2 KORINTUS 9
9
Potombonii motuuk doi tulanggita Salani miano
1Kona bisaan akimo napalaluu koidan yaku mobatulis doi komuyu tentang potulungidoo mo kinapatu doi Mian Bisa namian doi Yudea. 2Yaku toiyo komuyu yase motulungi, tukon yaku tausono banggaalkene komuyu doi mian badaang doi Makedonia. Yaku bantile doi yanila, baikon salataamo doi taundoo mo lapa utus-utus doi Akhaya lapamo basadia mebee tulungan. Tukon mumokolokotan lapamo okitakene kosoobos mobabasal mokolokotan doi yaniladoo. 3Budodoiya yaku binteke Titus tukon do utusoo molua doikoo sulano oila komo kami banggal-banggaalkene tentang komuyu naaki nabaino buno moakiyo kona kanaan. Jadi, komuyu siokai pobatotobomo, sabab yaku bantile doi yanila baikon komuyu lapamo sadiayo doiya. 4Yaku balo sasaakiyo kalu-kalu daano komian badaang doi Makedonia mo malaing polaing-laing yaku doiya kosinggatoo daku lubatan doi komuyu. Tukon kalu yanila laate baikon komuyu akiyoon pobasadia, wah, babasal komai mammaawan naikon, sabab lapamo bantile baikon kami anggayo tuuno ikoo! Tukon komuyu kai naikon mammaa koidan. 5Doiyamo kosababpo yaku lasayo palaluu bintekene yaniladoo doikoo loolukon sulano naatule do potulungidoo komuyu molapamo teenggene. Yaku kubaiyo doiya sulano kalu yaku lubat, dopoo potulungidoo lapamo tasadia. Tukon nabuno doiya, totingonii baikon domu potulungidoo doiya bineekon tukon noa sanaang, tukon bolikon pinakisaa.
6Poneneeke! Mian mo motipason kalibuang kidik-kidik naikon malaat hasilo mo soisik koidan. Bai komian mo masabukon kalibuang mobada-badaang naikon malaat hasilo mo badaang koidan. 7Memeeng komian siokai namebee tukon sanaang konoano. Inai namebee tukon bata-bata kai tapakisaa, sabab ko Mian Bisa mamaasikene komian mo mebee tukon sanaang konoano. 8Mian Bisa berkuasa momebee balakaat doi komuyu mo badaang tuuno, sulano komuyu sidutu malaat oila komo komuyu palaluuwo; tutuu komuyu naikon lobian kopo kubaiyano komonondokan tukon baamalan. 9#Sad. 112:9 Doi Kitab Moliyous lalomo totulis buno naiya tentang ko Mian Bisa,
“Yana sabu-sabukene doi mian motalalais;
kona monondokan konoano sidutu-posidutukon.”
10 #
Yes. 55:10
Mian Bisa komo sadiayo kokalibuang doi mian momasabukon tukon kinaan motuuk doi kita. Yana koidan naikon mosadiayo tukon mokadaange oila komo komuyu mo tipase, sulano konoamu namonondokan tosuungi koidan. 11Tukon buno doiya komuyu naikon inosukupi doi sasaibino kolangge tobikon komuyu sidutu moola mebee tukon noa sanaang. Tukon domu bine-bineekonoo kami mo ebe-ebese, kubaiyo badaang komian mobakinatauwan doi Mian Bisa. 12Sabab kokubai nia momonondok komuyu mo kubaiyo bolikon tolongo naikon osukupiyo ko Mian Bisa namian nakakulangan, bai koidan naikon tealikene badaang komian mobakinatauwan doi Mian Bisa. 13Tukon dopoo batulungianoo komuyu mookitakene, badaang ko Salani miano doi Yudea naikon monggaale ko Mian Bisa sabab yanila kitayo komu mololean doi Bilita Monondok tentang Kristus doi komuyudoo molainge. Koidan, yanila nggaale ko Mian Bisa, sabab komuyu monondok konoamuyu tuuk moebe-ebese doi yanila tukon doi sasaibino komian bailon oila komo daano doikoo. 14Maka yanila sambeanggene komuyu tukon palasaan poseangan sabab ko Mian Bisa monondok konoano tuuno doikoo. 15Siokai kita nda basukuur doi Mian Bisa sabab kona bineekonoo mo bolikon langge.
Currently Selected:
2 KORINTUS 9: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
