RASUL-RASUL SALITANO 16
16
Timotius malaing Paulus tukon Silas
1Paulus banggadudulkene kona ampakonan doi Derbe, doibundu doi Listra. Idoo daano komeeng komian Yesus napololaing kosambuno Timotius. Kotinano meeng ko Yahudi miano, mo lapamo mangangga doi Yesus bai kotamano Yunani miano. 2Doi antara mian mangangga mo dungol doi Listra tukon doi Ikonium, Timotius totingonii buno meeng komian mo monondok. 3Paulus yase sulano Timotius namalaing tukon yana; tobikon doiya yana sunate Timotius. Yana kubaiyo doiya, sabab ko Yahudi miano doi lipudoo sasaibino toiyo baikon Timotius tamano meeng ko Yunani miano. 4Doi samba-samba kokota komo yanila lubotiiyo, yanila polongikene doi mianoo mo anggayo kokaputusan-kaputusan mo lapamo tinantukanggon doi rasul-rasul tukon katua-katua doi Yerusalem. Yanila otinauwo koutus-utus mo lapamo manganggadoo sulano natulutiyo do aturan-aturanoo. 5Maka anggota-anggota jemaatoo sosuungi bukuan konapoo iman, tukon samba-samba kooloyo pololokon sosuungi koaito.
Doi Troas: Paulus mongkita meeng kopokita
6Mian Bisa Na Roh aki napataikene Paulus tukon Silas mobabilitakene ko Mian Bisa nabantilan doi provinsi Asia. Jadi konapoo ampakonan yanila banggadudulkene doi kabupaten Frigia tukon Galatia. 7Salataa polong doi palabatasan Misia, yanila toitambenge usok doi provinsi Bitinia, bai Yesus Na Roh pantane yanila moampakon indaa. 8Jadi yanila lupaiyo ko Misia tukon banggadudul doi Troas. 9Dopopookoo, doi Troas, Paulus mongkita meeng kopokita. Doi pokitadoo lalomo yana kitayo komeeng ko Makedonia miano kokondong doi salaano maka kabiyo tukon tutuu sulano yana naampakon doi Makedonia sulano natulungiyo yanila. 10Sambuno Paulus malaat do pokitadoo, kami banggadudul batotobo sulano ampakon doi Makedonia. Sabab tukon yakin kami mangala kasimpulan baikon ko Mian Bisa sumboliiyo kami babilitakene ko Bilita Monondokoo doi mian indaa.
Doi Filipi: Lidia mangangga doi Mian Bisa
11Kami otinggale ko Troas tukon talabut banggadudul doi Samotrake, tukon modoakon doi Neapolis. 12Luwe idoo kami doi Filipi, meeng kokota doi kacamatan tumbeno doi Makedonia. Filipi daano jajahan batomundoan Roma. Indaa kami dungol moimoiya kooloyo. 13Doi oloyo Tadean kami ampakon doi paisu bibilo doi tonggulung kota tataapono babasal, sabab kami lasaiyo idoo daano kotampat sambeangan motuuk doi Yahudi miano. Maka kami osulang tukon basa-basalita tukon boi-boine mo popotongi doi tampatoo. 14Meeng komeeng doi antara yanila daano kai padagang toik mobotiki manampal, kosambuno Lidia tukon luwedoi Tiatira. Yana mamaasikene ko Mian Bisa, maka ko Temeneno galakanggene konoano sulano yana natalimayo oilamo Paulus nainotunggukon doi yana. 15Lidia tukon sasaibino kona bonua tumbuno sinaumo. Sambuno lapa sinau yana undange kami. Yana bantile, “Kalu Utus-utus lasayo yaku bisa-bisa molapamo mangangga doi Yesus, pomaimo pomoolo doi kubonua.” Maka yana kandatiyo sulano kami loingiyo kona kakabi.
