaibino aki nateali. Pomangalamokai keputusan, bai akiyo kogunano, sabab ko Mian Bisa loolainge kami.
Ko Temeneno beena poingotii doi Yesaya
11Ko Temeneno kuasaiyaku tukon beenggu poingotii sulano naaki kuloingiyo dobangsadoo naloloon. Konabantilano, 12#1Ptr. 3:14-15 “Inai poanggape donapokomplotanoo meeng kokomplotan, tukon inai momatakutene naikon kolangge-langge yanila momatakutene. 13Neneekekai Yaku, Temeneno Mobabasal Konakuasa tukon moliyous. Tongokai Yaku komu minatakuton. 14#1Ptr. 2:8 Sabab Daku moliyousanoo tuuno, tobikon doiya Yaku tealimo batu sandungan doi rayat Yehuda tukon Israel, tukon koidan Yaku teali perangkap molakoyo ko Yerusalem tumbuno. 15Badaang komian motuwong sabab takait tukon pakolon. Yanila naikon tongusokon doi perangkapoo lalomo.”
Papatan sulano naaki ndamakabi otunggul doi talapu
16Komuyu daku murud-murid sio poabese tukon popialayo koteteba-teteba moluwedoi Mian Bisa mobeekene doiyaku. 17#Ibr. 2:13 Ko Temeneno seekenemo kobutongo doi Yakub nakaturunan, Kona umatoo, bai yaku anggayo tukon moini doi Yana.
18 #
Ibr. 2:13
Naiyamokai yaku tukon dakupau-pau Temeneno mobeekanaku. Ko Temeneno Mobabasal Konakuasa momaparenta doi Sion Bunggono, utusami moteali paloosan motuuk doi Israel miano.
19Bai komian naikon tongo sumbolii komuyu momakabi otunggul moluwedoi tolosupa-tolosupa motongo poli-polisauk tukon palamiyot kosuungo. Dopai mianoo naikon bantile, “Baanggokai aki ndamoola makabi pongotunggul moluwedoi mian momate uli-uliko sulano nagangguwe komian motubo?”
20Komu potimbili buno naiya, “Lenegelakai ko Temeneno naotunggul! Komian mobasilingan tukon aki napokokonoy ko Temeneno naotunggul, akiyo kona moinian.”
Musa natuboan moono susaan
21Komian moakiyo kogunano tukon momalaal naikon sasabul doi tanodoo. Sabab napo malaalan, tobikon doiya yanila nggimal-nggimalo maka napo kutuke kotomundo tukon Mian Bisa. Inaandokai konapo mbalengan, lelengea doi timbu, 22kai tootuku doi buta, bai akiyo konapo kinita tukon konapo kinita tongo susaan tukon kalipookanan maka oloyo laango moaki namadialan tuuno. Yanila naikon sinakukon doi tampatoo mokalipookan.
23Bai aki naposidutukon dotanodoo namotoupi kasusahan.
Tomundo naikon molubat
Zebulon tukon Naftali nabense-benseno nalipu dinungoli ko Temeneno tongo anggene lipu moakiyo kogunano. Bai doi loonu naikon molubat, ko Temeneno naikon beena pongodotii posaapon dolipudoo luwedoi Tobun Tanga badombalaakon doi tampat polong doi Yordan Paisunobatango sembeleng, tukon koidan polong doi Galilea mian molulubaton nadungolan.
Currently Selected:
YESAYA 8: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
