RASUL-RASUL SALITANO 10
10
Petrus tukon Kornelius
1Doi Kaisarea daano komalane meeng kosambuno Kornelius. Yana meeng kokapiteeng “Pasukan Italia”. 2Yana meeng komian mo matakutene ko Mian Bisa tukon sasaibino kopulino taat doi Mian Bisa. Yana badaang kona tulung doi Yahudi miano mo talalais, tukon yana sidutu sambeang doi Mian Bisa. 3Daano kooloyo meeng uga-ugaate batong tolu oloyo yana kitayo tukon tontong doi napokita lalomo, meeng ko Mian Bisa namalaekat molubat tukon uange yana, “Kornelius!”
4Kornelius mbalenge do malaekatoo tukon namatakutan maka bantile, “Daano kooila Tuan?”
Malaekatoo timbiliyo, “Komu sambeang tukon konoamu namonondokan lapamo Mian Bisa talimayo tukon Mian Bisa neneeke ikoo. 5Budodoiya sumboliiyo komian moampakon doi Yope uange Simon, kosambuno natutuuwan tuuno Simon Petrus. 6Yana daano modungol doi meeng komian pangala kayung kulito kosambuno Simon, mo dungol doi tobun bibilo.” 7Sambuno do malaekatoo pobasalitai tukon Korneliusoo ampakono, Kornelius uange kolua komian napeleleani doi bonua tukon meeng koanggota suludadu napengawal mo mangangga. 8Kornelius basalitakene doi yanila oila komo lapamo teali maka sumboliiyo yanila ampakon doi Yope.
9Modoakon kooloyo, yanila daanoon doi napo ampakonan tukon adukono polong doi Yope, Petrus liba doi bonua bunggono sulano nasambeang. 10Yana malaalo tuuno tukon yasemo kaan. Kokinaan sodo nasinidak, yana malaat meeng kopokita. 11Yana kitayo kotimbu motobuka tukon daano komeeng kolangge mobuno toik mo bebelan inulul doi dunia, tokooton doi sangkap kopasuno. 12Doi lalomo talaat sasaibino koiyayon tentang mosangkap koaino, sasaibino kolangge mo tolo-tolondok tukon tomisi mombosolo. 13Maka daano koalalo mobantil doi yana, “Petrus, bangun! Tembeliyomo tukon kaane!”
14Petrus timbiliyo, “Aki, Yesus! Yaku aki kumanaanggene kaane kooioila mo pinatanggon kai najis.” 15Bai do alaloo bantil koidan doi yana, “Oila komo lapamo Mian Bisa bantile moola kinaan, inaimo moaanggene doiya pinatanggon.” 16Pokitadoo abali polong tolu luunggon, doibundu do toikoo tobingkato doi surgaa.
17Petrus pusing mopikikene oila komaanano dona pokitadoo. Petrus daano mopiki-pikikene, dopai mianoo Kornelius mo sumboliiyo lubato doi Simon nabonua tukon yanila daanomo doi tataapon salaano. 18Maka yanila monguang mian tukon mansadai, “Kai diimbaa daano komian mo dungol, kosambuno Simon Petrus?”
19Petrus daano mokakaate natoiyo oilamo komaanano dona pokitadoo, Mian Bisa Na Roh bantile doi yana, “Eh Petrus, daano kotolu komian mounggoliiyo ikoo. 20Ayo mosobit obulus doi bilit tukon inai mosasaaki momalaing yanila, sabab Yakumo komo sumboliiyo yanila.” 21Maka Petrus obulus doi bilit tukon bantile doi mianoo, “Yakumo kai utus-utus nainumbolii. Utus-utus molubat tuuk oila?”
22Yanila timbiliyo, “Kapiteeng Kornelius komo sumboliiyo kami lubat dosumai. Yana meeng komian monondok tukon matakutene ko Mian Bisa, tukon sasaibino ko Yahudi miano odotiiyo yana. Meeng ko Mian Bisa namalaekat sumboliiyo yana nakabiyo Tuan mulubat doi nabonua sabab, doiya buno potimbilino doi nasambeangan, yana sinumbolii momondongolii oila komo Tuan pailukene doi yana.” 23Maka Petrus sumboliiyomo yanila usok sulano nadungol idoo.
Modoakon Petrus banguno tukon ampakono polaing-laing yanila. Moimoiya komian momangangga luwedoi Yope malaing koidan. 24Meeng kooloyo molapadoo yanila polong doi Kaisarea. Indaa yanila lapamo tinotiili Kornelius tukon utus-utuso maka tula-tulano napokilakonan yana mo lapamo uange. 25Salataa Petrus polong, Kornelius ampakon lobotiyo yana tukon sosuba doi salaano. 26Bai Petrus taaniyo tukon ekekendenge yana, maka nabantile, “Banguno! Yaku susuunggu kai banggapi koidan.” 27Daano yana mopobasalitai tukon Kornelius, Petrus usok doi bonua lalomo. Idoo yana kitayo badaang komian molapamo pototongi. 28Maka yana bantile doi yanila, “Utus-utus susuungo toiyo baikon ko Yahudi miano pinantanggon doi napo agama sulano nalubotiiyo kai potoikon tukon mian-mian moluwedoi bangsa bailon. Bai Mian Bisa lapamo otudoikene doi yaku baikon yaku aki namoola aanggene mau indee komiano koidan najis kai pinatanggon. 29Doiyamo kosababpo salataa Tuan kabiyo sulano yaku lubat, yaku aki kukabalatan lubat. Jadi budodoiya yaku yase toiyo bulaando Tuan kabiyo yaku lubat.”
