YESAYA 10
10
1Komuyu mokubaiyo kohukum mosalah sulano polailainggene Daku bangsa komuyukai silakamo. 2Tukon dopo kokubaidoo komuyu tealikene komian motalalais naaki namalaat hak tukon kaadilan, tukon komuyu moola polambase sasaibino kobalu-balu, tukon pautboon nalangge. 3Kalu laate ko Mian Bisa naoloyo hukumano komuyu oilamo kopo kinubai? Oilamo kopo akal kalu laatemo ko Temeneno naolubatanano kokamanae moluwedoi tano moodoon? Doi indeemo kopo makabian tulung? Inaando naikon kopo sookanano kopo buat? 4Kopo nasib tongo inakate doi polobosian lalomo kai komuyu tinandan buno mian motinaan. Bai ko Temeneno tataap nggimal tukon hukume komuyu.
Tomundo Asyur teali Temeneno naalat
5 #
Yes. 14:24-27; Neh. 1:1–3:19; Zef. 2:13-15 Ko Temeneno bantile, “Silakamokai ko Asyur! Ko Asyur Yaku pakeyo salaku tongkat pongumbas doi mian-mian Yaku monggimoliiyo. 6Yaku kapatuwo kosuludadu moluwedoi Asyur sulano nalubotiiyo tukon nalawane Daku bangsa momurtatoo doiya-Ku sampe kubaiya-Ku nggimal. Yaku kapatuwo ko Asyur miano narampoke tukon nandikuke Daku bangsadoo tukon popiike doi loloon buno ambata.”
7Bai ko tomundo Asyur mokubai tetel mosangalaasan. Konatetel mokubai tindakan mokaraas sulano nabadaang kobangsa nainakate kabus. 8Tukon koidan babanggaakenemo kodilino, konabantilano, “Daku talenga-talenga sasaibino tomundo-tomundo! 9Sio kurobuute kokota-kota Kalno tukon Karkemis, Hamad tukon Arpad. Tukon sio koidan kurobuute kokota-kota doi Damsyik tukon Samaria. 10Kobatomundoan-batomundoan mososubaiyo kopilogot molobian kona kuasa komo daano doi Yerusalem tukon doi Samaria sio kulungguiyo. 11Ko Samaria miano tukon sasaibino konapo pilogot yaku akateyo kabus. Pokakana naikon daku linakukon koidan doi Yerusalem tukon sasaibino kopilogot mosinosubai indaa.”
12Bai ko Temeneno bantile, “Kalu komo lapamo Yaku lakukanggene doi Sion Bunggulo tukon doi Yerusalem doiya lapamo, tobikon doiya koidan sio Kuhukume kotomundo Asyur sabab dona sombonganoo.”
13Ko tomundo Asyur bakialla, konabantilano, “Sasaibino doiya yaku lakukanggene tukon kukuasa susuunggu. Yaku badaang daku akal tukon pandoy. Yaku hapuse kobangsa-bangsa bataso, tukon yaku moola rampase konapo palasadiaan. Yaku pokakanamo kobanteng mopipiikiyo kopamarentah. 14Kobangsa-bangsa doi dunia tongo pokakana kotomisi natelea; tukon gampang tuuno daku alaano konapo buat, tongo pokakana komian momopulut nggalau doi telea moakiyono kotomisino. Akiyo dotomisidoo kapilo mokiap-kiap, tukon akiyo kolungguno mongganite komian kai akiyo komo maka-makala.”
15Bai ko Temeneno bantile, “Moolakai koolowang nababanggaakene kobutongo susuungo tuuk doi mian mopakeyo? Oilakai kogargaji lobiyoniiyo kona pontingan tukon doi mian mogunakanggene? Bolikon tongkat komo bingkate komian bai mian komo bingkate kotongkat.”
