GALATIA 6
6
Sio ndapotombonii
1Utus-utus! Kalu meeng-meeng komian linaat mokubai meeng kolalim, siokai komuyu mo tubo lolo Mian Bisa Na Roh, babayo mianoo abali doi loloon mo talakana. Bai komuyu sio lakukanggene doiya tukon miyuk-miyuk tukon dagaiyo inai napolong komuyu susuungo tagoda koidan. 2Siokai komuyu po potomboniikene tanggunge komian bailon natanggungan, sulano tukon buno doiya komuyu tulutiyo Kristus napalenta. 3Kalu meeng komian aanggene kobutongo penting, banggokai aki, mianoo kokoliiyo kobutongo susuungo. 4Meeng-meeng komian sio napalesayo kobutongo susuungo oila kona kalakuan monondok kabai aki. Kalu monondok, yana moola lasayo banggaal doi langgedoo. Bai mau naakimo nabandikanggene tukon mo kinubai mian bailon. 5Sabab memeeng komian sio natanggunge kona tanggung jawab susuungo.
6Mian mo mantalima otunggul Kristus, siokai naebese tukon naguru sasaibino komo monondok mo daano doi yana.
7Inai motangakakon. Mian Bisa aki namoola minaenggon! Oila komo sinakakon doiyamo komo pinupui. 8Kalu mian masakakon tulutiyo kona tabiat, yana naikon pupuiyo komatean doi natabiatoo. Bai kalu masakakon tulutiyo ko Mian Bisa Na Roh napimpinano, yana naikon pupuiyo kotuboan tuuno tukon posidutukon doi Mian Bisa Na Roh. 9Tobikon doiya, inai ndatade momokubai kolangge-langge monondok; sabab kalu kita aki nda tade-tade kubaiyo langge-langgedoo daano koidan kita naikon pupuiyo kohasilo. 10Jadi, kalu daanoon kotodanan doi kita, siokai kita kubaiyo komo monondok doi sasaibino komian, utamano tuuno doi nda utus-utus mo meeng komanganggaan.
Poingotii tukon popitoi
11Palahatikanggene mono-monondok taalikon doi sembeleng nia yaku mo tulise susuunggu tukon huluf mo babasal. 12Mian badaang mo yase inodotii tukon langge-langge duniawi, yanilamo mokakaate pakisaayo komuyu motulutiyo kopalatulan sunat. Bai yanila kubaiyo doiya sulano ko Yahudi miano naaki nakubaiyo lokis yanila sabab salib Kristus. 13Mian badaang mo loloiyo palatulan sunatoo aki namangapakonggon ukum agama. Bai yanila yase komuyu sinunat, sulano yanila moola banggaalkene baikon komuyu molole doi palatulanoo. 14Yaku aki kuyase tuuno mabanggaalkon oilano, kalu bolikon nda Temeneno Yesus Kristus mo lapamo mate sinempang. Sabab tobikon Yana lapamo mate sinempang, maka dunia akiyono koidan kona alati doi yaku. Tukon doi dunia nia, yakudoo pokakana molapamo mate. 15Sinunat kabai aki nasinunat, doiya aki napenting. Komo penting doiyamo teali banggapi boolu. 16Buat mian badaang mo tubo tukon nandondoongoo, tukon buno koidan buat sasaibino Mian Bisa namian, yaku moinikene Mian Bisa naikon beekene komonondokan tukon namaasi.
17Tukon koikoidan inaimo meeng komianoo kubaiyo susa yaku koidan, sabab doi butonggu nia daano kona tanda-tanda baikon yaku pololaing Yesus.
18Kinatauwan nda Temeneno Yesus Kristus sidutu balakaatiyo Utus-utus. Amin.
Komai Hormat, Paulus
Currently Selected:
GALATIA 6: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
