RASUL-RASUL SALITANO 17
17
Doi Tesalonika
1Paulus tukon Silas banggadudulkenemo kona ampakonan loloiyo ko Amfipolis tukon Apolonia maka polong doi Tesalonika. Indaa daano ko Yahudi miano nabonua kaleda. 2Maka Paulus ampakono doi bonua kaledaanoo – pokakana komo biasa lakukanggene kalu daano komeeng kobonua kaleda Yahudi miano – maka posoboli pikiran tukon komian idoo manganai ayat-ayat Kitab Moliyous. Yana lakukanggene doiya tolu kooloyo Tadean potutuundu. 3Berdasarkan ayat-ayat doi Kitab Moliyous yana jelaskanggene tukon bukutiikanggene baikon ko Tomundo Pasalamat Mian Bisa mo perjanjikene palaluu malaat sakisaawan tukon tubo koidan doi matean. “Yesus yaku mo babilitakene doi komuyudoo, Yanamo ko Tomundo Pasalamat mo dinandikon,” Paulus nabantilano. 4Moimoiya komian motealimo mangangga maka malaingo Paulus tukon Silas; bunomo koidan daano badaang ko Yunani miano komo matakut doi Mian Bisa, tukon badaang koidan koboiboine motalakamuka.
5Bai ko Yahudi mian-miano masakit konoano. Yanila uange komian mo tolongo dombaa dombulo doi loloon-loloon tukon mobentuke kogolombolan panggabut. Maka yanila nggabute doi posaapon do kotadoo tukon libaiyomo komeeng komian manganggamo nabonua kosambuno Yason sulano umboliiyo Paulus tukon Silas, sabab yanila yase babayo Paulus tukon Silas doi tonggulung mangadap doi mian badaang. 6Bai salataa yanila aki napososuunggene Paulus tukon Silas, yanila keete Yason tukon moimoiya komian mangangga bailon doi pamarenta-pamarenta mo balakuasa salaano doi kotadoo. Yanila nggeleamon, “Naiya pai mian-mian nia banggabut doi yayaa! Budodoiya mau konda kota linubotiimo yanila, 7tukon Yason lapamo talimayo yanila doi nabonua. Yanila sasaibino akiyenggene kokatatapan-katatapan Tomundo Roma sabab yanila bantile baikon daano koidan kotomundo bailon kosambuno Yesus.” 8Tukon do bantilan-bantilanoo yanila kubaiyo komian badaang tukon pamarenta doi kotadoo teali matakut. 9Maka dopai pamarentadoo sumboliiyo Yason tukon mian mangangga mo bailonggonoo mebeal doy tambo. Sambuno lapa doiya maka sodo yanila inosodiikon.
Doi Berea
10Doi popookoo dopai mian-mianoo momangangga modaano doi kotadoo sumboliiyo Paulus tukon Silas ampakon doi Berea. Sambuno polong idoo, Paulus tukon Silas ampakono doi Yahudi miano nabonua kaleda. 11Kopai mian doi Berea pololokon tobuka kopai noano kalu baino mian doi Tesalonika. Tukon sanaang kopai noano yanila molengele kobilita tentang Yesus, tukon samba-samba kooloyo yanila solidikiyo ko Kitab Moliyous sulano napo toiyo oilakai Paulus naotungguloo bisa. 12Badaang doi antara yanila mangangga doi Yesus, tukon aki natolongo soisik koidan kopai Yunani miano motalakamuka, mo manganggamo; mau kai boine tukon kai malane. 13Salataa ko Yahudi miano doi Tesalonika lengele baikon Paulus babilitakene koidan ko Mian Bisa nabantilan doi Berea, yanilakai lubat doi Berea tukon baloobu maka kubaiyo komian idoo tealimo susa. 14Mosobit-sobit koutus-utus doi Bereadoo antekene Paulus doi tobin bibilo, bai Silas tukon Timotius tataap dungol doi kotadoo. 15Sambuno antekene Paulus polong doi Atena, utus-utusoo abalimo doi Berea tukon babayo koteteba moluwedoi Paulus sulano Silas tukon Timotius napotunduwo yana mosobit-sobit.
