YESAYA 26

Ko Mian Bisa beena kamanaangan Konaumat

1Doi tempodoo komian naikon manyanyikene nanyanyian nia doi tano Yehuda:

“Bukan maen kona bukuanan naiya nda kota nia;

Mian Bisa susuungo komo bangune Kona benteng,

tukon naimbamo konda salamatan.

2Bukayomo kotataapon-tataapon mobabasal,

sulano nausok kobangsa mosetia,

bangsa molakukanggene ko Mian Bisa namongiasan.

3 Temeneno, Ikoo mebee damean tukon doi nasanaangan

doi mian momoonggol konoano

sabab yana anggayo Ikoo.

4Anggayokai momeenggon ko Temeneno,

sabab ko Temeneno Mian Bisa, sidutu lindungiyo kita.

5Ko Temeneno aki naiyase komian mosombong;

yana manase kabus konapo kota mopinagar kayung,

tukon manase kabus doi buta.

6Komian motalalais tukon komo sakisaa naikon komo pipiikiyo.”

7Komian mojujur ambakon doi loloon momoloyos,

sabab Ikoomo, ko Temeneno, komo kubaiyo konapo loloon.

8Oh Temeneno, kami loingiyo Komu kaputusan,

tukon kami totiiliyo Ikoo;

Ikoomokai komai ngginaal tukon konoanggami napinoloonggon.

9Daku jiwa peleenggene Ikoo doi tempo napopookan,

konoanggu moinikene Ikoo doi tempo dowa-dowa.

Kalu Ikoo naikon hakimiyo kodunia,

kodunia tumbuno naikon toiyo oila komo bisa.

10Maukai komian molokis nakinubai tukon monondok,

bai aki natoiyo oila komo bisa.

Doi negara modaano kona hukum bai yana mokubai kulokisan,

tukon aki naakuiyo ko Temeneno Nakuasa.

11 # Ibr. 10:27 Temeneno, Ikoo siap mohukume Komu musuh,

bai yanila aki napo toiyo.

Batadikenemokai napo mammaa tuuno

mokitayo Komu maasi motuuk doi Muumat.

Batadikenemokai napo mate kabus

luwedoi Mupongukum yanila.

12 Temeneno, Ikoomokai naikon komo kubaikami sanaang;

sasaibino komai linimang,

Ikoomokai komo lakukanggene tuuk doi kami.

13Kotuan-tuan bailonggon biasa kuasaikami,

bai tongo Ikoo komai inakui,

oh Temeneno komai Mian Bisa!

14Yanila matemo tukon akimo napo tubo koidan,

kouliko akimo naabali koidan.

Sabab doi yaniladoo Ikoo akateyomo kabus

tukon akimo mumonondok doi yaniladoo.

15Oh Temeneno, Ikoo tealikanggamimo badaang tuuno,

tukon Ikoo ekebelanemo komai lipu,

tobikon doiya kami akabasale Ikoo.

16Ikoo hukumemo kami;

doi mai susaan kami abali doi Ikoo,

tukon komai sambeang doi-Koo, Temeneno.

17Pokakana koboine momosuung pau

makaluatek tukon nggeleamon sabab namasakitan,

bunomokai doiya komai kokubai doi salaa-Mu, Temeneno.

18Kami tianan tukon makaluatek sabab namasakitan,

bai akiyo komai sinuung;

aki mai mebee kasalamatan doi dunia,

aki koidan nasosuungi kobanggapi doi dunia.

19Komu mian momatemo naikon tubo koidan,

konapo bajan abali koidan.

Komian motinadino doi buta lalomo

naikon tubo tukon laba-laba.

Pokakana kolinggous mosegarkanggene kodunia,

Ikoo otuboiyo komian mo malumbito kona matean.

Ko Temeneno mangadili tukon mongotuboi

20Usokokai doi mubonua, eh daku bangsa, maka potataapikene kopo tataapon. Pobasookonkai soisikeen sampe kabus ko Temeneno nanggimalan. 21Ko Temeneno bulus luwedoi nalipu dungolan doi surgaa sulano nahukume kobangkapi doi dunia sabab napo dosa. 22Konapo mangakatean yanila moseseekene naikon tobukamo. Kobuta akimo naikon natombukiyo komian moinakate mate.

Currently Selected:

YESAYA 26: LAIBGZ

Highlight

Copy

Compare