RASUL-RASUL SALITANO 23
23
1Paulus sumboliiyo dopai anggota-anggotadoo pangadilan agama maka nabantile, “Utus-utusonggu! Polong doi oloyo nia yaku aki kulasaiyo mosala doi Mian Bisa doi noanggu lalomo manganai daku tuboan.” 2Sambuno Paulus bantile buno doiya, Imam Babasal Ananias mobintokon mian komo kokondong doi Paulus lisuko taalikon motapiyo Paulus babano. 3#Mat. 23:27-28 Maka Paulus bantile doi imam babasaloo, “Mian Bisa pasti tapiyo ikoo, mian mo kakadukon moliyous! Ikoo osulang indokon palesayo yaku menurut Musa naaturan, padahal ikoo susuumu lumbaiyo do aturanoo tukon mobintokon mian motapiyo yaku!”
4Dopai mian badaangoo doi Paulus lisuko taikon bantile doi Paulus, “Ikoo totulaiyo ko Mian Bisa naimam babasal!” 5#Tob. 22:28 Paulus timbiliyo, “Oh, yaku aki kutoiyo, Utus-utus, baikon yana imam mobabasal. Takainomo doi Kitab Moliyous lalomo daano mototulis, ‘Inaikai ikoo mototulaiyo komo katuaiyo mubangsa.’ ”
6 #
Kis. R. 26:5; Flp. 3:5 Paulus kitayo baikon kosoobos dopai anggota-anggota pangadilan agamadoo daano ko Saduki miano tukon kosongobos koidan daano ko Parisi miano. Tobikon doiya yana bantile doi pangadilan agamadoo, “Utus-utus! Yaku meeng ko Parisi miano, katurunan Parisi. Yaku pinalesa dimbaa sabab yaku anggayo baikon komian mate naikon tubo koidan.” 7Salataa yana bantile buno doiya, dopai Parisi miano tukon Saduki miano yanila mulaimo ponggeeleki, sampe do lapatoo nggabut teali lua kotambuno. ( 8#Mat. 22:23; Mrk. 12:18; Luk. 20:27 Sabab ko Saduki miano pikikene baikon komian momate akimo natubo koidan, sabab komalaekat akiyo, tukon koroh-roh koidan akiyo; bai ko Parisi miano anggayo naikon kona daanoan sasaibinodoo.) 9Maka sumbuto koponggeelekian mo hebat tuuno. Moimoiya ko Parisi miano mo teali guru agama kokondong tukon tantaange tutuu. Yanila bantile, “Menurut koonggami naiya mian nia akiyo kona sala mau nabaino soisik! Ugaate daano koroh kai malaekat mo basilingan doi yana!”
10Ponggeelekianoo teali hebat sampe do suludadudoo kapalano matakut inai-inaikene Paulus naikon yanila kemele. Jadi yana sumboliiyo kona pasukan ampakon ndokiiyo Paulus doi mianoo mobadaang tanga-tangano tukon babayo yana doi markas.
11Modoakon popook koidan Yesus kokondong doi Paulus bibilo tukon bantile, “Ekeenggele konoamu! Ikoo lapamo mebee komu kasaksian manganai Yaku doi Yerusalem. Ikoo sio mumebee do kasaksianoo doi Roma koidan.”
Pomeenggonan sulano Paulus nainakate
12Modoakon dowa-dowa, ko Yahudi miano mulaimo mongkubai pomeenggonan. Yanila batotopi aki nakaan kai monginum paisu kalu yanila akiyoon napoo akateyo Paulus. 13Daano molobian sangkap kolono komian mo mongkubai do pomeenggonanoo. 14Yanila ampakon doi imam-imam kapalano tukon katua-katua Yahudi maka bantile, “Kami lapamo batotopi posinggat-singgat, aki naikon mai kaan kai monginum oioila kalu kami akiyoon mai akateyo Paulus. 15Jadi, budodoiya Utus-utus tukon anggota-anggota Pangadilan Agama siokai pomakapatu surat motuuk doi suludadudoo Roma kapalano sulano pokabiyo yana nababayo Paulus koidan namangadap doi komuyu, nai-naikon komuyu yase palesayo koidan kona perkara tukon lobian teliti. Tukon kami naikon siap sulano moakateyo yana mau naakiyoon yana napolong naimbaa.”
