KOLOSE 3
3
1 #
Sad. 110:1
Komuyu lapamo inotuboi koidan posinggat-singgat Kristus. Tobikon doiya komuyu sio pomoumbolii sulano pomalaat langge doi surgaa, inaando Kristus tukon Mian Bisa namaparentaan posinggat-singgat. 2Arahkanggene komu pikiran doi langge-langgedoo, inai nabaino langge doi dunia nia. 3Sabab komuyu lapamo mate, tukon komu tuboan tosookon polaing Kristus doi Mian Bisa. 4Eh, tuboan uuno mo bisa doiyamo doi Kristus tukon kalu Yana tokita naikon komuyu koidan tokita polaing-laing tukon Yana doi Nababasalan lalomo!
Tuboan malimbito tukon tuboan mo boolu
5Tobikon doiya, akiyenggene kodunia naminooton-minooton mo otuwenge kobutomu, buno balolowaan, lobo mo aki namonondok, noano lokis, naminooton lokis, tukon modokoan (sabab komodokoan doiya pokakana tukon bapilogotan.) 6Langge-langge mobuno doiya komo lubatene ko Mian Bisa nanggimalan doi mian-mian mo aki naloingiyo. 7Loolukon mau komuyu loloiyo komo minooton-minootonoo, singgatoo komuyu modaano kinuasai.
8Bai budodoiya siokai komuyu aisene kolangge mo lokis doi butomu: inaimo koidan moliit, kai nggimal kai mosikitene komian bailon. Aki namoola tobuat doi suumu kobantilan-bantilan masangolan kai bantilan mo manggilit. 9#Ef. 4:22 Inai mobakokolii meeng tukon bailon, sabab kotuboan loolukoo tukon sasaibino kolangge lapamo komuyu tinggale. 10#Tea. 1:26; Ef. 4:24 Komuyu budodoiya lapamo binee tuboan mo boolu. Komuyu daanokai banggapi boolu, mo daano kiniboolu momeenggon doi motealikene, doiyamo Mian Bisa, pokakana koduduso susuungo. Kona makisuut doiyamo sulano komuyu tingoniiyo ko Mian Bisa tukon tontong. 11Buno kolimbako doiyamo lapus sasaibino kona posasalaan ko Yahudi miano tukon mobolikon Yahudi, mian mobasunat tukon mian mo aki nabasunat, akimo nadaano koidan naposasalaan komian molulubaton tukon mian lokis, antara ata tukon mian mobebas, sabab Kristus daano sasaibino kolangge-langge tukon Yana pomeenggon yanila sasaibino!
12 #
Ef. 4:2
Utus daano Mian Bisa namian. Mian Bisa mamaasikene komuyu tukon piliyo komuyu sulano nateali namian mo tangalaas. Doiyamo kosababpo komuyu sio pookitakene kopoo seang, komuyu sio pomonondok konoamuyu, aki nabingkate kobutongo, matalamuyuk tukon yase sakisaa. 13#Ef. 4:32 Komuyu sio posabar doi meeng tukon bailon, tukon sio po poompuni kalu daano komo mangabos noa nggimalan doi bailon. Temeneno tukon sanaang konoano ompuniyo komuyu, jadi komuyu sio poyase ompuniyo meeng tukon bailon. 14Tukon komo penting tuuno, doiyamo: Komuyu sio poposeseang sabab do seangoo doiyamo komo pomeenggene Utus-utus sasaibino tobikon nateali talakana. 15Siokai komu mongiasan-mongiasan tinantukon doi pokindokan Kristus mo beekene doi noamu lalomo. Sabab Mian Bisa uange komuyu sulano teali anggota meeng kobutong, sulano komuyu tubo doi pokindokanoo lalomo moluwedoi Kristusoo. Siokai komuyu pobakinatauwan. 16#Ef. 5:19-20 Siokai doi Kristus naotunggul-otunggul mo moono balakaat natelem doi noamu lalomo. Sio komuyu pootunggul popobee otinau doi namonondokan. Pomanyanyikene kosadeong tukon nggaa-nggaale tukon lagu-lagu rohani; pomanyanyi tuuk doi Mian Bisa tukon perasaan kinatauwan doi noamu lalomo. 17Sasaibino oila komo komuyu kubaiyo kabai bantilan, siokai doiya posipatene tukon pobantile luwedoi Temeneno Yesus sambuno. Pobakinatauwan doi Mian Bisa Tama tuuk oila Yesus nailakukon doikoo.
Pribadi napotaamian doi tuboan mo boolu lalomo
18 #
Ef. 5:22; 1Ptr. 3:1 Utus-utus mo teali boloki! Potaat doi polangkai, sabab sio nabuno doiya komu kalakuan maka namoola binantil Salani miano.
19 #
Ef. 5:25; 1Ptr. 3:7 Utus-utus mo teali langkai! Seseange komu boloki. Inai monggimoliiyo yanila.
20 #
Ef. 6:1
Labuk-labuk! Daano kopokuwajipan buno meeng ko Salani miano sulano sidutu taat doi tama tina, sabab doiya komo kindendeke ko Mian Bisa noano.
21 #
Ef. 6:4
Utus-utus mo teali tama! Inai posakitiyo kopo pau-pau noano naaki teali liit konoano.
22 #
Ef. 6:5-8
Utus-utus mo teali ata! Doi sasaibino kolangge, siokai komuyu potaat doi mutuan mo doi dunia nia. Inai taat doi yanila tongo doi tempo yanila modaano dagaiyo komuyu, sabab komuyu yase ngginaal. Taatiyo doi yanila tukon noa sanaang, sabab komuyu odotiiyo ko Temeneno. 23Indeemo kolimango bineekon doikoo, siokai komuyu limange tukon tootubo konoamuyu, pokakana buno Temeneno kopolineleani, tukon bolikon tongo banggapi. 24Poneneeke baikon komuyu naikon mantalima tambo doi Temeneno. Oila ko Temeneno nasinadiakon motuuk doi namian, doiyamo kona bineekon doikoo. Sabab dopomajikanoo komuyu moleleaniyo doiya pokakana mo kopoleleaniyani Kristus susuungo. 25#Kua. 10:17; Ef. 6:9 Tukon indee miano komo mongkubai sala, naikon tanggunge kona salaanoo, sabab Temeneno aki napiliyo komian duduso.
Currently Selected:
KOLOSE 3: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
