YESAYA 6
6
Ko Mian Bisa uange Yesaya sulano nateali nabi
1 #
2Tom. 15:7; 2Tund. 26:23 Doi taun Tomundo Uzia namatean, yaku kitayo ko Temeneno. Yana osulang doi Nakulusii batomundoan motatandak tukon momonondok tuuno. Kona jubah tutupiyo posaapon ko Temeneno Na Bonua. 2Doi napotikunggonan kokondong komahluk-mahluk mokolot pokakana kobilat, suwe-suwele noom kokapilo. Kolua kokapilo tombukiyo koduduso, kolua tombukiyo kobutongo tukon koidan kolua kokapilo yana pakeyo nabengaan. 3#Ink. 4:8 Yanila posadai meeng tukon bailonggon:
“Moliyous, moliyous, moliyous.
Moliyouskai ko Temeneno Mobabasal Konakuasa.
Kona daanoan momoliyous moono kodunia.”
4 #
Ink. 15:8
Koalaloila tealikene ko Temeneno Na Bonua alaso lolondong, tukon do Temeneno doo Na Bonua moonomo tukon tibolung.
5Maka yaku bantile, “Silaka! Akiyono daku moinian, sabab kobabanggu manggilit tukon dosa, tukon koidan yaku podungolimo kobangsa mobadaang kona dosa koidan. Maukai nabuno doiya, bai tukon matanggu susuunggu yaku lapamo kitayo ko Tomundo, Temeneno Mobabasal Konakuasa!”
6Boobus doiya daano komeeng domahlukoo mobenga doiyaku tukon mababa bara yana moalayo luwedoi balabaan. 7Yana singgilikene dobaradoo doi suunggu maka nabantile, “Naiya bara nia singgilemo kosuumu. Jadi budodoiya komu kasalahan inapuso tukon komu lalim Temeneno ompuniyomo.”
8Sambuno lapa doiya koidan yaku lengelemo ko Temeneno alalo mobantile, “Indee naikon Daku inutus? Indee naikon komo teali babayo konda bilita?”
Maka kutimbiliyo, “Naiyamokai yaku. Utusakumokai!”
9 #
Mat. 13:14-15; Mrk. 4:12; Luk. 8:10; Yoh. 12:40; Kis. R. 28:26-27 Doibundu koidan do Temeneno doo sumboliiyakumo mobabayo nateteba nia doi naumat tukon nabantilan nia: “Komuyu naikon lengele momeenggon, bai aki pomangalatikene. Komuyu naikon palatikanggene momeenggon, bai aki potoiyo indee komo teali naikon.” 10Maka do Temeneno doo bantilo koidan doiyaku, “Kisulemokai dopai mianoo napikiran, kotolingainoila tealikene nabongol tukon tealikene napiit komatanoila, sulano naaki napo kitayo kolobo, lengele kai mangalati, maka napo abali doiya-Ku tukon napo teali tangalin.”
11Boobus koidan yaku masadaimo, “Moondukon konakalumbit naiya kaadaan nia nabanggadudulan, oh Temeneno?”
Kona potimbili, “Siokai nakabus kokota-kota totombuni buta tukon akiyono kopodungulino, kobonua-bonua akimo nadinungoli koidan, tukon kobuta tealimo kosong tukon kindolon, 12dokota-kotadoo tumbuno Yaku naikon siikayo doi lipu moodoon, sulano naposaapon dolipudoo nateali kiis. 13Tukon kalu daano kosongulo komian maka nadaano komeeng komian mototinggal doi tanodoo, yanakai naikon inakate. Bai bunomo kokayung bailingin kalu natinape daanoon kosopiino motubo, bunomo lakon koidan dobangsadoo daanoon kolabino mototinggal tukon doiyamo naikon kona tealian tumbe komian momoliyous.”
Currently Selected:
YESAYA 6: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