16Bai Paulus utuso boine napau lengele do tetel napomeenggonanoo. Maka yana ampakon doi markas tukon pailukene doiya langgedoo doi Paulus. 17Paulus maka uange komeeng koperwira tukon bantile doi yana, “Babayomo naiya pau nia doi suludadudoo kapalano; yana yase laporkanggene komeeng kolangge doi yana.” 18Perwiradoo babayo do paudoo doi suludadudoo kapalano tukon bantile, “Paulus domo tinaanoo, uange yaku tukon kabiyo doi yaku sulano kubabayo napau nia doi Tama; yana yase laporkanggene komeeng kolangge.”
19Suludadudoo kapalano taaniyo do paudoo limano, maka babayo dopaudoo susuungo doi sembeleng maka sadaiyo, “Ikoo yase momapailukon oila doi yaku?”
20Do paudoo timbiliyo, “Yahudi miano lapamo pomeenggon sulano kabiyo Tuan nababayo Paulus mangadap doi Pangadilan Agama namodowa, nai-naikon yanila yase palesayo koidan kona ulusan tukon lobian teliti. 21Bai Tuan inaikai motulutikene doi yanila nakakabidoo, sabab daano molobian sangkap kolono komian komo basookon sulano nalakoyo yana doi loloon. Yanila sasaibino lapamo batotopi aki naikon nakaan tukon monginum paisu kalu yanila akiyoon napo akateyo Paulus. Budodoiya kai yanila lapamo basadia; baino mototiili Tuan napotimbili doi yanila.” 22Suludadudoo kapalano bantile, “Inai mobontiikene mau doi inde-indee komiano baikon ikoo molapamo laporkanggene nia doi yaku.” Maka yana sumboliiyomo do paudoo namule.
Paulus kinapatu doi Feliks
23Doibundu do suludadudoo kapalano monguang lua komian kopolwila, maka yana bantile doi yanila, “Sadiyayomo kolua kosakato kosuludadu polaing kopitu kolono kosuludadu molakit adalan tukon lua kosakato kosuludadu momangkanggi kalait sulano napo taus batong sio doi popokia nia koidan doi Kaisarea. 24Masadiakene koidan adalan sulano Paulus nalokitiyo tukon pobabayo yana tukon salamat polong doi Gubernur Feliks.” 25Maka suludadudoo kapalano motulis surat konabantilano buno naiya,
26“Komo Mulia Gubelnul Feliks. Salam moluwedoi Klaudius Lisias! 27Naiya mian nia lapamo linako doi Yahudi miano tukon adukono yanila akateyo, kalu yaku aki kulubat tukon kupasukan tukon moasalamatene yana; sabab yaku lengele baikon yana walga negara Roma. 28Sabab yaku yase toiyo kona bisa-bisaan kokasalaan komo yanila motudukanggene doi yana, maka yaku babayo yana doi Pangadilan Agama. 29Tokita yana aki namongkubai mau nabaino meeng kolangge komo pantas nainukum tukon ukuman mate kai natinalunggu. Tuduhan yanila doi yana tongo napotaamian tukon aturan-aturan agama yanila susuungo. 30Doibundu yaku pinailukonggon baikon daano kotetel lokis moluwedoi Yahudi miano motuuk doi yana. Jadi banggadudul yaku kapatuwo yana doi Tuan Gubernur. Tukon yaku lapamo sumboliiyo kapala ponuduhno babayo yanila napangaduan motuuk doi yana doi Tuan.”
31Maka dopai anggota-anggota suludadudoo ampakonggenemo yanila natugas. Yanila alayo Paulus maka babayo yana do popookoo polong doi Antipatris. 32Modoakon yanila batadikenemo kopasukan molakit adalan banggadudulkene kona ampakonan tukon Paulus, tukon yanila susuungo abalimo doi markas. 33Salataa pasukan molakit adalanoo polong doi Kaisarea, yanila pelenggene do suratoo doi gubernur, maka yanila salakanggene Paulus doi yana. 34Sambuno lapa do gubernuroo mobasayo do suratoo, yana sadaiyo doi Paulus inaando kona luwean. Salataa yana toiyo baikon Paulus kona luwean doi Kilikia, 35yana bantile “Mondoko! Yaku naikon palesayo komu ulusan, kalu naikon komian komo kalaakene ikoo lapamo lubat naimbaa.” Maka yana maparentakene sulano Paulus natinaan doi Herodes nabatomundoan lalomo.
Currently Selected:
RASUL-RASUL SALITANO 23: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