16Sabab ko Asyur miano nasombo-sombongan, ko Temeneno Mobabasal Konakuasa naikon lubatenemo kokamanae sulano nahukume kotalenga-talenga motambongan barani. Yanila lolondong sabab kanakon sesel onas momoonas tuuno pokakana koaung onaso momoonas momeenggon. 17Ko Mian Bisa momoliyous, Israel Laango, naikon pokakana koaung mokolot motongo meeng kooloyo moolamo lalakene kolangge sasaibino, tukon laing-laing mopalasoniton. 18Kobokulung-bokulung mobadaang kokayungo tukon kokombung-kombung mo subur kololongguno doi Asyur naikon linopu kabus, pokakana komian momalumbito kona masakitan maka namate. 19Kokayung-kayung batango baimo soisik komo totinggal, jadi mau pau-pau mopoipoisik moola naaite.
Soisik komian naikon komo sinalamaton
20Kalu laate kotempono ko Israel miano labino moluput akimo naikon napo keetene konapo nasib doi napo pamarentah bai yanila salakanggene doi Temeneno, Israel miano na Mian Bisa momoliyous. 21Ko Israel miano labino mobaino soisik naikon yanila badodoloono doi Mian Bisa Motambongan barani. 22#Rm. 9:27 Maukai nabuno doiya ko Israel miano napokakana koaito tukon bone doi tobun, tongo moimoiya tolong komo abali. Ko Temeneno nahukuman loolanimo, tukon memeeng pantas tukon adil dobangsadoo nainakate kabus. 23Oode, posaapon kotano naikon minanas kabus luwedoi Temeneno Mobabasal Konakuasa; doiyamo ko Temeneno nakaputusan, tukon akimo namoola binolii.
Ko Temeneno hukume ko Asyur
24Ko Temeneno Mobabasal Konakuasa bantile doi namian modaano doi Sion, “Inai pomatakutene ko Asyur miano, maukai napo pipiike komian tukon sakisaayo komuyu buno Mesir miano nalakukangganano komuyu doi loolukonoo. 25Akimo namalumbit koidan tademo Daku nggimalan, tukon Yaku akateyomo kabus yanila. 26Yakumo ko Temeneno Mobabasal Konakuasa, naikon nanalemo komuyu tukon otunggul, pokakana Daku ajarano ko Median miano doi bunggul batu Oreb. Yaku hukume ko Asyur, pokakana Daku hukumano ko Mesir. 27Doi tempodoo Yaku olupute komuyu luwedoi Asyur nalai-laingganano komuyu, tukon akimo namoola kuasaiyo komuyu.”
Musuh nabaseraangan
28Ko Asyur nasuludadu rebuutemo kokota ayat. Yanila lumbaiyomo ko Migron! Konapo mandu yanila tinggale doi Mikhmas! 29Yanila lumbaiyomo kopintasan tukon yanila bamoolokono doi Geba! Lolondong kokota Rama tumbuno, tukon Gibea tumbuno, Tomundo Saul nakota tumbuno lapamo bulenggene kobutongoila. 30Ponggeleamonokai, komuyu ko Galim tumbuno! Ko Laisya tumbuno polengelekai! Ko Anatot tumbuno potimbiliyokai! 31Ko Madmena tukon Gebim tumbuno poobulen doi lipu bailon. 32Doi oloyo nia komusuh daanomo doi kota Nob, tukon indaa yanila tide-tidekene konapo popukul taalikon doi Sion Bunggulo, doi kota Yerusalem.
33Ko Temeneno Mobabasal Konakuasa naikon lubange yanila pokakana kokayung langaano motinape doi batango. Komo tatandak tuuno doi yaniladoo pinatol tukon dinuwokon. 34Ko Temeneno naikon lubange yanila pokakana kokayung batango doi bokulung tangano motinape tukon olowang. Maukai konapo bukuanan pokakana kokayung batango mohebat doi Libanon, bai yanila tataap tolubang koidan!
Currently Selected:
YESAYA 10: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
