YESAYA 22
22
Ramalan tentang Yerusalem
1Naiyamo kotetebano tentang ko Pokita doi Pepelako lalomo:
Eh, ko Yerusalem tumbuno, bulaando komuyu sasaibino moliba doi bonua atono?
2Aki namoola sasaibino kokota mobalame-lame tukon mowookon laba-laba.
Sabab komu pojuang-pojuang matemo doi polobosian nia lalomo tukon bolikon mate sabab polobosian. 3Sasaibino komu talenga bulenggene kodilino tukon yanila linakomo akiyoon napo lootonggon panakene konapo panah. Sasaibino komu mian mobukuan mau naodoono konapo bulenan bai yanila danoon momoola linako. 4Inai mopalaatikangganaku; batadikanakumokai kukokoliiyo komian moluwedoi kubangsa yanila momatemo doi polobosian lalomo. Inai mohiburaku. 5Takainomo, ko Temeneno Moinakatandak tuuno tukon Mobabasal Konakuasa lapamo tataapene naoloyo nia salaku oloyo nanggabutan, rame tuuno tukon nggalanggabut doi Pokitaan Pepelako lalomo. Kokota-kota pagaro mobinetoon minanaso. Kowookonan makabi tulung doi bunggul bunggono tololongolo.
6Ko Siria miano lubat tukon molokiti adalan tukon kereta polobosian, ko Elam miano mapake busur tukon panah, ko Kir miano sadiayo konapo tompide tukon kalait. 7Kopepelako-pepelako mosubur doi Yehuda moono tukon kereta polobosian. Kopasukan momolokiti adalan dagaiyomo kotataapon mobabasal doi Yerusalem. 8Sasaibino ko Yehuda napertahanan molombo.
Doitempodoo, komuyu naikon pareksayo sasaibino kosinapan alat-alato. 9-10Badaang tuuno kobetoon bisi-bisilo komuyu molaate doi kota Yerusalemoo betoono tukon danoon momoola nakinindok. Sasaibino kobonua doi Yerusalem sio popalesayo, tukon polomboyo komoimoiya maka kobatu-batuno popakeyo sulano pokindendeke dokotadoo betoono. Kopo mangatambunan paisu, 11pomokubai kolam doi kotadoo lalomo tukon poontokiyo paisu kokolam momalumbito. Bai aki popalatikanggene ko Mian Bisa momalumbito kona batetelikangganano sasaibino doiya, tukon komo mangaanikene doiya nateali.
12Doiya kotempono ko Temeneno Moinakatandak tuuno tukon Mobabasal Konakuasa sumboliiyo pokokiil tukon pomandaung, podaluwo kopobuuk tukon pomapake toik moluwedoi karung. 13#1Kor. 15:32 Bai kobalino koidan, komuyu basa-basanaang tukon balame-lame. Komuyu mokolot sapi tukon domba, makaan sail tukon monginum anggur paisuno maka pobantile, “Pomaimokai nda kaan tukon nda inum, sabab namodoa kita matemo!”
14Ko Temeneno Moinakatandak tuuno tukon Mobabasal Konakuasa yana okitakene kodilino doiyaku tukon bantile, “Tutuu, donapoo kulokisanoo akimo Kuampuniyo polong doi napo matean. Yakumo, ko Temeneno, lapamo basilingan.”
Ingotiiyano ko Sebna
15Ko Temeneno Moinakatandak tukon Mobabasal Konakuasa sumboliiyaku mopososuunggene Sebna, mokapalaiyo kokamali, tuuk mopelenggene doiyana ko Temeneno nateteba nia, 16“Komu aangganano ikoo nia indee miano? Indee komu haak sampe ikoo kubaiyo komu kibul doi batu nia mobunggukon? 17-18Awas, Yaku naikon sakukonggon doi naodoonan. Yaku naikon lakoyo ikoo tukon lulu-lulune maka kunggolinggonggon buno bola doi tano mobabasal. Indaamo naikon komu matean doi mukereta-kereta binaanggaakon lisuko. Ikoo kulokisanggenemo komu kaluarga natuan sambuno. 19Tobikon doiya Yaku berentiyomo ikoo doi mubasambuan tukon Yaku turunkanggenemo komu pangkat motatandako.
20Doitempodoo, Yaku naikon uange Daku peleleani Elyakim Hilkia napau. 21Kopakean batomundoan tukon kopabaango Yaku naikon pekeikenemo yana. Sasaibino komu kakuasaan Yaku beekenemo doiyana. Yanamo naikon komo teali batatamaan doi sasaibino ko Yerusalem tumbuno tukon Yehuda tumbuno. 22#Ink. 3:7 Tomundo Daud naturunan yanamo komo kuasaiyo. Yanamo komo taaniyo kobatomundoan kuncino. Kalu yana bukayo, akiyo komo moola tutupe, tukon kalu yana tutupe akiyo komo moola bukayo. 23Yaku beekene kobasambuan momoonggol pokakana kopapasok mokinonoikon doi pagar mo bineeton. Sasaibino kopulino inangga sabab iyana.
24Bai sasaibino koutus-utuso tukon kopulino moloolani teali beban doiyana. Yanila tongo moinikene doiyana, pokakana kotobunan tukon balanga moiniison doi paku mopinaaton. 25Kalu doiya teali, bai mau dopakudoo mopinaaton bai daano kotempono tobubut tukon tuwong. Tukon doiyamo kona pupusan kona tealian sasaibino kopulino tukon komian mo tongo moinikene doiyana. Yakumo, ko Temeneno, lapamo basilingan.”
Currently Selected:
YESAYA 22: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
