RASUL-RASUL SALITANO 15
15
Kombulan doi Yerusalem
1 #
Basam. 12:3
Moimoiya komian moluwedoi Yudea lubat doi Antiokhia tukon yanila otunggule komian momangangga doi Antiokhiadoo baikon kalu yanila aki nasinunat loloiyo Musa naaturan, yanila aki namoola sinalamaton. 2Paulus tukon Barnabas bantayo tuuno dopai mianoo napandapat. Doi napupusan tinantukanggon sulano Paulus tukon Barnabas tukon moimoiya komian bailon moluwedoi Antiokhia ampakon doi Yerusalem sulano pobisalaikene masaaladoo tukon rasul-rasul tukon katua-katua indaa.
3Anggota jemaat doi Antiokhia antekene yanila polong doi kota tonggulungo, doibundu yanila ampakono loloiyo kokota Fenesia tukon Samaria. Indaa yanila basalitakene bulaando komian mobolikon Yahudi lapamo salakanggene kobutongo doi Mian Bisa. Do bilitadoo tutuu laba-labakene komian mo mangangga idoo. 4Salataa yanila polong doi Yerusalem, yanila tinalima tukon monondok doi jemaat, tukon doi rasul-rasul tukon katua-katua. Maka yanila basalitakene doi mianoo tentang sasaibino oila ko Mian Bisa mo lapamo kubaiyo doi yanila. 5Bai moimoiya komian motongusokon Parisi miano mo manganggamo, kokondong tukon bantile, “Mian bangsa bailon komo lapamo manganggadoo sio nasinunat tukon sabole-bole sio naloloiyo Musa naatulan.”
6Maka rasul-rasul tukon katua-katua pototongi sulano napo bisalakene doiya masaaladoo. 7#Kis. R. 10:1-43 Malumbit tuuno yanila napobeean pikiran. Doi napupusan Petrus kokondong tukon bantile, “Utus-utus! Komuyu susuumuyu toiyo baikon moimoiya kotempo molapa Mian Bisa piliyomo yaku luwedoi antara komuyu sulano babilitakene ko Bilita Monondokoo doi mian mobolikon Yahudi, sulano yanila molongol tukon anggayo. 8#Kis. R. 2:4, 10:44 Tukon Mian Bisa komo toiyo kobanggapi noano lapamo otudoikene baikon Yana talimayo yanila; Yana otudoikene do langgedoo tukon beekene doi yanila ko Mian Bisa Na Roh bunomo komo lapamo beekenemo doi kitadoo koidan. 9Mian Bisa aki naposasalakene kita tukon yanila. Mian Bisa kokoliyousio yanila noano, sabab yanila manganggamo. 10Ah, oila kosababpo komuyu moyase tumbokiiyo ko Mian Bisa budodoiya tukon mebee meeng kokawajipan doi Napololaing-pololaing nia, sabea kai kotumbunggita tukon kita susuunggita koidan aki namoola molaksanakanggene? 11Kona bisaan, kita anggayo tukon kita sinalamaton tobikon Yesus namaasi doi kita; bunomo koidan yanila.”
12Maka tademo yanila sasaibino mo pototongi idoo. Doibundu yanila ndongoliiyo Barnabas tukon Paulus mobasalitakene koidan sasaibino kokuasa-kuasa mominasaindinggon tukon langge-langge mobolikon lobo ko Mian Bisa mo lapamo kubaiyo lolo doi yanila doi antara mian-mian bangsa bailon mo bolikon Yahudi. 13Sambuno yanila lapa mobasalita, Yakobus bantile, “Utus-utus! Soba pondongoliiyo yaku. 14Simon sodo lapa talangkanggene bulaando ko Mian Bisa doi tumbeno natudoikanano kona palahatian doi mian mobolikon Yahudi, tukon makisuut mopili luwedoi yanila mian bailon komo naikon teali namian. 15Doiya pokokonoi tukon komo lapamo doi nabi-nabi tantukene. Sabab daano mototulis buno naiya,
16 #
Am. 9:11-12
‘Lapamo doiya Yaku naikon lubat koidan,’ Temeneno bantile,
‘Yaku naikon bangune koidan Daud nabonua mo lapamo molopo,
tukon okindendeke kona molopoan,
tukon ekekendenge koidan;
17sulano sasaibino komian labinodoo umboliiyo ko Temeneno,
posinggat-singgat sasaibino kobangsa bailon mo bolikon Yahudi mo lapamo Yaku uange sulano nateali kumian.’
Bunomo doiya ko Temeneno nabantilano, 18komo lapamo pailukene doiya langgedoo salataa doi looluk.”
19“Jadi menurut kupalaat,” Yakobus nabantilano, “kita aki namoola kubaiyo susa komian mobolikon Yahudidoo mo salakanggenemo kobutongo doi Mian Bisa. 20#Tob. 34:15-17; Basam. 17:10-16, 18:6-23 Bai kita sio nda motulis surat doi yanila tukon otinauwo yanila sulano yanila naaki nakaane kokinaan monajis mo lapamo sinosubakon doi bapilogotan, kai makaan iyayon sailo motokoot mate, kai makaan sau. Tukon koidan sulano yanila nadedeenggene kobutongo luwe kokubai-kokubai mo lokis. 21Sabab Musa naaturan lapamo salataa looluk binasakon doi samba-samba kooloyo Tadean doi bonua-bonua kaleda, tukon binabilitakon doi sasaibino kokota.”
