EFESUS 1
1
1 #
Kis. R. 18:19-21, 19:1 Mian Bisa namian doi Efesus, mosetia doi Kristus Yesus!
2Yaku, Paulus, rasul Kristus Yesus doi Mian Bisa namongiasan, moinikene sulano ko Mian Bisa Tamanggita tukon Yesus Kristus beena balakaat tukon monondokan doi komuyu.
Balakaat rohani moluwedoi Kristus
3Ngginaal ko Mian Bisa, Temeneno Tamanggita Yesus Kristus!
Yana balakaatiyo kita tukon sasaibino kobalakaat rohani doi surgaa lalomo, sabab kita pomeenggon tukon Kristus. 4Akiyoon nadunia nia natinealikon, Mian Bisa lapamo lilike kita lolo doi Kristus tukon komakisuuto sulano kita teali namian mo tangalaas tukon akiyo kona salaan doi salaano. 5Sabab Mian Bisa naseang, maka Yana lapamo tantukene loolukon baikon lolo doi Yesus Kristus, Yana naikon bingkate kita teali nalabuk-labuk susuungo. Tukon doiyamo kona iniyas kubaiyo. 6Ngginaal ko Mian Bisa mo babasal, sabab lolo doi na Pau sineang yana mamaasikene tuuno kita.
7 #
Kol. 1:14
Tobikon, Kristus namatean, Mian Bisa bebaskanggene kita, koalatino Yana lapamo ompunio kita doi nda lalim-lalim. 8Yana kubaiyo doiya sabab seange tuuno kita, tukon do seangoo bineekon doi kita tukon moono pandoiyan maka pangalatian. 9Mololoi namongiasan susuungo, Mian Bisa bontiikene doi kita Kona tetel laasiano; Yana lapamo tataapene baikon dona teteloo naikon nainalapa lolo doi Kristus. 10Teteloo doiyamo sulano sasaibino kolangge, mau doi surgaa mau doi dunia, teali pomeenggon tukon Kristus buno kapalano. Tukon doiya langgedoo naikon Mian Bisa alapayo kalu laatemo kotempono.
11Mian Bisa limange sasaibino kolangge lolo doi namongiasan tukon tataapene susuungo. Salataa doi tumbe Yana lapamo lilike kita sabab Yana yase sulano kita nateali namian sabab pomeenggon tukon Kristus. 12Tadukai kita, mo tumbe-tumbeno moini doi Kristus, nggaale ko Mian Bisa sabab nababasalan!
13Mau komuyu nalapamo teali Mian Bisa namian doi tempo komuyu molongol Mian Bisa nateteba, doiyamo Bilita Monondok mo beena kasalamatan doikoo. Komuyu mangangga doi Kristus Yesus, tobikon doiya ko Mian Bisa beena paloosan kona langge doikoo, doiyamo na Roh mo dondiikene. 14Dorohdoo doiyamo kolaatano baikon kita naikon mantalima oila ko Mian Bisa mo lapamo dondiikene doi namian. Naiya beena manganggaan doi kita baikon ko Mian Bisa naikon sodiiyo kona mian. Ngginaal ko Mian Bisa sabab nababasalan!
Paulus nasambeang
15Tobikon doiya, salataa yaku lengele baikon komuyu manganggaamo doi Yesus, tukon komuyu seseangemo sasaibino ko Mian Bisa namian, 16yaku aki nabontol-bontol daku mopolonggonan kinatauwan doi Mian Bisa tentang komuyu. Sidutu yaku bantile kosambumu doi kusambeangan. 17Yaku kabiyo sulano ko Mian Bisa nda Temeneno Yesus Kristus, Tama mo babasal, nabeena Roh doi komuyu. Dorohdoo tealikene komuyu pandoi, tukon naikon okitakene doi komuyu ko Mian Bisa tobikon komuyu tingoniiyo Yana. 18Yaku kabiyo doi Mian Bisa sulano nabukayo kopoo pikilan nateali madialan; sulano komuyu pomangalatikene oila komo moola komuyu moinikene doi Mian Bisa mo uangemo komuyu. Koidan sulano komuyu potoiyo bulaando kona badaangan kobalakaat-balakaat mo monondok Mian Bisa mo sadiakene doi namian; 19tukon bulaando kona hebatan ko Mian Bisa moono tukon kuasa doi kita mo mangangga. Mian Bisa nakuasadoo pokakana buno kuasa mobolikon langge, 20#Sad. 110:1 mo pakeyo salataa naotuboiyano koidan Kristus doi namatean tukon beena basambuan motatandak podungoli tukon Mian Bisa doi surgaa.
21Kristus nabasambuan lobian tatandak tuuno doi sasaibino kopamarenta nabasambuan, sasaibino koponguasa, sasaibino kokatua, sasaibino kotuan-tuan tukon mau indee komiano koidan komo lapamo binee sambu motatandak; mau mo tubo naiya loonu nia mau mo tubo doi lounu mo lubat. 22#Sad. 8:6 #Kol. 1:18 Mian Bisa abese doi bilit sasaibino doi Kristus nakakuasaan, tukon beekene Kristus doi jemaat teali kapala doi sasaibino kolangge. 23Jemaat doiyamo Kristus butongo, Yana komo kindendeke mo kindendeke sasaibino kolangge doi yayaamo koidan.
Currently Selected:
EFESUS 1: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
