RASUL-RASUL SALITANO 22
22
1“Tama-tama tukon Utus-utus sasaibino! Yaku lolukene daku belaano kobutonggu doi komuyu. Soba polengele!” 2Salataa yanila lengele Paulus mobasilingan tukon silingan Ibrani, yanila pololokon tenang koidan. Maka Paulus banggadudulkenemo kona katalangan.
3 #
Kis. R. 5:34-39
“Yaku Yahudi miano,” Paulus bantile, “yaku sinuung doi Tarsus doi kabupaten Kilikia, bai yaku babasal doi Yerusalem nia tukon yaku inotunggul mono-monondok doi meeng koguru babasal Gamaliel doi aturan lalomo komo Musa mo beekene doi tumbunggita. Buno pokakana Utus-utus sasaibino naimbaa doi oloyo nia, mau yaku tutuu giat tuuk doi Mian Bisa. 4#Kis. R. 8:3, 26:9-11 Yaku sakisaayo polong mate do pololaing-pololaingoo otunggul booludoo. Yanila sasaibino, mau mala-malane mau boi-boine, yaku lakoyo tukon usekene doi talunggu lalomo. 5Imam babasal susuungo tukon sasaibino komo Pangadilan Agama moola mebee kasaksian baikon yaku aki kukala-kala. Sabab yanilamodoo komo beena yaku surat pangantokon mo inotuuk doi Yahudi miano doi Damsyik. Tukon do suratoo yaku moola momalako indaa komian mo mangangga doi otungguloo, tukon babayo yanila doi Yerusalem sulano nainukum.”
Paulus basalitakene kona pangalaman
(Kis. R. 9:1-19, 26:12-18)
6“Tempodoo yaku daano doi loloon tanga doi kuampakonan tukon adukono polong doi Damsyik, pas suun kooloyo, daano komeeng kolangge laango mo madialan tuuno sosinggoton momotontilang luwedoi timbu potikunggon yaku. 7Yaku tolubang doi buta maka yaku lengele komeeng koalalo mobantile doi yaku, ‘Saulus, Saulus! Bulaando ikoo mosakisaayo Yaku?’ 8Maka yaku mansadai, ‘Indee miano Ikoo, Tuan?’ ‘Yakumo Yesus Nasaret mianodoo ikoo mo sakisaayo,’ kona potimbili. 9Kopai mian mo daano idoo mopolaing-laing yaku yanila kitayo do langgedoo laango, bai yanila aki nalengele doalaloo mo bantil-bantil doi yaku. 10Maka yaku mansadai koidan, ‘Yaku sio kumongkubai oila, Yesus?’ Yesus timbiliyo, ‘Banguno tukon ampakono usok doi Damsyik. Indaa maka nasodo ikoo naikon mubinontiikon manganai sasaibino komo Mian Bisa nainiyas mukubaiyo.’ 11Yaku teali piit sabab do langgedoo laango monggalunge komatanggu. Jadi kotula-tulanggu taaniyo yaku usok doi Damsyik.
12Idoo daano komeeng komian kosambuno Ananias. Yana meeng komian mo mangangga tukon taat moambakonggene Musa naatulan. Sasaibino ko Yahudi miano mo dungol doi Damsyik anggayo tuuno yana. 13Yana lubat mokitayo yaku, maka kokondong doi lisukonggu taalikon tukon bantile, ‘Utus Saulus, siokai ikoo mumokita koidan!’ Tempodoo doiya koidan yaku bangune koolunggu, maka yaku kitayo Yana. 14Doibundu Yana bantile doi yaku, ‘Ko Mian Bisa tumbunggita lapamo piliyo ikoo sulano mutoiyo kona mongiasan, tukon mokita Yesus, Mian Bisa na Ata mo kubaiyo ko Mian Bisa namongiasan tukon lengele Yesus alalo susuungo. 15Ikoo naikon teali sakisii tuuk babilitakanano doi sasaibino komian oila komo lapamo ikoo kitayo tukon lengele. 16Budodoiya inaimo koidan mototiili malu-malumbit. Banguno, tukon beekenemo kobutomu nasinau. Uwang doi Temeneno sulano ikoo muinosodii doi mulalim-lalim.’ ”
Mian Bisa sumboliiyo Paulus nabangotunggul doi mian bailon mo bolikon Yahudi
17“Yaku abali doi Yerusalem, tukon salataa yaku daano mosambeang doi Temeneno Na Bonua, yaku kinuasaimo Mian Bisa Na Roh. 18Yaku kitayo ko Temeneno; Yana bantile doi yaku, ‘Mosobit tinggale ko Yerusalem, sabab komian naimbaa aki naikon natalimayo komu kasaksian tentang Yaku.’ 19Yaku bantile, ‘Yesus, yanila toiyo tuuno baikon yaku lapamo usokiyo kobonua-bonua kaleda sulano kulakoyo yanila tukon nanale komian mo mangangga doi-Koo. 20#Kis. R. 7:58 Bunomo doiya koidan salataa komu sakisii Stepanus nainakatean, yaku susuunggu daano idoo tukon setujuiyo do mangakateanoo. Tukon yakumo komo dagaiyo ko mian-mian mo akateyo yana napakean.’ 21Bai ko Temeneno bantile koidan doi yaku, ‘Ampakono, sabab Yaku naikon bintekene ikoo doi tampat mo odoon doi mian mobolikon Yahudi.’ ”
22Domianoo daano mobanggadudul mondongolii Paulus mobasalita, bai doi nabantilan bindunodoo yanila wookon kakabukuan, “Akateyomo kai komian mo buno koiya. Yana akimo napatas natubo!” 23Doi napowookonan yanila tipasene konapo jubah, tukon koambata kobung doi dapang. 24Maka do suludadu Romadoo kapalano sumboliiyo Paulus nabinaba doi markas sulano yana napinaresa idoo tukon kakalasan sulano natinoi oila kosababpo ko Yahudi miano mowookon buno doiya motuuk doi yana. 25Bai doi tempo Paulus lapamo binoboi sulano nainumbas, Paulus bantile doi perwira mo kokondong idoo, “Oilakai minoolakon nainumbas komian batomundoan Roma kalu akiyoon yana napinalesa?”
26Linongol doiya, perwiradoo ampakono doi suludadudoo kapalano tukon bantilan, “Oila naiya komo naikon Tama lakukanggene? Naiya mian nia warga negara Roma!”
27Maka do suludadudoo kapalano ampakon doi Paulus tukon sadaiyo, “Soba pailukanaku, oilakai ikoo walga negala Roma!”
“Oode,” Paulus bantile, “yaku walga negala Roma.” 28Suludadudoo kapalano bantile koidan, “Yaku teali walga negala Roma tukon mebeal badaang tuuno!”
Paulus timbiliyo, “Bai yaku sinuung salaku walga negala Roma.” 29Tempodoo doiya koidan anggota-anggota suludadu mo yase palesayo Paulusoo, saakon tukon do suludadudoo kapalano teali matakut sabab yana lapamo keete Paulus, banggokai Paulus walga negala Roma.
Paulus doi Pangadilan Agama salaano
30Suludadu Romadoo kapalano yase tuuno motoiyo oila kona tutuuwan komo mangaanikene ko Yahudi miano moasalakene Paulus. Tobikon doiya modoakon yana uange koimam-imam kapalano tukon mobabasakene koagama Yahudi sulano napototongi. Maka Paulus liniato doi nakinootan, doibundu binaba mangadap doi yanila sasaibino.
Currently Selected:
RASUL-RASUL SALITANO 22: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
