YESAYA 29
29
Yerusalem nanasib
1Silakamo kokota Yerusalem mosinombuikon Mian Bisa nabalabaan! Silakamokai Daud nakota basandungan! Posobiyomokai napaisosoboli kotaun-taun naliname-lamekonan. 2Bai ko Mian Bisa olubatene kobalaa doi kotadoo, tobikon komian nggimal tukon mangaduh. Sasaibino kokota pokakana kobalabaan momoono sau. 3Ko Mian Bisa lobosiyo tukon lubotiiyo mokopuunge doi potikunggon dokotadoo. 4Ko Yerusalem pokakanamo kokolu mokakaate nalengele koalalo doi buta lalomo, tukon koalalo kalaleengan luwedoi ambata lalomo.
5Bai sasaibino komian molulubaton domo lokisoo naikon yanila lapuso pokakana koambata kai sekam mbombuul mopuule. Tukon sosinggot tukon aki natinoon-toon. 6Ko Temeneno Mobabasal Konakuasa naikon bebaskanggenemo dokotadoo luwedoi sokoi molokis tukon teali mobabasal. Yana naikon lubatene kosokoy polaing kobilat momakansang. 7Maka komian mo lulubaton sasaibino kona pasukan molubat lobosiyo ko Yerusalem, Mian Bisa nabalabaan kotano, sasaibino komo lubat tukon lobosiyo dokotadoo, naikon lapus buno monii doi popook. 8Kobangsa-bangsa mopototongi sulano nalobosiyo ko Yerusalem yanila naikon baino pokakana komian momalaal moolumenggene yana modaanoon mokaan, padahal nabangun yana tataap malaal, kai buno mian momolou moolumenggene yana momonginum paisu, bai nasosimbu kobulungo motuul tuuno.
Konabi-nabi naotunggul aki napinalatikanggon
9Banggadudulkai komasa-masaindingan tukon totutup komatano pokakana komian mopiit! Potealimokai pomalangu, bai bolikon pomonginuman anggur. Poambakonokai potodu-toduwokon, bai akikai pomonginum suka. 10#Rm. 11:8 Yana tealikene komuyu popiit tukon pomoolo tombosookon. Yana tombukiyo sasaibino konabi matano tukon popokiyo sasaibino komian motoiyo kopokita duduso. 11Sasamba kopokita alatino akimo pomangalatikene, pokakana kokitab mosinegel. Kalu dobukudoo binabakon doi meeng komian sulano nabacakanggene doi komuyu, yana naikon tongo bantile aki namoola, sabab dokitabpoo sinegelo. 12Kalu naikon binabakon doi mian mobuta huruf, yana naikon timbiliyo baikon yana aki natoiyo mobacayo.
13 #
Mat. 15:8-9; Mrk. 7:6-7 Ko Temeneno bantile, “Domian-mianoo tongo sosubai Yaku tukon nabantilan tolong, bai konoanoila odoon doiya-Ku. Konapo agama tongo manusia naatulan komo hinapal. 14#1Kor. 1:19 Tobikon doiya Yaku odinggalayo yanila tukon pongumbas mobadaang luunggon. Komian mopandoi naikon teali bonggu, tukon sasaibino konapo pandoiyan akiyono kogunano.”
Moinian doi loonu salaando
15Silakamokai komian moseekene konatetel doi Temeneno! Yanila momokubai tindakan tukon aki napo biyok-biyok, tukon yanila anggene akiyokai komeeng komian komo kitayo kai motoiyo oilamo konapo linakukanggong. 16#Yes. 45:9; Rm. 9:20 Sasaibino kolangge yanila putar-putare. Indeekai komo lobian kona pentiingan, mian momokubai tobunan kai buta tobunan? Uga-ugaate komo kinubai yana bantile doi mokubaiyo, “Bolikon ikoo komo kubaiyaku”? Kai dolanggedoo mokinubai bantile doi mokubaiyodoo, “Ikoo akiyo komutotuuk”?
17Daano komeeng kososombot kona binantilan buno naiya, “Akimo namalumbit koidan kobokulung tabalimo buta kanggian, tukon kobuta kanggian naikon abalimo teali bokulung.”
18Doiya kotempono komian mobongol naikon moolamo nalengele kobantilan-bantilan moluwedoi meeng kokitab mobinacakon, tukon komian mopiit naikon moolamo namokita. 19Komian motalalais tukon moakiyo kona kaliangan naikon abali rasakanggene kotuboan momonondok Israel miano na Mian Bisa momoliyous mobeekene doiyanila. 20Idoomokai kona kabusan komian molai-lainggene komian bailon tukon akiyenggene ko Mian Bisa. Ko Mian Bisa naikon akateyo kabus sasaibino komian mobaladosa, 21mian moiyase bafitanaa, mian moaki napataikene komian molokis nainukum, tukon komian mobabayo kosalita-salita mokala sulano komian mojujur naaki namalaat kaadilan.
22Tobikon doiya ko Temeneno, Israel miano na Mian Bisa mobebaskanggene Abraham, diabudodoo bantile, “Ikoo Daku bangsa, komuyu akimo potinotulai koidan tukon kodudusomu akimo nakokombol koidan sabab pomamaawan. 23Sabab kalu komuyu kitayo kopo pau-pau Yaku mobeekonggonmuyu, maka naikon poakuiyo baikon Yakumokai ko Mian Bisa moliyous Israel miano na Mian Bisa. Komuyu naikon odotiiya-Kumo tukon matakutana-Kumo. 24Komian molongas naikon inotunggul sulano namoola mangalati tukon komian mosidutu mondommuk yanila sanaang moinotunggul.”
Currently Selected:
YESAYA 29: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
