RASUL-RASUL SALITANO 11
11
Petrus nalapulan doi jemaat Yerusalem
1Rasul-rasul tukon mian mo mangangga doi posaapon ko Yudea ndongoliiyo baikon komian mo aki nabaagama Yahudi lapamo talimayo ko Mian Bisa nabantilan. 2Doibundu salataa Petrus ampakono doi Yerusalem, do Yahudidoo miano mo lapamo mangangga, mbisalakene Petrus. Yanila bantile, 3“Bulaando ikoo moampakon doi mian mo akiyoon nasinunat nabonua? Tukon ikoo koidan pokaanggon posinggat-singgat tukon yanila!” 4Tobikon doiyamo Petrus talangkanggene doi yanila sasaibino komo lapamo teali, tambuun luwedoi tumbeno. Petrus bantile,
5“Yaku daano mosambeang doi kota Yope, maka yaku kitayo komeeng kopokita. Yaku kitayo daano kolangge meeng mo buno meeng kotoik mo bebelan inobuluson luwedoi timbu, tokooton doi sangkap kopasuno, doibundu tade doi yaku taalikon. 6Salataa yaku palatikanggene doi lalomo, yaku kitayo koiyayon-iyayon mosangkap koaino, iyayon-iyayon mombosolo, iyayon-iyayon mo tolo-tolondok tukon tomisi mombosolo. 7Maka yaku lengele komeeng koalalo mobantile doi yaku, ‘Yo bangun, Petrus! Tembele doiya tukon kaane!’ 8Bai yaku timbiliyo, ‘Aki, Temeneno! Akiyoon nasidutu yaku makaan kinaan mo pinatanggon kai najis.’ 9Bai do alaloo bantil koidan luwedoi timbu, ‘Lobo mo lapamo Mian Bisa bantile halaal inaimo kai nabinantil pinatanggon.’ 10Yaku kitayo do langgedoo polong tolu luunggon tukon doi napupusan sasaibino tobingkat koidan doi surgaa. 11Kana doiya kotempono koidan domianoo motoluila moluwedoi Kaisarea, mo sinumbolii doi yaku, lubat doi kubonua dungolan. 12Maka ko Mian Bisa Na Roh sumboliiyo yaku ampakon polaing yanila tukon aki sasaaki. Konoom komian utus nia malaing tukon yaku doi Kaisarea, tukon kami sasaibino usok doi Kornelius nabonua lalomo. 13Doibundu Kornelius basalitakene doi kami bulaando yana nakitaano komeeng komalaekat mokokondong doi nabonua tukon bantile, ‘Mobintokon mian moampakon doi Yope mouange komeeng komalane kosambuno Petrus. 14Yana naikon pailukene doi komuyu kobilita mo salamatene ikoo tukon pulimu.’ 15Tukon salataa yaku atambuune basalita buno doiya,” bunomo doiya Petrus banggadudulkene kona salita, “Mian Bisa Na Roh lubat doi yanila, pokakana buno komo teali doi kita loolukonoo doi tumbe-tumbeno. 16#Kis. R. 1:5 Maka yaku neneeke, Temeneno sidutu bantile, ‘Yohanes mansau tukon paisu, bai komuyu naikon sinau tukon Mian Bisa Na Roh.’ 17Jadi tontong ko Mian Bisa mebeekon koidan doi mian mo aki nabaagama Yahudidoo balakaat mo pokakana yana mo beekene doi kita doi temponodoo nda manganggaan doi Temeneno Yesus Kristus. Tobikon doiya, aki nateali yaku mopantane ko Mian Bisa!”
18Sambuno ndongoliiyo doiya, yanila akimo nanggeelekiyo yana koidan. Maka yanila nggaa-nggaale ko Mian Bisa, yanila bantile, “Kalu buno doiya, komian mobolikon Yahudi binee todanan moluwedoi Mian Bisa sulano badodoloon doi napolalim-lalim tukon tingoniiyo kotuboan mo bisa!”
Jemaat doi Antiokhia
19 #
Kis. R. 8:1-4
Sambuno Stepanus inakate, komian mo anggayo Yesus tambuuno binuluk-buluk, tobikon yanila topobabandakon doi yayaa. Daano kobuleng polong doi Fenesia, tukon daano koidan komo polong doi Siprus tukon doi Antiokhia. Yanila babilitakene kobilita moluwe doi Mian Bisa tolongo doi Yahudi miano tolong. 20Bai luwedoi do mianoo momangangga, mo luwedoi Siprus, tukon doi Kirene, daano koidan kopai mian mo ampakon doi Antiokhia tukon babilitakene ko Bilita Monondok tentang Yesusoo doi mian mo aki nabaagama Yahudi koidan. 21Ko Temeneno nakuasa daano doi yanila tobikon badaang komian moteali mangangga tukon salakanggene kobutongo doi Temeneno.
22Salita-salita tentang kajadian-kajadian nia polong koidan doi jemaat Yerusalem. Maka yanila sumboliiyo Barnabas ampakon doi Antiokhia. 23Tukon Barnabas polong indaa, tukon kitayo bulaando ko Mian Bisa nabalakaatiyano do mianoo, yana laba tuuno. Maka yana kabiyo sulano yanila bisa-bisa motaat doi Temeneno tukon totubo konoano. 24Barnabas nia mian monondok konoano tukon kinuasaimo Mian Bisa Na Roh tukon tutuu anggayo ko Temeneno tobikon badaang komian momalaing Temeneno.
25Doibundu Barnabas ampakon doi Tarsus umboliiyo Saulus. 26Sambuno pososuung tukon Saulus, yana babayo Saulus doi Antiokhia tukon meeng kotaun moono yanila pototongi tukon anggota jemaat indaa tukon mongotunggul badaang komian. Doi Antiokhia indaamo komian mangangga doi Yesus tuuk tumbeno luunggon kona binantilan Salani miano.
27Doi lounudoo daano komoimoiya konabi molubat luwedoi Yerusalem ampakon doi Antiokhia. 28#Kis. R. 21:10 Doi antarano yanila daano komeeng komian kosambuno Agabus. Luwe dolongan Mian Bisa Na Roh Yana tantukanggenemo baikon doi posaapon kodunia teali kolounu malaalan mo bolikon langge. (Tukon do langgedoo takainomo tealimo koidan doi tempodoo Kaisar Klaudius natealian tomundo.) 29Maka sasaibino Yesus napololaingoo pomeenggon sulano namakapatu bantuan doi utus-utus mo dungol doi Yudea; suwe-suwele makapatu manurut kona tinondong. 30Pomeenggonanoo linaksanakanggon koidan, maka Barnabas tukon Saulus sinumbolii sulano nababayo do bantuanoo doi katua-katua jemaat.
Currently Selected:
RASUL-RASUL SALITANO 11: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
