YESAYA 28
28
Poingotii ko Batomundoan doi Lembet
1Silakamokai ko Israel miano monggolonguwon nakota binanggaakon! Kona tambonganan bolii buno karangan bunga momolooyu doi olunoila bunggono. Silakamokai kokota motabanaton tatandak doi pepelako momolumbang, komian momalangu setenga mati konapo banggalan. 2Ko Temeneno naikon utuse komeeng komian mobukuan tukon mobarani. Kona lubatan pokakana kosokoy polaing koudan eis, pokakana koudan mobabasal tukon eaba molaline kolangge-langge. Tukon nanggimalan tuuno yana binggakene yanila doi buta. 3Dokatua-katuadoo nabinabanggaakon naikon pinipiko. 4Donapo kotadoo momulaimo bolii kona tambonganan naikon lapuso. Kona nasib pokakana koara saono mokanakon lembet; salataa kinita, komian pupuwo maka kaane bai aki namaamis.
5Ko Temeneno Mobabasal Konakuasa teali karangan bunga motambongan motuuk doi Naumat. 6Ko Temeneno beena kaadilan doi sasaibino kohakim, tukon baranian doi mian modagaiyo kokota luwedoi mian molubat momolobosi.
Yesaya tukon sasaibino konabi doi Yehuda momalangu
7Tukon koidan konabi-nabi maka koimam-imam yanila molonguimo sabab todudulo badaang konapo anggur tukon suka ininum. Napo ambakon todu-toduwokono tukon taka-takait sabab konapo pikiran nggabuto. Konabi-nabi akimo napo pahamiyo kopokita-pokita ko Mian Bisa mobeekene doi yanila. Koimam-imam akimo napo moola putusiyo kopalakala-palakala yanila mosasalaane. 8Konapo meja moonomo tukon uta, sampe akiyono kotampat mobilisii koidan.
9Yanila mongoluu tentang doiyaku, konapo bantilano, “Konapo panganggon yana indee kona inotunggul? Yana pikikene kita nia pau mopoipoisik modaanoon mosinusu? 10Bulaando yana mootunggukene kita sasamba kohuruf, sasamba kokata, tukon sasamba kokalimat.”
11 #
1Kor. 14:21
Kalu aki poiyase ndongoliiyaku, maka ko Temeneno utuse komian molulubaton sulano naotunggule komuyu doi balogatan mosangalaasan tukon silingan mosangalaasanggon. 12Ko Temeneno tawarkanggene doi komuyu sasaibino kopo lipu tatadean, bai aki pondongoliiyo Yana. 13Tobikon doiya ko Temeneno otunggukene doi komuyu sasamba kohuruf, sasamba kokata tukon sasamba kokalimat. Tobikon doiya doi tempo poambakonan komuyu tolubang doi buta tukon pakolon, komuyu kana doi talong tukon komuyu tinaano.
Batu alas motuuk doi Sion
14Polengelekai oila ko Temeneno nabinantil, eh komuyu komian mobiasa batotulai mopalentayo korayat doi Yerusalem! 15Komuyu bantilemo baikon lapamo pomokubai perjanjian tukon matean tukon koidan komuyu mokubai pomeenggonan tukon mian momate nadunia. Komuyu tantukanggenemo baikon kosilakaan naikon molubat aki naikon natepake kodilimu, sabab komuyu bakokoli. 16#Sad. 118:22-23; Rm. 9:33, 10:11; 1Ptr. 2:6 Tobikon doiya, ko Temeneno Moinakatandak tuuno yana bantile buno naiya, “Yaku naikon abese kobatu potumbak momoonggol doi Sion; meeng kobatu potumbak momaaling koolino tukon tinulis: ‘Indee komo moonggol kona maanggaan, aki naikon namangaku kala.’ 17Kokaadilan Yaku tealikene alos pongukur, tukon kokojujuran Yaku tealikene alos kalalatan.”
Koudan batu sasapuwo bilisii sasaibino kopo kalakalaan komuyu momoinikene. Koeyaba naikon anuse kona tampat sapitan. 18Komu perjanjian tukon matean maka komu pomeenggonan tukon mian momate nadunia naikon aki nateali, tobikon doiya kalu lubat kobalaa, komuyu manas mopinipiik. 19Komuyu tinepaki soeyan momeenggon tukon sio potanggunge sasamba kooloyo, dowa-dowa suun kooloyo tukon popook. Komuyu lolondong matakut kalu komuyu mangalatikene ko Mian Bisa nateteba. 20Komuyu pokakana komian moiyase moolo doi koiy moaki nabulusan tuuk tampat koloyosano kobutongo. Kona toik onggulos aki nabebelan tuuk naonggulos.
21 #
Yos. 10:10-12; 2Sam. 5:20; 1Tund. 14:11 Ko Temeneno naikon kokondong koidan pokakana doi nakokondongan doi Perazim Bunggulo. Yana kakaate pokakana Konakakaatean doi Gibeon Pepelako tuuk nalaksanakangganano Kona maksud, doiya meeng komaksud moaneh doi banggapi! Yana lakukanggene Kona limang mominasa indinggon
22Yaku ndongoliiyomo ko Mian Bisa Moinakatandak tuuno tukon Mobabasal Konakuasa nakaputusan moakamanase kabus sasaibino kotano. Inai mototulaiyo nabantilan-bantilan poingotii nia yaku mopelenggene. Kalu ikoo asalakene naikon maaling tuuno komu oluputano kodilimu!
Mian Bisa nakebijaksanaan
23Lengelekai daku bantilan-bantilan, palaatikanggenekai daku teteba. 24Komeeng kopetani aki nasidutu-posidutukon mobabajak, mobapacol tukon mokaliyo konabuta sulano nasakaiyo. 25Kalu donabutadoo lapamo tapacol, yana tipasemo konalibuang, umpamano jintan mopook tukon momoute. Yana masakakon lua kokaliangano kogandum mopododolii, tukon doi bilit langge mosinakakon bailon. 26Yana toiyo bulaando kolimangano, sabab kona Mian Bisa otunggulikenemo. 27Aki namapake patandan pengirik motuuk doi jintan mopook kai roda gerobak motuuk gilingano kojintan momoute. Tuuk doiya yana tongo mapake posiduk momimilaan. 28Doi tempo tudongiano gandum, aki natika-tikakene banggadudul sampe manas. Aki! Yana toiyokocara bairikan mokana tukon molokiti gerobak bai akiyo kogandum batu-batuno momanas. 29Dopandoiyanoo kona lubatan luwedoi Temeneno Mobabasal Konakuasa. Sasaibino ko Temeneno natetel tongo teali.
Currently Selected:
YESAYA 28: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