30Kornelius timbiliyo, “Toludoo kooloyo mo lapa, uga-ugaate bunomo doiya kotempono, yaku daano mosambeang doi bonua batong tolu kino-kinobian. Sosinggoton daano komeeng komalane mokokondong doi salaanggu. Do mianoo napakean nggilep-nggilep. 31Yana bantile, ‘Kornelius! Mian Bisa lapamo talimayo komu sambeang tukon neneeke naikon konoamu namonondokan. 32Jadi sumboliiyo komian motaus doi Yope mouange komian meeng kosambuno Simon Petrus. Yana daano momoolo doi meeng komian mobabalukon kayung kulito nabonua kosambuno Simon; do bonuadoo doi tobun bibilo.’ 33Doiyamo kosababpo yaku soisobiton sumboliiyo komian ampakon mouange Tuan. Tukon Tuan bisa-bisa monondok konoano tuuk lubat doisumai. Budodoiya kami sasaibino pototongimo dimbaa doi Mian Bisa salaano sulano mondongolii sasaibino ko Mian Bisa nasinumboliikon Tuan nabantile doi kami.”
Petrus napidato
34 #
Kua. 10:17
Maka Petrus bantile, “Budodoiya yaku bisa-bisa sadaliyo baikon ko Mian Bisa lakukanggene sasaibino komian pokakana. 35Mian mo matakutene ko Mian Bisa tukon mongkubaiyo kolangge mo kana, do mianoo Mian Bisa talimayo, aki napiliyo yana oila komiano. 36Utus-utus lapamo toiyo kobilita antoko ko Mian Bisa mo pelenggene doi bangsa Israel. Bilitadoo doiyamo manganai Bilita Monondok tentang podamean luwedoi Yesus Kristus, doiyamo Temeneno sasaibino komian. 37Komuyu toiyo oila komo lapamo teali doi posaapon ko Yudea, doiyamo tambuun doi Galilea sambuno lapa dobasauwanoo Yohanes mo otunggukene. 38Komuyu toiyo baikon ko Mian Bisa lapamo piliyo Yesus Nasaretoo miano tukon beena doi Yana Mian Bisa Na Roh tukon kuasa. Komuyu toiyo koidan baikon Yesus doo ampakon doi yayaa sulano mongkubai kokubai monondok; Yana tangalinggene sasaibino komian mo inusoki tukon Ibiliis, sabab ko Mian Bisa lolainge Yana. 39Kamimo naiya komian mo lapamo kitayo susuungo sasaibino kolangge-langge Yana mo lakukanggene doi Yahudi miano nalipu tukon doi Yerusalem. Mau kai nabuno doiya bai yanila sempanggene tukon akateyo Yesus. 40Bai doi oloyo kotoluno Mian Bisa otuboiyomo Yana koidan luwedoi namatean tukon okitanggene Yana doi banggapi; 41aki nasasaibino komian, bai tolongo doi kami mo lapamo Mian Bisa piliyo doi loolukoo sulano teali Nasakisii-sakisii: Kami kaan tukon inum tukon Yana sambuno lapa Yana tubo koidan doi namatean. 42Tukon Yana sumboliiyo kami mobabilitakene ko Bilita Monondokoo doi mian tukon mebee kasaksian baikon Yanamo komo biningkat luwe Mian Bisa teali Hakim doi mian mo daanoon motubo tukon komian mo lapamo mate. 43Sasaibino konabi-nabi basalita tentang doi Yana. Yanila bantile baikon sasaibino komian mo mangangga doi Yesus, naikon tinolos kona lalim tukon kakuasaan moluwedoi Yesus.”
Mian mobolikon Yahudi malaat Mian Bisa Na Roh
44Petrus daano mobasalita, Mian Bisa Na Roh obulus tukon kuasaiyo sasaibino komian mo molongol do bilitadoo. 45Yahudi miano mangangga doi Yesus tukon malaing Petrus doi Yope, sasaibino masainding mokitayo ko Mian Bisa mobeena koidan Na Roh doi bangsa bailon mo bolikon Yahudi. 46Sabab yanila ndongoliiyo dopai mianoo mobasalitamo tukon moimoiya kosilingan tentang tukon nggaa-nggaale kona babasalan ko Mian Bisa. Maka Petrus bantile, 47“Soba kitayo, naiya pai mian nia lapamo malaat Mian Bisa Na Roh bunomo kita. Jadi moola kai komian mosemba-sembange yanila sulano nasinau tukon paisu?” 48Maka Petrus sumboliiyo yanila nasinau luwe Yesus Kristus sambuno. Lapamo doiya yanila kabiyo, sulano Petrus nadungol tukon yanila moimoiya kooloyo kona kalumbit.
Currently Selected:
RASUL-RASUL SALITANO 10: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
