RASUL-RASUL SALITANO 8
8
1Tukon Saulus bai sanaang konoano doi Stepanus nainakateaanoo.
Saulus sakisaayo kojemaat
Doi oloyodoo koidan koanggota jemaat doi Yerusalem tambuuno binuluk-buluk, tobikon sasaibino komian momangangga, alaasene korasul-rasul, yanila sasabulo doi posaapon kolipu Yudea tukon Samaria. 2Mian mo matakutene ko Mian Bisa tadinemo Stepanus tukon yanila kokiiliyo yana tukon susa tuuno.
3 #
Kis. R. 22:4-5, 26:9-11 Bai Saulus banggadudul mokakaate momanase kojemaat. Yana ampakon doi meeng-meeng kobonua tukon unguwo tobuatene komian momangangga, maka usekene yanila doi talunggu lalomo.
Bilita Monondok moluwedoi Mian Bisa binabotilanggon doi Samaria
4Dopai mian-mianoo momangangga mo lapamo topobandakon babulitakanggene ko Bilita Monondok moluwedoi Mian Bisa doi yayaamo. 5Filipus ampakon doi kota Samaria tukon babilitakene doi mianoo indaa tentang Tomundo Pasalamat Mian Bisa mo perjanjikenemo. 6Salataa dopai mianoo lengele Filipus mobasilingan tukon yanila kitayo kokuasa-kuasa mominasaindinggon Filipus mo kubaiyo, badaang doi yanila komo palatikanggene oila komo Filipus nabinantil. 7Sabab koibiliis lapamo tobuat tukon mangga-manggadede doi mianoo mobadaang mo inusokimo setan. Mian molapit tukon mopepeenggon badaang komo tinangalinggon. 8Maka komian doi Samaria laba-laba tuuno.
9Doi kotadoo daano komeeng komalane kosambuno Simon, mo lapamo moimoiya kotempo kona malumbitan mokubaiyo ko Samaria miano anggayo kona ilimuu motoiyan. Yana bantile doi yanila baikon yana meeng komian mo bolikon langge. 10Maka sasaibino komian doi kotadoo doi sasaibino komasarakat palatikanggene tuuno yana. “Naiya mian nia daano kobukuanan Mian Bisa mototingonii buno ‘Bukuanan Babasaloo,’ ” yanila nabantilano. 11Malumbito tuuno yana nakuasaiyano komian tukon nakakuatan motoiyan, tobikon yanila tutuu mopalatikanggene yana. 12Bai Filipus babotilanggene doi yanila ko Bilita Monondok manganai bulaando ko Mian Bisa naikon Nabaparentaan buno tomundo tukon tentang Yesus Kristus, Tomundodoo Pasalamat. Maka yanila anggayomo naikon kobilita Filipus mo pelenggene, maka yanila sinaumo paisu salani – mau mala-malane mau boine. 13Simon susuungo koidan mangangga. Tukon sambuno sinau paisu salani, yana banggadudul malaingo Filipus. Kuasa-kuasa mominasaindinggon mo teali kubaiyo Simon masa-masainding.
14Rasul-rasul doi Yerusalem longoliyo baikon komian doi Samaria lapamo talimayo ko Mian Bisa nabantilan. Tobikon doiya yanila sumboliiyo Petrus tukon Yohanes ampakon doi Samaria. 15Salataa Petrus tukon Yohanes polong, yanila sambeang tuuk doi Samaria mianoo sulano yanila namalaat Mian Bisa Na Roh, 16sabab ko Mian Bisa Na Roh akiyoon nalubat mokuasaiyo mau nabaino meeng doi yaniladoo; yanila sodo sinau paisu salani luwedoi Yesus sambuno tolong. 17Maka Petrus tukon Yohanes abese kopai limano doi Samariadoo miano; maka yanila mantalimamo Mian Bisa Na Roh.
18Simon kitayo baikon tobikon rasul-rasul limano moinabos doi mianoo, Mian Bisa Na Roh bineekon doi yanila. Tobikon doiya Simon mababa doy doi Petrus tukon Yohanes, 19maka bantile, “Beena doi yaku do kuasadoo koidan sulano kalu kolimanggu inabosikon doi indee komian, maka do mianoo naikon mantalima Mian Bisa Na Roh.”