Doi Atena
16Daano Paulus mototiiliyo Silas tukon Timotius doi Atena, konoano susa mokitayo do kotadoo moono tukon pilogot-pilogot. 17Tobikon doiya doi bonua kaledaan, Paulus posoboli pikilan ko Yahudi miano tukon mian bailonggon komo sosubaiyo ko Mian Bisa idoo. Bunomo koidan doi labotan-labotan sasamba kooloyo yana posoboli pikilan tukon samba-samba komian komo daano idoo. 18Guru-guru aliran Epikuros tukon aliran Stoa ponggeeleki koidan tukon yana. Moimoiya doi yanila bantile, “Naiya mian nia oila kona tinoi? Kona pandoiyan tolongo soisik, bai yana tolongo badaang kona silingan!” Moimoiya komian bailon koidan bantile, “Buno langge yana babilitakene tentang dewa-dewa bangsa bailon.” Yanila bantile buno doiya, sabab Paulus basalitakene tentang Yesus tukon tentang natuboan koidan doi namatean. 19Maka yanila babayo Paulus doi pososuungan doi Bungkuko Areopagus. Indaa yanila bantile doi yana, “Kami yase toiyo kootunggul boolu komo ikoo babilitakene. 20Sabab ikoo kamukakene kolangge-langge molongol sosibong doi tolingainggami. Tobikon doiya kami yase toiyo komaanano.” ( 21Sabab sasaibino komian doi Atena tukon mian moluba-lubaton mo dungol idoo yase tuuno akabuse konapoo tempo balasanaangan sulano napo molongol tukon basalita doi langge-langge mo boolu.)
22Doiya singgat Paulus kokondong doi mian badaangoo salaano mo bakombul doi Areopagusoo, Paulus bantile, “Eh, Atena miano! Yaku kitayo baikon doi sasaibino kolangge komuyu tutuu baagama. 23Sabab salataa yaku mbambakon potikunggon doi pokota nia tukon palatikanggene kotampat-tampat musambeangan, yaku kitayo koidan komeeng kotampat basosubakonan sosuba; doi tampatoo totulis, ‘Doi Mian Bisa Moaki Natiningoni.’ Jadi ko Mian Bisa komuyu mososubaiyo bai aki potingoniiyo, yanamo komo yaku babilitakene doikoo. 24#1Tom. 8:27; Yes. 42:5; Kis. R. 7:48 Ko Mian Bisa mo tealikene naiya dunia nia tukon sasaibino koantoko, doiyamo Temeneno mokuasaiyo kotimbu tukon buta. Yana aki nadungol doi bonua bapilogotan banggapi mokubaiyo. 25Yana koidan aki napalaluu potombonii doi banggapi, sabab yanamo komo beena tuboan tukon ansaangan tukon sasaibino kolangge doi banggapi. 26Doi meeng kobanggapi Yana kubaiyo sasaibino kobanggapi tukon sumboliiyo yanila modungoliyo doi posaapon kodunia. Yanamo koidan komo tantukene salataa doi tumbe, oila kotempono tukon inaando yanila moola tubo. 27Mian Bisa lakukanggene doiya, sulano yanila naumboliiyo Yana. Boli-boliisi yanila napososuung tukon Yana doi tempo napo umbo-umboliiyano. Bai kona tutuuwan ko Mian Bisa aki naodoon doi kita suwe-suwele. 28Pokakana komo mian nabinantil, ‘Kita tubo tukon palabiyok tukon daano doi dunia nia tobikon Yana Nakakuasaan.’ Buno koidan komo binantil doi moimoiya komu tolosurat. Yanila bantile,
‘Kita sasaibino daanoon napau-pau.’ 29Nah, sabab kita daanoon Mian Bisa napau-pau, kita aki namoola pokakanakene ko Mian Bisa buno pokakana kopatung mokinubai doi emas kai perak kai batu mo kinubai menurut banggapi napandoiyan. 30Lounu nda bodoanoo, Mian Bisa lapamo toliminggene, bai budodoiya Yana sumboliiyo sasaibino komian doi posaapon kodunia nabadodoloon doi nalalim-lalim. 31Sabab Yana lapamo tantukene komeeng kotempo sulano naadiliyo komian sasaibino nai dunia nia tukon adil. Doiya tugasoo naikon linakukanggon doi meeng komian mo lapamo Mian Bisa piliyo tuuk doiya. Tukon sulano sasaibino komian anggayo, Mian Bisa lapamo otuboiyo koidan do mianoo doi namatean!”
32Salataa dopai mianoo lengele tentang tuboan koidan sambuno lapa mate, daano doi yanila komo kokumbite Paulus. Daano koidan komo bantile, “Kami yase mondongolii Utus mobasilingan koidan manganai naiya langge nia.” 33Maka Paulus otinggalemo do pototongianoo. 34Bai daano doi yanila komo ala doi Paulus tukon mangangga doi Yesus, doi antarano: Dionisius, anggota majelis Areopagus, tukon meeng koboine kosambuno Damaris, tukon moimoiya komian koidan.
Currently Selected:
RASUL-RASUL SALITANO 17: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
