YESAYA 21
21
Pokita tentang Babel namonosan
1Naiyamo kotetebano tentang Babel. Buno sokoy momomuuk mololoiyo ko padang gurun, bunomokai doiya kona lubatan kosoe molokis tuuno mo luwedoi tanodoo. 2Yaku malaat pokita tentang langge-langge moteali molokis; tentang poloilokisan tukon nainakamanasan kabus kotano Babel.
Majumokai, ikoo ko talenga Elam, lobosiyomokai! Eh ko talenga Madai, kopuungemokai! Sabab ko Mian Bisa naikon opupusiyomo sasaibino kosakisaawan Babel momangaanikene.
3Dopokitadoo kubaiyaku pusing sampe akimo kumoola kitayo kolipu tukon kubaiyaku bongol. Yaku tealimo nggotokuton tukon nggosokitono, pokakana komeeng koboine moadukon mosuung. 4Konoanggu aki natanaang; yaku matakut tukon lolondong konoanggu. Kopopook yaku morindukanggene tongo lubatene komatakutan.
5Yaku kitayo koidan kolamean molapamo tasadia; komian moinundang naosulangan tasadiamo. Yanila kaan tukon inum. Bai sosinggoton longol komeeng koparentah: “Eh kosuludadu-suludadu kapalano! Posadiayo kopo sinapan!”
6Maka ko Temeneno bantile doiyaku, “Potausokai poabese komeeng kopototooli tukon pailukene doiyana sulano oilamo kotana kinita sio nalapurkanggene. 7Kalu yana kitayo kopasukan molakit adalan yanila lubat polaing-laing lua, kopasukan momolokiti keledai tukon unta, yana sio nakitayo mono-monondok.”
8Doibundu koidan dopadagaidoo sio nanggeleamon, “Tuan, yaku badagaimo sasamba kooloyo mau doi oloyo maukai doi popook.”
9 #
Ink. 14:8, 18:2 Kitayokai, ndaiyamo yanila! Kopasukan momolokiti adalan yanila lubat polaing lua-lua. Doibundu koidan dopadagaidoo yana babulitakene, “Ko Babel tuwongo! Konapo timbalang-timbalang sinosubai manaso tukon sasabulo doi buta.”
10Daku bangsa Israel! Ikoo linai-lainggono tukon piniipiiko pokakana kogandum batu-batuno. Budodoiya yaku pelenggene doikoo kobilita momonondok molapamo yaku lengele moluwedoi Temeneno Mobabasal Konakuasa, Israel miano na Mian Bisa.
Ramalan tentang Edom
11Naiyamo kotetebano tentang ko Edom.
Daano komian mobantile doiyaku moluwedoi Edom, “Eh, padagai, kai daanoon momalumbit konapopokita?”
12Daku potimbili, “Kododowa naikon lubat, bai tataap popook koidan. Kalu ikoo yase mansadai, lubatokai momansadai koidan.”
Ramalan tentang Arab
13Naiyamokai kotetebano tentang ko Arab:
Eh, ko Dedan miano, komu mian mobadaang moampakon doi padang pasir yanila mokubaimo sandung doi Arab lipuno. 14Eh kotano Tema tumbuno, pobeenakai namonginum paisu komian momolou molubat doikoo, tukon pobeenakai nakaan komian molulubaton. 15Sabab yanila bulenggene kodilinoila luwedoi silakaan, luwedoi pana mopinanakono, tukon luwedoi polobosian mohebat.
16Maka ko Temeneno bantile doiyaku, “Tapaat baino meeng kotaun koidan ko Kedar bense-benseno namakmuuran naikon akiyono. 17Ko Kedar miano napamana-pamana takainomo mian mopandoi barani. Bai soisik komo salamat. Yaku, ko Temeneno Israel na Mian Bisa basilingano.”
Currently Selected:
YESAYA 21: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
