GALATIA 5
5
Palataanggene komu bebasan
1Kita diabudodoo bebas, sabab Kristus lapamo bebaskanggene kita! Sabab doiya palataanggene komu bebasan, tukon inai moyase kinubai ata koidan.
2Neneeke, kalu komuyu kabiyo sinunat, doiya koalatino Kristus akiyo kona totuuk doikoo. Mobantile naiya daano yaku susuunggu, Paulus. 3Koi koidan yaku mebee poingotii doi mian mo kabiyo sinunat, baikon yana sio nalakukene sasaibino koukum agama! 4Kalu komuyu kakaate pokindok tukon Mian Bisa mololoi ukum agama, doiya koalatino mupotaamian tukon Kristus lapamo botol. Tukon buno doiya komuyu tubo bolikon doi lingkungan Mian Bisa namaasi. 5Bai buno kami, kami moinikene baikon tukon Mian Bisa Na Roh natulungano tukon naalasan kami namanganggaan doi Kristus, Mian Bisa moolakene kami pokindok tukon yana. 6Sabab kita lapamo pomeenggon tukon Kristus Yesus, motuluti kabai aki natulutiyo kopalatulan sunat akimo nateali soal koidan. Komo palaluu tongo manganggaan doi Kristus, tukon doiya totong doi kita nda seangano komian bailon.
7Looluk komuyu berjuang tukon monondok! Diabudodoo bulaa komuyu moakimo pomolole koidan doi Mian Bisa namongiasan? Indee komo lapamo oluuliyo komuyu? 8Bisa mo lakukenedoo bolikon Mian Bisa mo lapamo uange komuyu! 9#1Kor. 5:6 “Pangaani mo soisik naikon tuboimo doi sasaibino kona tampat,” mian mobantile. 10Mau kai nabuno doiya yaku daano mangangga baikon komuyu aki naikon pomololoi pendirian bailon, sabab kita lapamo pomeenggon tukon Kristus. Tukon yaku mangangga baikon mau indee komo tabule komu pikiran, naikon Mian Bisa ukume.
11Tentang yaku, Utus-utus, bulaando yaku mobanggadudul minusu kalu yaku babotilanggene baikon palatulan sunatoo palaluu? Kalu yaku babotilanggene buno doiya, maka daku babotilangganano tentang Kristus nasinempangan aki nasumbetene kopalasoalan. 12Lobian komo monondok mian badaang mo nggabute komu pikilanoo banggadudulo motobuat banggadudul doi jemaat!
13Utus lapamo inuang tuuk teali mian mo bebas. Bai inai mopakeyo komu bebasanoo tuuk banggadudul tuuno kubaiyo oila komo komuyu yase kubaiyo. Kobalino, komuyu sio poseang-seang tukon popoleleani. 14#Basam. 19:18 Sasaibino koukum agama tongusokon doi palentadoo mo meeng lalomo, “Siokai ikoo seseange kotulamu banggapi pokakana ikoo moseseange kobutomu susuumu.” 15Bai kalu komuyu ponggima-nggimakon, neneeke, naikon komuyu polaing-laing manas.
Mian Bisa Na Roh nainiyas tukon banggapi nainiyas
16Daku makisuut buno naiya: Sobiiyomo ko Mian Bisa Na Roh nababayo komuyu tukon inaimo potubo loingiyo kobanggapi nainiyas. 17#Rm. 7:15-23 Sabab kobanggapi nainiyas aki napokokonoi tukon Mian Bisa Na Roh nainiyas, tukon Mian Bisa Na Roh nainiyas aki napokokonoi tukon banggapi nainiyas. Lua-luadoo posasala, tobikon komuyu aki namoola kubaiyo oila kopoiniyas. 18Bai kalu Mian Bisa Na Roh pimpine komuyu, maka komuyu akipo kinuasai doi ukum agama.
19Banggapi motubo nainiyas tokita doi nakokubai-kokubai lalomo mo balolowa, madikit, tukon aki namonondok; 20doi nasosubaan pilogot lalomo tukon motoiyan guna-guna, pomusu-musu, poakate, possunoi, mosobit nggimal tukon butongo susuungo kona inutamakon; pooalaasan tukon posala-salakon, 21misikit konoano, mala-malangu, lame-lame, tukon bai-bailonggon. Yaku ingotiikene komuyu doi sasaibinodoo diabudodoo bunomo kai yaku ingotiikene komuyu loolukoo, baikon mian mo kubaiyo kolangge-langge mobuno doiya aki naikon nateali anggota Mian Bisa namian.
22Kobalino, kalu mian badaang Mian Bisa Na Roh komo pimpine kona tokitaan doiyamo: Yanila poseang-seang, yanila tedes, yanila noano tanaang, yanila sabal tukon monondok konoano, yanila monondok tuuk doi mian bailon, yanila molole, 23yanila ekependeo konoano tukon sidutu moola kuasaiyo kobutongo. Aki daano koukum agama molarange kolangge-langge mobuno doiya. 24Mian badaang mo lapamo teali Kristus Yesus namian, mian badaangoo lapamo akateyo kobanggapi nandondoong tukon sasaibino kona pisuu tukon nainiyas. 25Mian Bisa Na Roh lapamo beekene doi kita tuboan mo boolu; tobikon doiya Yana koidan sio nakuasaiyo konda tuboan. 26Kita aki namoola teali babanggaal, tukon kolosokitiyo konoa, tukon noa misikit meeng pokakana bailon.
Currently Selected:
GALATIA 5: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