Paulus tinalunggu doi Filipi
16Daano kooloyo meeng salataa kami sodo ampakon doi tampat sambeangan, kami pososuung tukon meeng koboine; yana ata. Boinedoo inusoki ibiliis mo moola tantukene kokadadian-kadadian komo naikon mo lubat. Tukon motantukene komian nanasib, boinedoo mebee kauntungan mo babasal doi mian natampat balimanganoo. 17Do boinedoo banggadudul mololainge Paulus tukon kami maka nanggele-nggeleamon, “Naiya pai mian nia Mian Bisa naata mobabasal! Yanila lubat sulano napailukene doi Utus-utus bulaando kocarano komuyu malaat salamat!” 18Moimoiya kooloyo kona kalumbit do boinedoo banggadudul momeenggon nggele-nggeleamon buno doiya. Paulus lapus kona sabalan, maka yana mbalenge tukon bantile do rohdoo, “Luwe Yesus Kristus sambuno yaku bintekene ikoo tobuat doi boine nia!” Doiya kotempono koidan ibiliisoo otinggalemo do boinedoo. 19Salataa domianoo nabalainggonan toiyo baikon kokasampatan yanila sulano namalaat doy lapamo lapus, yanila lakoyo Paulus tukon Silas, maka kinoot luaila doi labotan mangadap doi pamarenta. 20Yanila mangadapene Paulus tukon Silas doi pamarenta-pamarenta Roma, doibundu yanila bantile, “Naiya pai mian-mian nia Yahudi miano. Yanila banggabut doi nda kota. 21Yanila popitoikene komian nalakukanggene koadat kabiasaan komo pototonggulung tukon nda aturan-aturan, Roma miano. Kita aki namoola talimayo kai tulutiyo do adat kabiasaanoo!” 22Dopai mianoo badaang tulut lobosiyo Paulus tukon Silas; tukon pamarenta-pamarenta beake kona pakean doi butongo doi rasuloo molua maka sumboliiyo komian monanale yanila luaila. 23Salataa yanila lobiano tuuno konainanalan, yanila inusokon doi talunggu lalomo. Kokapala talunggu sinumbolii dagaiyo yanila tukon mono-monondok. 24Tobikon do parentadoo, kapala talunggudoo taane yanila doi talunggu kombiango mo atean tuuno, tukon yanila aino pinanga doi balak.
25Uga-ugaate pintanga kopopook Paulus tukon Silas daano mosambeang tukon mananikene konggaa-nggaalano ko Mian Bisa. Mian motinaan bailonggon daano mondongoliiyo yanila momanani. 26Sosinggoton teali koleali mo babasal tuuno, polong pandasi talunggudoo talalaing tounggot. Sasaibino kotalunggu tataapono tobuka tukon kolante-lante pokoot sasaibino komian motinalunggu toliat. 27Kapala talunggudoo ngginggim tabangun. Salataa yana kitayo kotalunggu tataapono tobukamo, yana bubute kona bakoko doi salungo sulano nabangakate sabab yana aanggene komian motinalunggu lapamo obulen sasaibino. 28Bai Paulus nggeleamon kobu-kobukuan, “Inai mobangakate! Kami sasaibino daano naimbaa!”
29Kapala talunggudoo makabi lampu maka obulen usok doi lalomo, tukon koidan lolondong yana tootuku doi Paulus tukon Silas salaano. 30Doibundu yana babayo yana tobuat tukon bantile, “Tuan-tuan oila komo sio yaku kubaiyo sulano kusinalamaton?”
31Paulus tukon Silas timbiliyo, “Manganggamo doi Temeneno Yesus! Ikoo naikon salamat – ikoo tukon sasaibino komian komo doi mubonua!” 32Maka Paulus tukon Silas talakanggene ko Temeneno nabantilan doi kapala talunggudoo tukon doi sasaibino komian mo daano doi nabonua. 33Doi popookoo tangano koidan, kapala talunggudoo babayo yanila maka kumesiyo yanila napakol-pakol. Maka yana tukon sasaibino komian komo doi nabonua banggadudul sinau. 34Doibundu yana babayo Paulus tukon Silas doi nabonua tukon beena kaan doi yanila. Yana tukon sasaibino kona pulino sanaang tuuno sabab yanila budodoiya anggayo ko Mian Bisa.
35Modoakon dodowa, pamarenta-pamarenta Roma mosumbolii polisi doi talunggu sulano napelenggene kopalenta sulano Paulus tukon Silas nasinodii.
36Kapala talunggudoo pailukene doiya langge-langgedoo doi Paulus. Yana bantile, “Tuan-tuan, pamarenta lapamo mebee parenta sulano osodiikene Tuan-tuan. Budodoiya Tuan-tuan moolamo pomule. Kinatauwan poambakono!”
37Bai Paulus bantile doi polisidoo, “Kami negara Roma miano. Aki napinaresa, kami lapamo binobokii doi mian badaang salaano tukon inusokon doi talunggu lalomo. Tukon budodoiya yanila sumboliiyomo kami ampakon tukon diam-diam? Kami aki mai yase! Pobintekene do pamarentadoo nalubat susuungo doi sumai mosodiiyo kami.”
38Polisidoo lapurkanggene doiya langgedoo doi pamarenta Roma. Salataa do pamarenta-pamarentadoo lengele baikon Paulus tukon Silas negara Roma miano, yanila tealimo matakut. 39Maka yanila ampakon doi Paulus tukon Silas momangkabi maaf, doibundu antekenemo yanila luaila tobuat doi talunggu, tukon mobabayo sulano yanila ampakon luwedoi kotadoo. 40Paulus tukon Silas otinggalemo do talunggudoo maka ampakon doi Lidia nabonua. Sambuno lapa yanila pososuung dopai mian-mianoo momangangga indaa, tukon mebee dolongan doi yanila, Paulus tukon Silas ampakono.
Currently Selected:
RASUL-RASUL SALITANO 16: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