Surat doi bangsa-bangsa bailon mo lapamo mangangga
22Rasul-rasul tukon katua-katua, posinggat-singgat tukon sasaibino koanggota jemaatoo putusemo sulano napo mopomolilik moimoiya komian doi yanila komo naikon sinumbolii doi Antiokhia polaing-laing Paulus tukon Barnabas. Maka yanila lilike Silas tukon Yudas mo sinombuikon koidan Barsabas. Namian nia luaila daano kai mian mo talakamuka doi antara mian mangangga doi Yerusalem. 23Polaing-laing tukon do bito-bitodoo yanila makapatu koidan meeng kosurat konabantilano buno naiya,
“Doi sasaibino utus-utus mo luwedoi bangsa bailon mo bolikon Yahudi, mo dungol doi Antiokhia, Siria tukon Kilikia. Komai salam, rasul-rasul tukon katua-katua, doiyamo poutus-utus. 24Kami lengele daano komoimoiya komian luwedoi antara kami mo lapamo ampakon doi komuyu tukon mobanggabut tukon kubaiyo pusing komuyu tukon yanila naotunggul-otunggul. Bai kami aki mai sumboliiyo yanila molakukanggene doiya. 25Doiyamo kosababpo kami lapamo po pikilikene tukon sasaibino satuju sulano molilik moimoiya komian tukon sinumbolii yanila lubat doikoo. Yanila naikon ampakon polaing-laing tukon Utus Barnabas tukon Paulus kami mo seange. 26Doi mian nia molua lapamo yanila bataanggene yanila butongo tobikon nda Temeneno Yesus Kristus. 27Jadi, kami sumboliiyo Yudas tukon Silas doi Utus-utus. Yanilamo komo naikon mopelenggene susuungo secara bantilan doi komuyu kobilita mo totulis doi suratia lalomo koidan. 28Mian Bisa Na Roh lapamo satujuiyo – tukon kami koidan satuju – sulano komuyu inai pobinee limang-limang mo lobian motoong luwedoi limang-limang komo palaluu nia tolong: 29inai pokaane kokinaan mo lapamo sinosubakon doi bapilogotan; inai pokaane sauno, inai pokaane koiyayon sailo mo tokoot mate, tukon podedeenggene kokokubai-kokubai mo lokis. Kalu komuyu dedeenggene kobutomuyu doi langge-langgedoo, komuyu lapamo kubaiyo kolangge mo monondok. Tolongo buno doiya, kinatauwan!”
30Sambuno palamisi, yanila mo sinumboliidoo tauso doi Antiokhia. Indaa yanila uange sasaibino koanggota jemaat napototongi maka pelenggene do suratoo. 31Salataa do anggota jemaatoo basayo do suratoo, yanila sanaang tuuno do suratoo antoko mo hibule yanila noano. 32Yudas tukon Silas, mo daano kai nabi koidan, malumbit kona pobasalitaiyan tukon utus-utus mo manganggamo doi Antiokhiadoo sulano mebee dolongan tukon kabaranian doi yanila. 33Sambuno Yudas tukon Silas dungol indaa moimoiya kooloyo, komian mangangga doi Antiokhiadoo kapatuwo yanila abali tukon sumboliiyo yanila mopelenggene kosalam doi mo sumboliiyo yanila. [ 34Bai Silas putusemo sulano tataap dungol doi Antiokhia.]
35Paulus tukon Barnabas koidan dungol moimoiya kooloyo doi Antiokhia. Indaa yanila bangotunggul tukon babilitakene ko Temeneno nabantilan polaing-laing tukon mian badaang bailon.
Paulus tukon Barnabas pobabandakon
36Aki namalumbit doibundu Paulus bantile doi Barnabas, “Mai kita abali molubotiiyo koutus-utus mo manganggamo doi Yesus doi sasaibino kokota-kota molapamo kita babilitakene ko Temeneno nabantilan; sulano kita nda kitayo bulaando kondondoongo yanila.” 37Barnabas yase babayo Yohanes Markus, 38#Kis. R. 13:13 bai Paulus lasaiyo aki namonondok mobabayo Markus, mo aki nayase balimang polaing-laing tukon yanila tukon mootinggale yanila doi Pamfilia. 39Maka Paulus tukon Barnabas ponggeeleki tuuno tobikon doi napupusan yanila pobabandakon; Barnabas alayomo Markus tukon talabuto tukon yana doi Siprus. 40Paulus piliyo Silas maka lengget tukon yana sambuno utus-utus doi Antiokhiadoo salakanggene yanila doi Temeneno namaasi. 41Yanila boilingiyo ko Siria tukon Kilikia; indaa yanila ekeenggele koanggota-anggota jemaat.
Currently Selected:
RASUL-RASUL SALITANO 15: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
