GALATIA 3
3
Ukum agama kabai manganggaan doi Kristus
1Utus-utus Galatia miano! Komuyu bisamo molongas! Kabai komuyu lapamo kanakon budukan indee? Kristus namatean sinempang lapamo yaku talakanggene tukon tontong doikoo! 2Soba pobotiikanaku meeng nalangge nia: Oila komuyu lapamo mantalima Mian Bisa Na Roh sabab ampakonggene koukum agama, kabai sabab komuyu molongol Bilita Monondok doi Mian Bisa tukon mangangga doi Kristus? 3Bulaando komuyu buno longas! Komuyu lapamo atambuune kotuboan boolu tukon Mian Bisa Na Roh, bulaando diabudodoo komuyu yase molaate kona monondokan tukon mubukuanan susuumu? 4Palasuma kai sasaibino mo lapamo komuyu motoupiyodoo? Bulaando kai mopalasuma! 5Mian Bisa beekene Na Roh doikoo tukon kubaiyo komo minasaingdinggon-minasaingdinggon doi antara komuyu. Oilamo Mian Bisa kubaiyo koiya sabab komuyu ampakonggene koukum agama kabai sabab komuyu molongol Bilita Monondokoo tukon mangangga doi Kristus?
6 #
Tea. 15:6; Rm. 4:3 Doiya pokakana buno mo totulis doi Kitab Moliyous lalomo tentang Abraham – buno naiya, “Abraham mangangga doi Mian Bisa, tukon sabab namanganggaanoo yana Mian Bisa talimayo buno mian mo sanaanggene ko Mian Bisa noano.” 7#Rm. 4:16 Jadi tobikon doiya komuyu sadaliyo baikon mian mo bisa-bisa Abraham nakatulunan daano mian mo mangangga doi Mian Bisa. 8#Tea. 12:3 Kitab Moliyous tumbe-tumbeno lapamo kitayo baikon Mian Bisa daanokene mian badaang mobolikon Yahudi abali pokindok tukon Mian Bisa, kalu yanila mangangga doi Yana. Bilita Monondokoo loolukonoo pinopitoikon doi Abraham naiya janji nia lalomo, “Lolo doikoo, Mian Bisa naikon balakaatiyo sasaibino kobanggapi nai dunia nia bungguno.” 9Abraham anggayo, maka yana binalakaati. Bunomo koidan sasaibino komian mo mangangga, naikon binalakaati polaing-laing Abraham.
10 #
Kua. 27:26
Mian badaang mo moini doi ukum agama, sasaibino tubo kinutuk, sabab doi Kitab Moliyous totulis, “Mian mo aki namolole ampakonggene sasaibino komo totulis doi Buku Ukum Agama lalomo, Mian Bisa kutuke!” 11#Hab. 2:4 Akiyo meeng komian mo pokindok tukon Mian Bisa sabab mangambakonggon ukum agama. Langgedoo lapamo inokitakon doi Kitab Moliyous lalomo, “Tongo mian mo mangangga doi Mian Bisa tobikon kona potaamian tukon Mian Bisa abali teali monondok, naikon tubo!” 12#Basam. 18:5 Bai ukum agama aki naberdasarkan manganggaan. Doi Kitab Moliyous lalomo totulis baikon mian mo ampakonggene koukum agama, naikon tubo sabab ukumoo.
13 #
Kua. 21:23
Bai Kristus sobiiyo kita doi ukum agama nakutuk. Yana kubaiyo tukon sodiikene kobutongo nakinutuk sabab kita. Sabab doi Kitab Moliyous lalomo totulis, “Kinutuk komian mo mate motinude doi kayung batango.” 14Kristus kubaiyo doiya sulano balakaat mo Mian Bisa tetebaikene doi Abraham bineekon koidan doi mian badaang mobolikon Yahudi. Tukon buno doiya kita mo mangangga doi Mian Bisa, mantalima Roh mo tinetebaikon doi Mian Bisadoo.
