YESAYA 23
23
Ramalan tentang Tirus tukon Sidon
1 #
Yeh. 26:1–28:19; Yl. 3:4-8; Am. 1:9-10; Zak. 9:1-4; Mat. 11:21-22; Luk. 10:13-14 Naiyamo kotetebano tentang ko Tirus.
Eh komuyu ko Tarsis miano mobiasa tala-talabut mopintosiiyo kodapang, pomandaungokai! Doitempo potalabutan tukon popolong doi Siprus, komuyu pinopitoikon baikon kokota Tirus manaso. Kopelabuhan tukon kopo bonua manaso sasaibino.
2-3Eh komuyu kopesisir tumbuno, pomangadumokai, tukon kopedagang-pedagang Sidon! Sabab komuyu biasa makapatu mian motaus doi tobun sembeleng sulano napo babalukon tukon mongoli Mesir miano nagandum tukon sulano napo badagang doi sasaibino kobangsa.
4Eh kokota Sidon, komu inodotiiyan akiyono! Kotobun dapango moatean akimo naakuiyo ikoo koidan, konabantilano, “Yaku akiyoon kubiasa mosuung pau, akiyoon kubiasa mopiala pau malaneno kai boineno.”
5Tukon koidan ko Mesir miano yanila masainding tukon nggabut kalu yanila lengele baikon ko Tirus mosilakamo.
6Komuyu kopesisir tumbuno, pomandaungai, tukon podampasokai doi Tirus! 7Pokitayokai kopokota Tirus modaanomo doi loonu loolukon. Naiyamokai dokotadoo mobiasa basa-basanaang? Kai naiyamo dokotadoo mo makapatu miano motaus doi tobun sembeleng sulano nalausala indaa? 8Padahaal kona pedangang-pedang mian moturunan sambu tukon inodotii doi dunia nia? Indeekai komo putusiyo sulano ko Tirus nainotuwong. Sabab naiyamo kokota moberkuasa tuuno? 9Ko Temeneno Mobababasal Konakuasa, Iyanamokai komo putusiyo. Iyanamo komo putusiyo sulano naatadeyo dokotadoo tumbuno nabangga-banggaalan luwedoi napo hasil yanila molaate, tukon yanila yase pipiike komian moinodotii doi dunia.
10Eh ko Spanyol tumbuno, poambakonokai polimange kopo kombung, sabab kotampat mokubaiyan kapal akiyono. 11Ko Temeneno tidekenemo kolimano doi tobun bunggono tukon nggolinggenemo kobatomundoan-batomundoan. Yana maparentakenemo sulano ko Fenisia nabenteng-benteng naminanas kabus. 12Ko Temeneno bantile, “Eh kokota Sidon! Ikoo akimo mubasa-basanaang koidan. Komo dungolikon linai-lainggono. Maukai napo dampas doi Siprus, bai akikai napo aman.”
( 13Bolikon bangsa Asyur, baikai bangsa Babel komo pataikene kokota Tirus nakinuasai iyayon mobarani. Yanilamokai komo mokokondong menara polobosian, tukon yanilamo komo manase tukon benteng-benteng sampe dokotadoo teali manas.)
14Eh komuyu komian mobiasa tala-talabut, pomandaungokai! Kokota komuyu mobalaanggene manasokai.
15Naikon nalaate kotempono maka ko Tirus tinoliminggono pitu kolono kotaun konakalumbit, pokakana komeeng kotomundo naumur. Kalu liisemo dotempodoo, ko Tirus naikon buno meeng koboine motombololowaon mobuno naiya konyanyiano:
16Mangalamokai kasapi, boilingiyokai kokota,
eh ikoo kotombololowa motinomilinggono!
Kutiyokai kokasapi, tukon manyanyikai koidan,
sulano muninonook koidan.
17Salataa kabus dotaunoo mopitu kolono, ko Temeneno neneeke koidan ko Tirus tukon naikon koidan yana lakukene konalimang buno doi looluk. Yana badagang tukon sasaibino kobatomundoan modaanoon doi dunia. 18Konapo untung tukon konapo tambo aki naikon napo abese, bai yanila tongo sosubakene doi Temeneno. Komian mososubaiyo ko Temeneno naikon mapake dodoydoo sulano napo kubaiyo pongoli oilamo konapo kapalaluuwan.
Currently Selected:
YESAYA 23: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
