GALATIA 4
4
1-2Bai palaluu yaku tegaskanggene: namalumbitan meeng komian pangalus daano mongula, ano komian mo dagaiyo tukon uluse kona kopontingan-kopontingan polong yana laate kotamano natantukanano koumur. Yana binunokon pokakana buno meeng koata, mau kai kona kanaan yana kotumbuno doi sasaibino do buatoo. 3Bunomo koidan tukon kita: Daano malumbit akiyoon natobos, kita kinubai ata doi roh-roh mo kuasaiyo nadunia nia. 4Bai doi oloyo mo tantu, Mian Bisa bintekene Na Pau doi dunia. Na Paudoo sinuung doi meeng koboine motubo doi ukum agama lalomo nakakuasaan. 5#Rm. 8:15-17 Tukon buno doiya Yana sobiiyo komian badaang mo tubo doi bilit ukum agama nakakuasaan; sulano kita moola teali Mian Bisa napau-pau.
6Sabab komuyu daano Mian Bisa napau-pau, Mian Bisa sumboliiyo Na Pau na Roh usok doi Utus noano lalomo tukon doi noanggu, doiyamo Roh monggeleamon, “Tama, ya Tamanggu.” 7Jadi, komuyu bolikono ata, baimo pau. Tukon sabab komuyu Mian Bisa napau, maka Mian Bisa naikon beekene doikoo sasaibino Kona sinadiakon tuuk Na pau-pau.
Paulus namatakutanamo ko Galatia mian-miano
8Looluk komuyu akipo tingoniiyo ko Mian Bisa, doiya kosababpo komuyu teali ata doi kuasa-kuasa mo pinookakanakon buno ilah, bai kona bisaan bolikon Mian Bisa. 9Bai diabudodoo komuyu tingoniiyomo ko Mian Bisa, kabai lobian komo bisa koidan, Mian Bisa tingoniiyo komuyu. Nah, bulaando komuyu yase abali koidan doi roh-roh dunia nia, mo muyuk tukon talalais? Bulaando komuyu yase kinubai ata koidan doi roh-rohdoo? 10Komuyu lamekene kooloyo-oloyo motantu, bituwon-bituwon motantu, taun-taun motantu. 11Yaku molili, inai-inai daku pakadakan motuuk doi komuyu akiyo kona totuuk.
12Utus-utus! Yaku kabiyo tukon tutuu sulano komuyu teali buno yaku. Sabab yaku koidan lapamo teali buno komuyu. Komuyu aki pokubaiyo komeeng kolobo mo sala doi yaku. 13Komuyu tantu daano moneneeke oila mo tealikene yaku doi tumbeno babilitakene ko Bilita Monondokoo doikoo. Kosababpo doiyamo yaku masakit. 14Doi tempodoo komuyu aki pomisikit doi yaku, mau kai butonggu nandondoong buno palasobaan mo babasal doikoo. Mala komuyu talimayo yaku buno talimayo Mian Bisa namalaekat kabai buno mantalima Kristus Yesus susuungo. 15Komuyu monondok tuuno doi tempodoo. Bai diabudodoo, inaandomo kai do monondokanoo? Yaku toiyo baikon doi tempodoo komuyu moloyos motuake komatamu susuumuyu tuuk mobeekene doi yaku, kalu koiya moola kinubai. 16Oila komuyu diabudodoo lapamo anggape yaku buno musu, sabab yaku nyatakanggene komo kana doikoo?
17Mian badaang bailonggon tukon kokobukuan tuuno unggoliiyo komuyu, bai yanila namakisuut aki namonondok. Yanila tongo yase betele mupotaamian tukon kami, sulano komuyu loolainge yanila tukon kakabukuan tuuno. 18Takainomo monondok tukon kokobukuanan doi langge-langge mo monondok, asal sidutu buno doiya tukon inai tongo kalu yaku daano mopolaing-laing tukon komuyu. 19Daku pau-pau sinoyang! Yaku diabudodoo nia susa koidan sabab komuyu. Yaku susa buno meeng koboloki mosakisaa doi tempo namosuungan pau. Yaku naikon banggadudul susa, kalu Kristus ndondoongo akiyoon natangabos doi butomu! 20Yaku poloon tuuno daano doi tanga-tanga komuyu diabudodoo, sulano yaku moola basilingan doikoo tukon lalo bailon, sabab yaku akimo kutoiyo yase kubaiyo oila koidan tukon komuyu!
Hagar tukon Sarah teali contoh
21Utus-utus mo yase tubo doi ukum-ukum agama nakakuasaan, soba ndongoliiyo yaku! Yaku naikon popitoikene doikoo oila komo bisa totulis doi Kitab Ukum Musa lalomo. 22#Tea. 16:15, 21:2 Idoo totulis baikon Abraham daano kolua komian kona pau: Paudoo meeng tinano daano meeng mian ata, tukon paudoo bailon tinano daano meeng komian mo bebas. 23Pau doi boine mo Teai ata suunge biasa sabab banggapi namongiasan. Bai pau doi boine mo bebas, sinuung sabab Mian Bisa tetebaikenemo. 24Naiya moola pinake buno andean. Lua komian boinedoo daano andean lua koteteba: komeeng kona luwean doi Bunggul Sinai – doiyamo Hagar; kona pau-pau sinuung teali ata. 25Jadi, Hagar doiyamo Bunggul Sinai, doi lipu Arab. Yana inumpamakon kota Yerusalem tukon sasaibino kopodungolino diabudodoo nia lapamo teali ata. 26Bai Yerusalem doi surgaadoo daano Yerusalem mo bebas, tukon yanamo kotinanggita. 27#Yes. 54:1 Sabab doi Kitab Moliyous lalomo totulis,
“Labamo ikoo koboine komba, mo aki namosuung!
Potetedeso tukon pokokuweiso he ikoo mo aki idan meneemi malalasan mosuungan!
Sabab boine nalangkai mo tinggale naikon malaat lobian badaang kona pau,
maka baino doi boine mo tubo tukon nalangkai.”
28Utus-utus! Komuyu susuungo daano Mian Bisa napau-pau mo sinuung sabab Mian Bisa nateteba; komuyu pokakana buno Ishak. 29#Tea. 21:9 Doiya kotempono pau mo sinuung loloiyo kobanggapi namongiasan, lokis-lokise kopau nasinuungan sabab Mian Bisa Na Roh namongiasan. Bunomo koidan budodoiya. 30#Tea. 21:10 Bai oila komo totulis doi Kitab Moliyous lalomo? Idoo totulis buno naiya: “Siikayo ata boinedoo tukon napau, sabab pau doi ata boinedoo aki naikon Teai mian moano kona haak tukon pau doi boine mobebasoo.” 31Jadi, Utus-utus, kita nia mobolikon pau-pau doi meeng koata boine; kita daano pau-pau doi boine bebas.
Currently Selected:
GALATIA 4: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