Ukum agama kabai Mian Bisa nateteba
15Utus-utus! Namonondokan yaku mangala contoh doi pangalaman samba kooloyo. Kalu mian mokubaiyo meeng poboiyan teteba tukon tetebadoo lapamo sinatujui, maka akiyo komeeng komian momoola akiyenggene perjanjianoo, kabai suungiyo lobo meeng doi yana. 16#Tea. 12:7 Mian Bisa naperjanjian-perjanjian kinubai luwedoi Mian Bisa tuuk doi Abraham tukon tuuk mian batulunanggene Abraham. Doi Kitab Moliyous lalomo aki natotulis “tukon tuuk doi mian badaang mobatulunanggene Abraham”, koalatino badaang komian. Komo totulis idoo daano “tukon tuuk mian mobatulunanggene ikoo”, koalatino tongo meeng komian, doiyamo Kristus. 17#Tob. 12:40 Komo kabi yaku bantile dimbaa doiyamo naiya: Mian Bisa naperjanjian lapamo kinubai tukon sinatujuimo. Ukum agama mo bineekon 430 kotaun doibundu aki namoola inakiyonggon persetujuan tukon nainapusan Mian Bisa naperjanjianoo. 18#Rm. 4:14 Sabab kalu Mian Bisa nabineekon tokooton doi ukum agama, maka doiya bolikon perjanjian mo bineekon. Tobikon sabab Mian Bisa lapamo janjikene doi Abraham, maka Mian Bisa beekene doi yana.
19Kalu buno doiya, tuuk oila ukum agama mobineekon? Potimbilino doiyamo baikon ukumoo sinuungikon tuuk tudoikene kobanggapi napalanggalan. Ukum agamadoo inapakonggon tongo polong nalubatan meeng komian mobatulunanggene Abraham mo sinombuikon doi Mian Bisa naperjanjian doi Abraham. Ukum agamadoo malaekat-malaekat komo pelenggene tukon mololo doi meeng kobanggapi. 20Jadi, sio nadaano lua kotambuuno komian, sodo palaluu meeng komian pangantara. Bai Mian Bisa aki napalaluu pangantara, sabab Yana susuungo tindokiiyo.
Ukum agama napontiingan
21Oila doiya koalatino baikon ukum agama posasala tukon Mian Bisa nateteba? Tantu aki! Sabab kalu ukum agama bineekon tuuk mobeekon tuboan doi banggapi, maka kobanggapi moola pokindok tukon Mian Bisa mololoi ukum agama. 22Bai doi Kitab Moliyous lalomo totulis baikon sasaibino kobanggapi daanomo doi lalim nakuasa. Tobikon doiya, mo bineekon tinetebaikono kona dasar mangangga doi Yesus Kristus bineekon doi yanila mo mangangga.
23Akiyoon nalaate kotempono tuuk mangangga doi Kristus, kita dinagai tuuno doi ukum agama; kita buno kinulung polong manganggaanoo inokitakonggon. 24Tukon buno doiya, ukum agama teali buno padagai kita, polong Kristus lubat tuuk abali pokindokikene monondok tukon Mian Bisa sabab kita mangangga doi Kristus. 25Diabudodoo, sabab laatemo kotempono banggapi moola mangangga doi Kristus, maka kita akimo koidan dinagai ukum agama.
26Sabab komuyu mangangga doi Kristus Yesus, maka komuyu pomeenggon tukon Yana; tukon tobikon doiya komuyu teali Mian Bisa napau-pau. 27Komuyu sasaibino lapamo sinau paisu salani sabab Kristus sambuno, jadi komuyu lapamo mantalima doi butomuyu Kristus susuungo nandondoong. 28Naiya langge nia akimo kai dinaanokon koposasalaan antara Yahudi miano tukon mian mobolikon Yahudi, antara ata tukon mian mobebas, antara mala-malane tukon boine. Utus sasaibino meeng sabab Kristus Yesus. 29#Rm. 4:13 Kalu komuyu Kristus koona, maka komuyu daano batulunanggene Abraham. Tukon komuyu naikon mantalima oila ko Mian Bisa natinetebaikon.
Currently Selected:
GALATIA 3: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
