RASUL-RASUL SALITANO 9
9
Saulus nabadodoloonan
(Kis. R. 22:6-16, 26:12-18)
1Mau nabuno doiya Saulus banggadudul momeeng yase ancame tukon akateyo Yesus Napololaing-pololaing. Yana ampakon doi mobabasalkene koimam, 2tukon mangkabi surat kuasa sulano naampakon doi Yahudi miano nabonua-bonua kaleda katua-katuano doi Damsyik, sulano kalu yana pososuunggene indaa komian mo mangangga doi Yesus, yana moola lakoyo yanila tukon babayo yanila doi Yerusalem.
3Daanon moompokonio ko Damsyik, salataa koolaniyomo tukon do kotadoo, sosinggot daano komeeng konggilep moluwedoi timbu motalaangiyo doi Saulus. 4Yana tolubang doi buta maka nalengele komeeng koalaloo mobantile doi yana, “Saulus, Saulus! Oila kosababpo ikoo mosakisaayo Yaku?”
5“Indee miano ikoo Tuan?” Saulus napasadai.
Do alaloo timbiliyo, “Yakumo Yesus, ikoo mo sakisaayo. 6Bai budodoiya banguno tukon usoko doi kota. Idoo naikon binotiikon doikoo oila komo sio mukubaiyo.”
7Mian mo malaing-laing Saulus ngginggim tukon yanila akimo namoola bukayo kopai alalo; sabab yanila lengele do alaloo bai akiyo komeeng komian konapo kinita. 8Maka Saulus kokondong tukon bukayo komatano, bai komatano akimo namoola kitayo kooioila koidan. Jadi yanila taaniyo kolimano tukon tatandane yana usok doi Damsyik. 9Tolu kooloyo kona kalumbit yana aki namoola mokita tukon selama doiya yana aki nakaan kai monginum.
10Doi Damsyik daano komeeng kopololaing Temeneno Yesus kosambuno Ananias. Doi napokita lalomo, Temeneno basilingan doi yana. Temeneno bantile, “Ananias!”
Ananias timbiliyo, “Ya, Temeneno.”
11Temeneno bantile, “Ya, ampakono budodoiya. Ampakono doi Yudas nabonua doi Loloon mo Moloyos. Mansadaikene indaa komian mo sinombuikon Saulus kona luwean doi kota Talsus. Doiya mianoo daano mosambeang, 12tukon doi meeng kona pokita lalomo yana kitayo komeeng komalane, kosambuno Ananias, lubat doi yana tukon abese kolimano doi yana sulano yana moola mokita koidan.”
13Ananias timbiliyo, “Temeneno yaku lapamo lengele badaang komian mobasilingan manganai mian nia, utamano manganai namasakisaawan-masakisaawan yana mo lakukanggene doi mumian doi Yerusalem. 14Tukon budodoiya yana lapamo lubat naimbaa tukon kaluasan doi imam-imam kapalano sulano nalakoyo komian sasaibino mo anggayo doi-Koo.”
15Bai Yesus bantile doi Ananias, “Ampakono kai! Sabab Yaku lapamo piliyo yana sulano naleleaniyo Yaku, sulano nababotilanggene tentang Yaku doi bangsa-bangsa bailon mo aki nabalaagama Yahudi tukon doi tomundo-tomundo tukon koidan doi Israel miano. 16Tukon Yaku susuung-Ku naikon tudoikene doi yana sasaibino kosakisaawan mo sio yana natoupiyo sabab Yaku.”
17Maka Ananias ampakono doi bonuadoo tukon abese kolimano doi Saulusoo. “Utus Saulus,” Ananias bantile, “Temeneno Yesus Utus mo kitayo doi loloon tanga salataadoo Utus daano doi sumai, Yanamo komo sumboliiyo yaku lubat sulano Utus namoola mokita koidan tukon Mian Bisa Na Roh mokuasaiyo.” 18Doiya kosinggatoo koidan daano komeeng kolobo mo buno ikan anano toliat doi Saulusoo matano tukon yana moola mokita koidan. Maka yana banguno, maka sinau. 19Tukon sambuno kaan, yana tealimo bukuanan koidan.
Saulus bangotunggul doi Damsyik
Saulus dungol doi Damsyik tukon Yesus Napololaing-pololaing bubula kooloyo kolumbito. 20Yana banggadudul ampakon doi bonua-bonua kaleda tukon tambuuno babotilanggene baikon Yesus doiyamo Mian Bisa Napau.
21Sasaibino komian masainding molengele Saulus. Yanila bantile, “Bolikon kai yana komo doi Yerusalem molapamo akateyo sasaibino komian mo anggayo doi Yesus? Yana lubat naimbaa doiyamo sulano nalakoyo tukon babayo yanila doi imam-imam kapalano!”
22Bai Saulus pololokon bukuan kona pengaruh. Yana bantile kobukutii-bukutii tentang Yesus mominolakon doiyamo baikon ko Tomundo Pasalamat, polong ko Yahudi miano mo dungol doi Damsyik aki namoola bantayo koidan.
