EFESUS 3
3
Paulus nalimang motuuk doi mian mobolikon Yahudi
1Doiyamo kosababpo yaku, Paulus, tinalunggu tobikon Kristus Yesus motuuk kopontingan komuyu mo bolikon Yahudi. 2Tantu komuyu lapamo lengele baikon ko Mian Bisa, sabab namonondokan konoano, lapamo beekene doi yaku nalimangia motuuk doi pokopontingan. 3Mian Bisa bantile kona tetel lasiano tukon pailukene doi yaku. (Tentang nalanggenia lapamo kutulise doi babo tukon palus, 4#Kol. 1:26-27 tukon kalu komuyu basayo, komuyu naikon toiyo kolaasiano motuuk doi Kristus buno yaku motoiyomo.) 5Buunia laasiadoo aki nabinontiikon doi banggapi, bai budodoiya ko Mian Bisa Na Roh lapamo bontiikene doi rasul-rasul tukon nanabi-nabi. 6Laasiadoo doiyamo nia: Lolo doi Bilita Monondokoo, mian mobolikon Yahudi moola lasakanggene ko Mian Bisa nabalakaat-balakaat loolukonoo mosinadiakon tolongo tuuk doi Yahudi miano. Mian badaang mobolikon Yahudi tealimo anggota doi butong mo pokakana, tukon tulut mantalima oila komo Mian Bisa janjikenemo lolo doi Kristus Yesus.
7Mian Bisa beena doi yaku kalunia – doiyamo limang – sulano babilitakene ko Bilita Monondokoo. Yaku talimayo kaluniadoo luwedoi Mian Bisa nakuasa mo balimang doi butonggu. 8Doi sasaibino ko Mian Bisa namian, yakumo komo kulokis tuuno. Bai ko Mian Bisa beekene doi yaku kalunia nia: limang babilitakanano doi mian badaang mobolikon Yahudi Bilita Monondok tentang Kristus nakaasaan mo akiyo kona kabusan; 9tukon koidan sulano nalolo doi yaku sasaibino komian toiyo bulaando ko Mian Bisa, Motealikene nadunia nia, kubaiyo kona tetel salataa doi loolukonoo linaasiakon doi dunia. 10Ko Mian Bisa namakisuut doiyamo sulano budodoiya, lolo doi jemaat, sasaibino komo mataani kakuasaan doi dapang toiyo ko Mian Bisa napandoiyan tukon sasaibino kolangge kaliangano. 11Mian Bisa kubaiyo doiya pokokonoi tukon natetel mo posidutukon, mo kinubai tukon lolo doi Kristus Yesus nda Temeneno. 12Tukon mangangga doi Kristus tukon sabal pomeenggon doi Yana, kita binee todanan sulano nda koolaniyo ko Mian Bisa tukon totubo komanganggaan. 13Tobikon doiya: inai matakut oila kolobo kaliangano yaku mo toupiyo tobikon komuyu, sabab sasaibino doiya tuuk doi pomonondokan.
Kristus Naseang
14Tobikon doiyamo yaku sosuba doi Tama salaano. 15Doi yanamo meeng-meeng kopuli doi surgaa tukon doi buta sakean mantalima lenggang mo tangalaas. 16Yaku sambeang boliisi ko Mian Bisa mo babasal napokonoi sulano keenggele konoamu tukon Na Roh. 17Boliisi sabab komuyu mangangga doi Kristus, Kristus dungol doi noamu lalomo, tukon komu tuboan nakinoonggol tukon kinuasai poseangan. 18Yaku sambeang boliisi napolaing-laing sasaibino ko Mian Bisa namian, komuyu moola laate bulaando kona loasan tukon nabulusanan tukon naateanan Kristus naseang, 19kalu tolongo banggapi naakal aki namoola inalati doi naateanan tuuno. Boliisi komuyu potingoniiyo Kristus naseangoo, tobikon komuyu moono tukon Mian Bisa napelibadi mo talakana.
20Tukon Mian Bisa nakuasa mo molole balimang doi butonggita lalomo, Mian Bisa moola kubaiyo lobian odoon kona badaangan doi oila komo moola kita kabiyo kai pikikene. 21Siokai ko Mian Bisa nda kabasale doi jemaat lalomo polong doi nda tulunan, lolo doi Kristus Yesus. Nggaale Mian Bisa sidutu-posidutukon! Amin.
Currently Selected:
EFESUS 3: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
