YESAYA 5
5
Nyanyian tentang doi kusobat tukon doi naanggur asino
1 #
Mat. 21:33; Mrk. 12:1; Luk. 20:9 Lengelekai daku nyanyian
tentang daku sobat naanggur asino.
Daku sobat daano kona anggur asino
doi bunggul eyakono momolumbang.
2Yana pacele kobutano
tukon sakukene kobatu-batuno.
Kona sinakakon anggur momonondok mopinilimo
tukon kekendenge komenara batotoliyan.
Yana makali meeng kobitu
tampat napiisano konaanggur,
maka natotiiliyo kosaono namotua,
bai kohasilo anggur saono momeele.
3Jadi budodoiya Daku sobat bantile,
“Komuyu sasaibino, Yerusalem tukon Yehuda tumbuno,
adiliyakumo antara Yaku tukon Daku anggur asino.
4Oilamo koidan Daku kinubai,
bai akiyoon Kulakukanggene komo tuuk doi Kuanggur asinodoo?
Bulaando motongo saono momeele kohasilo,
tukon bolikon saono momonondok molapamo Yaku moinikene?
5Bunonaiya naikon Daku lakukangganano Daku angguroo asino:
Yaku naikon bubute sasaibino kopagaro potikunggon,
Yaku naikon manase komeselo moekeenggele,
maka Kuosobiiyo koiyayon mobuas namanase
tukon napipiikiyo.
6Yaku batadikenemo kobulung natuboiyo.
Kona anggur batango aki naikon Kupangkase,
tukon aki naikon Kukadioloniiyo.
Bai tongo Yaku batadikene kosonit tukon bulung notombukiyo,
tukon Yaku pantane kobunom-bunom nalubatene koudan sulano naudoniiyo.”
7Sabab ko Temeneno Mobabasal Konakuasa
kona anggur asino doiyamo umat Israel,
tukon ko Yehuda miano
yanilamokai koanggur batango mosinakakon.
Luwedoi yanila Yana moinikene kokaadilan,
bai tongo daano kokulokisan.
Yana moinikene napo ekeenggele kolangge nabisa-bisaan,
bai tongo daano konggeleamonan makabian kaadilan.
Manusia molakukene kokulokisan
8Silakamokai komuyu momongoli bonua-bonua tukon motipuwo komian nakombung-kombung sulano natosuungi kopoo buat! Akimo namalumbit naikon kabusokai kotampat motuuk doi mian bailon tukon naikon baino komuyu komo dungol doi tano nia. 9Kulengele ko Temeneno Mobabasal Konakuasa batotopimo, “Kobonua-bonua mobabasal tukon momonondok nia sasaibino naikon kosongo akiyono komo dungoliyo. 10Kolangge mosinakakon akiyo kohasilo, koanggur asino kona kebelan songulo kohektar kohasilo tongo songulo koliter kopaisuno. Sakat koliter kolibuang gandum komo tiniduk tongo songulo koliter kogandum!”
11Komuyu naikon silakamo! Kopo limang luwedoi dowa-dowa polong popook tongo moinum suka maka pomala-malangu. 12Doi polame-lamean daano kokasapi alalo, gambus, rebana tukon suling maka pomoinum anggur. Bai aki popusinggene ko Temeneno nalimang tukon oila Kona linakukanggon. 13Tobikon doiya Daku umat moakiyo kona tinoy oioila yana tinandan pokakana komian motinaan. Sasaibino kokatua tukon rayat naikon mate malaal tukon molou. 14Komatean babano tobuka bebelan sulano nalemese kokatua-katua doi Yerusalem polaing-laing korayat morame-rame doi lamean lalomo.
15Sasamba komian naikon inakamaa, tukon komo babanggaal inekepende. 16Bai ko Temeneno Mobabasal Konakuasa otudoikene Kona babasalan tukon lakukene oila komo bisa. Yana naikon okitakene Kona moliyousan tukon doi naadiliyano Kona bangsa. 17Bai kokota mototimbunimo buta kombembe tukon domba pauno bobosul momakaan bulung tukon aki napo malaal.
18Silakamokai komuyu mobaladosa momeenggon! 19Komu bantilano, “Batadikenemokai ko Temeneno Israel miano na Mian Bisa momoliyous namosobit kubaiyo kona tindakan! Batadikenemokai nalakukanggene Konatetel, sulano nda kitayo tukon nda toiyo.”
20Silakamokai komuyu moputarbalikanggene komo monondok tukon molokis, mokalipookan tukon momadialan, momosopot tukon momaamis!
21Silakamokai komuyu moanggene kodilimiyu pandoy tuuno!
22Silakamokai komuyu mojago monginum anggur! Komuyu teali barani tukon hebat kalu komuyu monginumo suka! 23Bai doiya tongo pokokubai sulano pomalaat doy tambo, tukon komuyu bebaskanggene komian mosalah, tukon komuyu pantane komian moakiyo konasalah namalaat kaadilan. 24Komuyu tolakemo ko Temeneno Mobabasal Konakuasa naotunggul, tukon komuyu totulaiyomo ko Israel miano na Mian Bisa naparentah. Tobikon doiya, pokakana kolaing tukon bulung momotuul kabus tosua doi aung lalomo, bunomo lakon doiya komu katurunan naikon teali boowan, komu bubunga teali motuul tukon kabus benga kalu mbombuul puulemo. 25Ko Temeneno nggimoliiyo Kona bangsa. Yana batotobomo mohukume yanila. Kobunggul-bunggul unggot; ko mian momate bajan-bajano tasabul pokakana kolembut doi loloon. Bai ko Temeneno daanoon monggimal tukon tataap naikon mohukume Kona umat.
26Ko Temeneno naikon uange kobangsa bailon moodoon tukon yanila naikon lubat doi tempo nasoi-soibitan! 27Yanila sidutu batotobo mopolobosi tukon aki napo toiyo mopakadak. Yanila aki napo biasa moolo tukon piit. 28Konapoo panah matano mamangan tuuno tukon konapo panah batango tataap tasadia sulano batembak. Konapo adalan lungguno motikas tuuno pokakana kobatu aung, tukon konapo kereta rodano kona baputaran pokakana kombeyus. 29Sasaibino konapo suludadu wowookon pokakana kosinga mosodo namosoku iyayon bailon, maka nabulenggene, tukon akiyono komo moola osobiiyo.
30Doi oloyodoo posaapon ko Israel tololongol kosinapan alalo doi polobosian lalomo pokakana kobokol alalo doi tobun.
Pokitayokai, posaapon dotanodoo kalipookano tukon moonomo kasulitan. Komadialan tealimo kalipookan.
Currently Selected:
YESAYA 5: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
