EFESUS 2
2
Doi matean biyol doi tuboan
1 #
Kol. 2:13
Loolukon komuyu mate secara rohani sabab komuyu daano kopoo lalim tukon komuyu aki poloingiyo ko Mian Bisa naparenta. 2Doiya kosinggatoo komuyu loloiyo kodunia nakabiasaan-kabiasaan; koalatino komuyu molole doi ibiliis nakuasa mobabasal doi dapang, doiyamo roh diabudodoo mo kuasaiyo komian badaang noano mo aki namolole doi Mian Bisa. 3Loolukon kita sasaibino pokakana tukon yanila; kita tubo mololoi banggapi nalenggang kita tukon kubaiyo oila komo pokokonoi kobutonggita tukon nda pikilan. Doiya kosinggatoo kita nia daano mian badaang mo kanakon Mian Bisa nakiniiti koidan, pokakana buno mian bailon.
4Bai babasal tuuno ko Mian Bisa noano namonondokan! Yana bunomo doiya kona seangano kita, 5tobikon doiya kosinggatoo kita daano mate doi rohani sabab nda tumba-tumbakan, yana otuboiyo kita koidan polaing-laing tukon Kristus. Jadi, baimo Mian Bisa namonondokan konoano, Yana salamatene komuyu. 6Sabab kita pomeenggon tukon Kristus Yesus, Mian Bisa otuboiyo kita koidan posinggat-singgat Yana, sulano kita nda bapalenta koidan posinggat-singgat Yana doi surgaa lalomo. 7Mian Bisa kubaiyo buno doiya sulano doi lounu naikon mo lubat, kobanggapi namoola kitayo bulaando ko Mian Bisa namaasi nababasalan. Mian Bisa okitakene luwedoi noano namonondokan doi kita tukon lolo doi Kristus Yesus. 8-9Mian Bisa seange komuyu, doiyamo kosababpo Yana salamatene komuyu sabab komuyu mangangga doi Yesus. Dopoo salamatannoo bolikon pousaha susuumuyu. Doiya daano Mian Bisa nakalunia. Jadi, akiyo komeeng komian mo moola babanggaalkene kobutongo doi langgedoo. 10Kita nia Mian Bisa komo tealikene, tukon lolo doi Kristus Yesus, Mian Bisa kabiyo kita sulano nda kubaiyo kolangge-langge mo monondok mo lapamo sadiakene motuuk doi kita.
Kita meeng doi Kristus
11Utus-utus mo bolikon Yahudi miano! Poneneeke kopoo ndondoong doi loolukonoo: Komuyu binantil “mian moaki nabasunat”, doi Yahudi miano mo akuiyo kobutongo sinunat (komakisuuto mo lapamo malaat paloosan banggapi mo kubaiyo doi yanila butongo). 12Doiya kosinggatoo komuyu akipo pomeenggon tukon Kristus, komuyu daano mian molubat-lubaton mo aki natongusokon Mian Bisa namian linilik. Komuyu aki potongusokon doi Mian Bisa tukon namian mo kubaiyomo kona perjanjian. Komuyu tubo doi dunia nia lalomo akiyo kopoo moinian tukon akiyo kopoo Mian Bisa. 13Bai budodoiya, sabab komuyu pomeenggono tukon Kristus Yesus, loolukonoo komuyu mododoon, lapamo linoolanikon doi Kristus namatean. 14Sabab Kristus susuungo yanamo komo podamekene kita. Yana pomeenggene ko Yahudi miano badaang tukon mian badaang mobolikon Yahudi teali meeng kobangsa. Mesel popitaso doi yanila, doiyamo pomusuan, lapamo Kristus manase tukon butongo susuungo nainakatean. 15#Kol. 2:14 Agama Yahudi naukum tukon parenta-parenta tukon atulan-atulanoo lapamo Kristus akiyenggene sulano do bangsadoo molua teali meeng kobangsa banggapi moboolu, mo pomeenggon tukon Yana. Tukon doiya kokubaidoo Kristus daanokene kopodamean. 16#Kol. 1:20 Namateanoo doi kayung sempang, Kristus pomeenggono do bangsadoo molua, tukon podamekene yanila tukon Mian Bisa, tobikon akiyono do pomusuanoo. 17#Yes. 57:19 Doiyamo kosababpo Kristus lubat babilitakene ko Bilita Monondok tentang podameanoo doikoo; mau doi komuyu mobolikon Yahudi miano loolukon mo dodoon doi Mian Bisa, mau Yahudi miano mo pokolanikon tukon Mian Bisa. 18Tukon lolo doi Kristus, kita sasaibino – mau Yahudi miano mau mobolikon yahudi miano – doi Mian Bisa Na Roh mo meeng, moola koolaniyo ko Tama moinodotii.
19Tobikon doiya, komuyu koidan bolikono tongusokon mian molubat-lubaton kabai mian doi tonggulung. Komuyu budodoiya daanoon polaing-laing Mian Bisa namian. Komuyu teali Mian Bisa puli-pulino. 20Komuyu kai kinokondong doi rasul-rasul nabatudangan bunggono tukon nabi-nabi mo abese, tukon Kristus Yesus buno batu mo utama. 21Yanamo komo susune sasaibino do bangunanoo teali Mian Bisa Nabonua mo tangalaas tuuk doi Temeneno. 22Sabab tuboan pomeenggon tukon Kristus, komuyu koidan daano mobinangun posinggat tukon mian badaang bailon teali meeng kobonua motuuk doi Mian Bisa; idoo Mian Bisa dungol tukon Na Roh.
Currently Selected:
EFESUS 2: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
