RASUL-RASUL SALITANO 24
24
Yahudi miano kalaakene Paulus
1Lima kooloyo doibundu, Imam Babasal Ananias tukon katua-katua Yahudi ampakon doi Kaisarea polaing tukon meeng kopangacara kosambuno Tertulus. Yanila mangadap doi Gubernur Feliks tukon lolukenggene yanila napangaduan motuuk doi Paulus. 2Salataa Tertulus inuang doi muka, yana tuduwo Paulus buno naiya,
“Tuan Gubernur Mo Mulia! Doi Tuan nataaniyano kami komai lipu aman. Tukon luwe Tuan napandoiyan lapamo badaang kopalabaikan komo linaksanakanggon motuuk doi mai bangsa. 3Sasaibino doiya kami talimayo momeenggon tukon mopolonggon kinatauwan tukon pongodotiian mo lobi-lobian doi yaandomo kai koidan. 4Bai sulano inai natangaison badaang Tuan natempo, yaku kabiyo sanaang nalengele komai pangaduan nia mo palus. 5Kami laate naiya mian nia panggalanggabut mo bahaya. Doi yayaandomo yana osumbetene konggalanggabutan doi antara Yahudi miano tukon yana teali kapalano kogelakan Nasaret miano. 6Yana lapamo mosobae mokubaiyo manggilit ko Temeneno Na Bonua. Bai kami lakoyo yana. [Kami makisuutiyo mopalesayo yana menurut mai agama naaturan susuungo. 7Bai suludadudoo kapalano Lisias leleiyo Paulus doi kami, 8tukon parentayo sulano indee komo kalaakene yana namangadap doi Tuan.] Kalu Tuan palesayo naiya mian nia, Tuan susuungo naikon ndongoliiyo luwedoi yana kokobenaran moluwedoi sasaibino komo kami mo adukanggene nia motuuk doi yana.” 9Ko Yahudi miano komo idoo koidan talalaing motuduwo Paulus tukon obisakene sasaibino komo doi Tertulus nabinantil.
Paulus belayo kobutongo doi Feliks salaano
10Maka gubernuroo beena tanda doi Paulus baikon yana moola mobasilingan. Maka Paulus bantile, “Yaku toiyo Tuan lapamo teali hakim nai lipu nia doi taun-taun kolumbito. Doiya kosababpo yaku lasayo sanaang mololukenggene daku pembelaan nia doi Tuan salaano. 11Tuan moola solodikiyo susuungo baikon aki nalobian doi mo songulodoo lua kooloyo mo lapa yaku ampakon sambeang doi Yerusalem. 12Tukon aki nabiasa ko Yahudi mian-miano laate yaku moponggeeleki tukon meeng kai komian kai mopototongikene komian sulano namongkubai nggalanggabutan mau doi Temeneno Na Bonua mau kai doi bonua-bonua kaleda lalomo kai doi yayaamo tolong doi kota lalomo. 13Yanila kai aki namoola bukutiikanggene konapoo tuduhan-tuduhan komo yanila mo pelenggene doi Tuan motuuk doi yaku. 14Takainomo yaku sio kuakuiyo doi Tuan baikon yaku sosubaiyo ko Mian Bisa tumbunggami menurut Yesus naotunggul komo yanila aanggene sala. Bai yaku daano moanggayo naikon sasaibino komo totulis doi Musa na Buku lalomo tukon Nabi-nabi na Buku. 15Buno pokakana yanila, yaku koidan daano daku moinian doi Mian Bisa baikon sasaibino komian naikon tubo koidan sambuno lapa mate – mian-mian momonondok, mau kai mian lokis! 16Doiyamo kosababpo yaku sidutu kakaate mono-monondok, sulano konoanggu lalomo nabilisii motuuk doi Mian Bisa tukon bilisii motuuk doi banggapi.
17 #
Kis. R. 21:17-28
Salataa moimoiya kotaun akimo kudungol doi Yerusalem, yaku abalimo indaa sulano kubabayo kobantuan doy doi kubangsa tukon sulano mososubakon sosuba doi Mian Bisa. 18Doiya kosinggatoo yaku daano molakukene doiya, yanila pososuunggene yaku doi Temeneno Na Bonua, sambuno lapa yaku alapayo daku acara bakiliyousan butong. Akiyo komian mobadaang mopolaing yaku, tukon akiyo koidan konggabutan idoo doiya kosinggatoodoo. 19Tolongo daano komoimoiya ko Yahudi miano indaa molubat doi provinsi Asia. Yanilamo kai komo siokai nadaano naimbaa sulano napelenggene yanila napangaduan doi Tuan, kalu yanila daano komeeng kolangge kona popangaduan motuuk doi yaku. 20Kai batadikenemo naiya mian nia susuungo komo lolukenggene kolokisan oilamo yanila napai linaat doi yaku salataa yaku sinasalaanikon doi Pangadilan Agama. 21#Kis. R. 23:6 Yanila nalinaat tolongo naiya bantilan nia tolong komo yaku bantile doi yanila salaano, doiyamo bantilan: Yaku pinaresa oloyo nia sabab yaku anggayo baikon komian momate naikon inotuboi koidan.”
22Maka Feliks mo lapamo motoi badaang tentang Yesus naotunggul, opupusemo do lapat palakaladoo. “Yaku naikon putusemo naiya urusan nia,” konabantilano, “kalu suludadudoo kapalano Lisias lapamo lubat.” 23Maka yana maparentakene koperwira komo balatanggung jawab doi Paulusoo sulano natataap taane Paulus, bai tukon beena soisik kabebasan doi yana tukon napinataikon kotula-tulano nabeena oilamo Paulus nainiyas.
Paulus doi Feliks tukon Dursila salaano
24Bula-bulaa kooloyo doibundu Feliks lubat, linubotii naboloki kosambuno Dursila; yana meeng ko Yahudi miano. Maka Feliks mosumbolii mian mondokiiyo Paulus, doibundu Feliks mondongolii Paulus basalita tentang manganggaan doi Kristus. 25Bai salataa Paulus banggadudulkene kona salita tentang kajujuran tukon taanano komoot tukon tentang ukuman doi Oloyo Nakiamatan, Feliks teali matakut maka bantile, “Ikoo moolamo ampakon budodoiya. Yaku naikon uange ikoo koidan kalu daano kotodanan.” 26Daano buno doiya Feliks moinikene naikon momalaat doy luwedoi Paulus. Doiyamo kosababpo yana badaang luunggon namobintokon mian mondokiiyo Paulus sulano basalita tukon yana.
27Salataa lua kotaun, Perkius Festus soboliyomo Feliks doi natealian gubernur. Tukon tobikon Feliks yase mangala noa doi Yahudi miano, yana batadikene Paulus doi talunggu lalomo.
Currently Selected:
RASUL-RASUL SALITANO 24: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
