YESAYA 27
27
1 #
Ayb. 41:1; Sad. 74:14, 104:26 Doitempodoo ko Temeneno naikon pakeyo Kona sabel momoonggol tukon mo mamangan sulano nahukume ko Bindana, dobindadoo mopalasupet tukon mobaka-bakalokon, tukon tuuk moakateyo konaga tobun.
2Doitempodoo ko Temeneno naikon bantile,
“Pomanyanyikenekai tentang daku anggur kombungo mo monondok.
3Yakumo, ko Temeneno, kopototoolino;
siap doitempo basiraman,
oloyo popook yaku totiiliyo,
sulano naakiyo komo gangguwo.
4Akimo kurasayo koponggimoliiyan koidan.
Kalu andeno daano kobulung kai laing mosoniton,
Yaku naikon komo lokomiyo,
tukon Yaku suayo kabus sasaibino.
5Bai kalu Daku umat namusuh-musuh mounggolii soopan doiya-Ku,
siokai napo podame tukon Yaku,
oode, podame tukon Yaku.”
6Doi loonu kulubatan,
ko bangsa Israel naikon pokakana kokayung batango motubo koalono,
tukon tuboi kona bulusan, tukon kosaono moono kodunia.
Ko Temeneno hukume Kona bangsa
7Ko Temeneno hukume Kona umat, aki napokakana Kona motoongan Kona hukumano kobangsa-bangsa momusuwo yanila. Aki naakateyo Konaumat pokakana Kona akateyano Konaumat namusuh. 8Ko Temeneno hukume konaumat tukon sakukene yanila doi tano moodoon. Yana siikayo yanila luwedoi mbombuul molokis molubat doi tolopot. 9Bai ko Israel miano nadosa-dosa moola nainampuni kalu konapo balabaan-balabaan giniling halus buno kapur. Sasaibino konapo lambea tukon Dewi Asyera timbalango sio naminanas koidan.
10Dokotadoo mopinagar kayung tealimo kiis tukon tininggalo buno padang lalomo mokosong. Koiyayon mopiniala makaan bulung tukon tatade idoo maka napo kaane kabus kokayung-kayung pangano loono. 11Kalukai kayungdoo langa-langaano motuulo tukon molotomo, maka koboiboine lubat moalayo maka napo kubaiyo tumbal.
Dobangsadoo akiyo konapo tinoy oioila, tobikon doiya ko Mian Bisa Mopasitakayo yanila aki naikon naseange yanila.
Ko Temeneno mamaasikene koidan Kona bangsa
12Doitempodoo ko Temeneno naikon pototongikene Kona bangsa tukon yana uange memeeng kobangsa luwedoi Efrat polong doi Mesir kalalatano. Yana naikon poalaasene yanila pokakana komian mopoalaasene kogandum batuno luwedoi kulito.
13Doitempodoo naikon pinuuk kotorompet mo babasal tuuk ponguang koidan doi sasaibino ko Israel miano mosinakukon doi Asyur tukon doi Mesir. Yanila naikon lubat doi Yerusalem sulano napo sosubaiyo ko Temeneno doi Nabunggul bunggono mo moliyous.
Currently Selected:
YESAYA 27: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