23 #
2Kor. 11:32-33
Sambuno lapa moimoiya kooloyo kona kalumbit Yahudi miano pomeenggono sulano napoo akateyo Saulus. 24Bai yanila natetel totoi doi yana. Oloyo popook yanila totooliyo doi kota tataapono babasal sulano akateyo yana. 25Bai doi meeng kopopook, Saulus napololaing-pololaing ndokiiyo yana, maka obulusene doi meeng kobois lalomo lisiyo do kotadoo meselo.
Saulus doi Yerusalem
26Saulus ampakon doi Yerusalem, tukon idoo yana kakaate napototongi tukon Yesus napololaing. Bai yanila matakutene yana, sabab yanila aki naanggayo baikon yana bisa-bisa lapamo teali Yesus napololaing. 27Doibundu Barnabas lubat doi yana, maka babayo yana doi rasul-rasul. Barnabas basalitakene doi yanila bulaando Saulus nakitaano Yesus doi loloon tanga tukon bulaando Yesus nabasilinganan doi yana. Barnabas pailukene koidan tentang bulaando Saulus nabaranian bangotunggul doi Damsyik tukon Yesus sambuno. 28Maka doiya Saulus dungolo tukon yanila, tukon barani bangotunggul doi posaapon ko Yerusalem tukon Yesus sambuno. 29Yana basalita tukon ponggeeleki tukon Yahudi miano mo basilingan Yunani, bai yanila kakaate moakateyo yana. 30Salataa mian mangangga bailon toiyomo tentang do langgedoo, yanila babayomo Saulus doi Kaisarea, doibundu yanila kapatuwo yana doi Tarsus.
31Maka kojemaat doi posaapon ko Yudea, Galilea, tukon Samaria tealimo aman. Mian Bisa Na Roh tombonio, tukon matakutene ko Temeneno, jemaat-jemaatoo tosuungi bukuan tukon tosuungi badaang.
Petrus doi Lida tukon doi Yope
32Petrus ampakono doi yayaamo kokampung molubotiiyo kojemaat-jemaat. Daano kooloyo meeng yana lubotiiyo ko Temeneno namian mo dungol doi Lida. 33Indaa yana pososuung tukon meeng komala-malane kosambuno Eneas, molapit tukon akimo nabangun-bangun doi namooloan alumo kotaun kona kalumbit. 34Petrus bantile doi Eneas, “Eneas, Yesus Kristus tangalinggenemo ikoo. Banguno tukon tulolosiyo komu mooloan.” Sambuno buno doiya Eneas banguno. 35Sasaibino komian doi Lida tukon Salon kitayo Eneas, maka yanila manganggamo doi Yesus.
36Doi Yope daano komeeng koboine kosambuno Tabita. Yana meeng komian mo anggayo Yesus. (Kosambuno doi silingan Yunani lalomo doiyamo Dorkas koalatino donga.) Yana sidutu kai kubaiyo kolangge-langge mo monondok tukon tulungiyo komian motalalais. 37Doiya kosinggatoo yana masakit polaing mate. Sambuno sinau kobajano, yana inabos doi kombiang babo. 38Kampung Yope aki natodudul pododoonggon tukon kampung Lida. Jadi doiya singgatoo Yesus napololaing-pololaing modaano doi Yope ndongoliiyo Petrus modaano doi Lida, yanila mosumbolii lua komian moampakon doi Petrus tukon nateteba nia, “Mosobit-sobit lubat doi sumai.” 39Petrus banggadudul bangun tukon malaingo yanila. Sambuno polong indaa, yana binabamo doi kombiang babo. Sasaibino kobalu idoo tokuuniyomo Petrus maka kokiil tukon otudoikene doi yana kalambi-kalambi tukon jubah-jubah Dorkas mo koitikene doi yanila singgatoo yana daanoon motubo. 40Petrus sumboliiyo yanila sasaibino motobuat, maka yana ladanggene kotuulo tukon sambeang. Sambuno lapa doiya yana sasalaane Dorkas bajano tukon bantile, “Tabita, bangun!” Maka Dorkas bukayo komatano, tukon salataa yana kitayo Petrus, yana osulango. 41Maka Petrus taaniyo kolimano tukon tomboniiyo yana nakokondong. Doibundu Petrus uangemo domianoo momangangga idoo posinggat-singgat tukon do balu-baludoo, maka yana salakanggene doi Dorkas mo lapamo tubodoo doi yanila. 42Bilita tentang do kadadianoo tololongol doi posaapon ko Yope, tobikon badaang komian momangangga doi Yesus mobuno Tomundo Pasalamat doi yanila. 43Petrus dungol idoo moimoiya kooloyo koidan doi meeng komian pangala kayung kulito nabonua kosambuno Simon.
Currently Selected:
RASUL-RASUL SALITANO 9: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
