KOLOSE 2
2
1Yaku yase komuyu potoiyo bulaando daku nggoolaan kakabukuan tuuk doikoo tukon tuuk doi yanila doi Laodekia tukon sasaibino komo aki natingoniiyo yaku secara pribadi. 2Sasaibino naiya yaku kubaiyo sulano yanila konoanoila teali bukuan tukon yanila moola poseseang sulano napomeenggon tuuno. Tukon buno doiya yanila tutuu mangalati tukon anggayo tukon tingoniiyo ko Mian Bisa nalaasia doiyamo Kristus susuungo. 3Kristus komo abese sasaibino kopandoiyan tukon toiyano ko Mian Bisa doi loolukon motosookon.
4Yaku babilitakene naiya sulano komuyu inai poinokolii doi indee komiano koidan konabantilan maamis doikoo. 5Sabab mau kai yaku poodoonggono doi komuyu, potoiyo yaku daano doi komuyudoo. Tukon yaku laba mokitayo komuyu pomeenggon noa tukon moonggol kopoo manganggaan doi Kristus.
Tuboan mo talakana
6Utus-utus lapamo talimayo Yesus Kristus doiyamo Temeneno. Tobikon doiya komuyu sio potubo pomeenggon tukon Yana, 7tukon pomoonggol doi Yana. Komuyu siokai pobangune kopoo tuboan tukon Kristus teali uuno. Siokai komuyu pololokon mangangga doi Kristus, buno oila komo lapamo inotunggukon doi komuyu. Tukon siokai konoamu natoku-tokumbe tukon bantilan kinatauwan.
8Komuyu sio pobada-badagai, inai nadaano komian mo pengaruiyo komuyu tukon banggapi namotoiyan mo akiyo kotakoso, bai tolongo atapayo. Domotoiyan-motoiyanoo aki naluwedoi Kristus, bai tolongo banggapi napandapat tukon luwedoi roh-roh mokuasaiyo kodunia. 9Sabab tootubo ko Mian Bisa butongo daano doi Kristus, doiyamo butongo nabatokitaan buno banggapi. 10Tukon sabab tuboan pomeenggonan tukon Kristus, komuyudoo binee tuboan tuuno. Sabab Kristus daano kapalano doi memeeng koroh moberkuasa tukon mo maparenta.
11Sabab pomeenggon tukon Kristus, komuyu lapamo sinunat, bolikon sunat banggapi mo kubaiyo, bai tukon sunat Kristus mo kubaiyo, mo sodiiyo komuyu doi kuasa lenggang mo baladosa. 12#Rm. 6:4 Sabab singgatoo komuyu posinauwan, komuyu tinadin posinggat-singgat Kristus; tukon basauwanoo mian koidan, komuyu polaing inotuboi koidan posinggat-singgat Kristus sabab komuyu mangangga doi Mian Bisa nakuasa mo lapamo otuboiyo Kristus doi namatean. 13#Ef. 2:1-5 Looluk, komuyu lapamo mate secara rohani sabab komuyu baladosa, tukon sabab komuyu aki posinunat loloiyo koadat. Bai budodoiya Mian Bisa otuboiyo komuyu posinggat-singgat tukon Kristus. Mian Bisa lapamo ompuniyo sasaibino konda lalim, 14#Ef. 2:15 tukon akiyenggene konda surat samea, moano doi kita, mo nggimoliiyo kita tukon sarat-sarat mo babalat. Tukon mosempange dosuratoo doi kayung sempang, Mian Bisa alapuse sasaibino kopakalaakon doi kita. 15Doi kayung sempangoo Kristus kubaiyo sasaibino koroh-roh mo maparenta tukon berkuasa akiyono konapodaya koidan. Doi yaniladoo komian badaang pateekene doi tempo Kristus nasiikaano yanila pokakana komian motinaan salaku tanda Nakomanangan.
16 #
Rm. 14:1-6
Tobikon doiya inai mosodiiyo komian moasalakene komuyu motuuk doi kinaan kai moininum, kai doi oloyo-oloyo kolamekanano kobaagamaan, kai lamekanano kobituwon boolu, kai motuuk doi oloyo Tadean. 17Sasaibino doiya tolongo bayangan doi langge-langgedoo naikon mo lubat, bai kona batokitaan doiya langge-langgedoo doiyamo Kristus! 18Inai posodiiyo kobutomuyu nainolugi doi mian-mian mo kakaadukon kependeyo kobutongo tukon mo sosubaiyo komalaekat-malaekat. Domianoo banggal-banggaal tukon napikiran-pikiran dunia tukon banggal-banggaalkene kona pokita susuungo, 19#Ef. 4:16 tobikon akimo koidan nabataani doi Kristus mo teali kapala. Doi Kristus naloolaingano, sasaibino kobutonggita piniala tukon pinoomeenggon doi lolosuano, tukon tubo lolo doi Mian Bisa namongiasan.
Mate tukon tubo polaing-laing Kristus
20Komuyu lapamo mate polaing-laing Kristus, tukon lapamo sinodii doi roh-roh mo kuasaiyo naiya dunia nia. Eh, bulaando komuyu tubo buno mian mo daano kinuasai doi dunia nia? Bulaando komuyu mololoiyo doi aturan-aturan buno naiya, 21“Inai motaape naiya”, “Inai motamise ndaiya”, “Inai mosinggile naiya”? 22Sasaibino doperaturanoo doiya tuuk doi langge-langge mo pinake bai akiyono kotakoso. Doiya tolongo aturan-aturan tukon otunggul-otunggul banggapi mo kubaiyo. 23Takainomo kona tokitaan do langgedoo monondok, tukon binontiikon sulano komian nasosuba doi malaekat, ekependeyo kobutongo tukon sakisaayo kobutongo; bai sasaibino doiya akiyo kotakoso motaane kobanggapi namoot.
Currently Selected:
KOLOSE 2: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