20Bai Petrus timbiliyo, “Silakamo ikoo tukon komu doy! Ikoo aanggene ko Mian Bisa nabalakaat moola inoli tukon doy? 21Ikoo akiyo komu haak sulano mumalaing doi mai limangia lalomo, sabab konoamu aki namonondok doi Mian Bisa. 22Tobikon doiya otinggalemo komu makisuutoo mo lokis, tukon kabiyo doi Temeneno sulano Yana ompuniyo komu pikilan mo lokisoo! 23Sabab yaku toiyo ikoo moono tukon noa moonas tukon kokulokisan kubaiyo ikoo ata.”
24Maka Simon bantile doi Petrus tukon Yohanes, “Tulungiyo mokabiyo doi Temeneno sulano naakiyo mau meeng kai moluwedoi utus-utus nabinantildoo nateali doi yaku.”
25Sambuno yanila mebee kasaksian tukon babotilanggene ko Temeneno nabantilan, Petrus tukon Yohanes abalimo doi Yerusalem. Tukon doi ampakonan, yanila babotilanggene ko Bilita Monondokoo doi badaang kokampung-kampung doi Samaria.
Filipus tukon meeng kopagawe mobabasal doi Etiopia
26Meeng ko Temeneno namalaekat bantile doi Filipus, “Ayo polenggeto! Poampakono doi lalong taalikon doi loloon mopotaami ko Yerusalem tukon Gaza.” Doiya loloonoo aki nalame. 27-28Maka Filipus tauso. Doiya kosinggatoo daano komeeng kopagawe batomundoan Etiopia mo daano doi ampakonan lalomo mule doi nalipu. Doiya mianoo meeng kopagawe mobabasal mo tanggung jawabpe sasaibino Kandake nabuat, tomundo boine doi Etiopia. Do mianoo lapamo ampakon doi Yerusalem sulano nasambeang doi Mian Bisa tukon budodoiya daano moabali tukon naadalan. Daano yana moosulang doi naadalanoo yana basayo kobuku Nabi Yesaya. 29Mian Bisa Na Roh bantile doi Filipus, “Ampakono koolaniyo ndaiya adalanoo.” 30Maka Filipus ampakon koolaniyo do adalanoo, maka yana lengele do mianoo bacayo kobuku Yesaya. Filipus mansadai doi yana, “Oilakai Tuan mangalatikene doi Tuan nabinasadoo?”
31Do mianoo timbiliyo, “Bulaando daku mangalatian, kalu akiyo komo jelaskanggene doi yaku?” Maka yana tobiyo Filipus doi adalanoo maka osulang polong yana. 32#Yes. 53:7-8 Naiyamo koayat-ayato yana mo basayodoo,
“Yana buno domba mo linako sulano natinembel,
buno domba pauno mo aki nambeekon kalu kobuluno ginunting,
bunomo doiya yana aki nabantile mau nabaino meeng kobantilan.
33Yana tinotulai tukon kinubai tukon aki naadil.
Kona ansaang binubut doi dunia nia bungkukono
tobikon akiyo komeeng komian mo moola basalitakene tentang kona tulunan.”
34Pagawe mobabasal doi Etiopiadoo bantile doi Filipus, “Soba bontiikene doi yaku, indee kona minakisuuti naiya nabi nia? Butongomo kai susuungo kai mian bailon?” 35Maka Filipus tambuuno basilingan; yana pakeyo doiya ayat-ayatoo buno naatambuunano sulano nababotilanggene ko Bilita Monondok tentang Yesus doi pagawe mobabasaloo. 36Doi loloon tanga, yanila polong doi meeng kolipu mo daano kopaisu. Pagawedoo bantile, “Kitayo ndaiya daano kopaisu! Oilamo modaano mokulang koidan sulano musauwo yaku?”
[ 37Filipus bantile, “Kalu Tuan anggayo tukon totubo konoamu, Tuan moola nasinau.”
“Yaku anggayo Yesus Kristus takainomo Mian Bisa Napau,” pagawe babasaloo doi Etiopia nabantilano.]
38Maka yana sumboliiyo kona adalan tade; doibundu yanila luaila, Filipus tukon pagawedoo, obulus doi paisu lalomo tukon Filipus sauwomo yana. 39Sambuno yanila tobuat doi paisudoo, Mian Bisa Na Roh alayomo Filipus luwe idoo. Pagawe babasaloo doi Etiopiadoo akimo nakitayo yana koidan. Tukon nalabaan pagawe babasaloo banggadudulkenemo kona ampakonan. 40Baanggon Filipus daanomo doi Asdod. Tukon salataa yana banggadudulkene kona tausan, yana babilitakene ko Bilita Monondok tentang Yesus doi sasaibino kokota polong yana lubat doi Kaisarea.
Currently Selected:
RASUL-RASUL SALITANO 8: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
