2 KORINTUS 10
10
Paulus palataanggene kona meleleanian
1Budodoiya yaku, Paulus, yase sumbetene komeeng kolangge doikoo. Yaku nia, menurut mian nabantilano, mantalamuyuk kalu posasalaan tukon komuyu, bai barani kalu pokododoonggon. Nah, sabab namantalamuyukan tukon namonondokan Kristus noano, 2yaku kabiyo tutuuno inai pokubaiyo yaku teali barani doi komuyu kalu naikon yaku lubat. Sabab daku niat tuuk mongkubai tindakan mokalaas doi mian-mian mo bantile baikon kami balimang tukon makisuut-makisuut dunia koona. 3Kami takainomo daano motubo doi dunia lalomo, bai kami aki naberjuang kona tujuan motolongo dunia koona. 4Komai sinapan-sinapan pinake doi mai perjuanganoo lalomo bolikon kai sinapan doi dunia lalomo, bai sinapan-sinapan moluwedoi Mian Bisa mo balakuasa. Tukon sinapan-sinapanoo kami manase kopalataanan-palataanan; kami aline koponggeelekiyan, 5tukon kami duduwo kobenteng-benteng mobinanggaakon tukon inokokondong sulano nalawane komotoiyan tentang doi Mian Bisa. Kami lungguiyo ko mian-mian napikiran tukon tealikene yanila mangangga doi Kristus. 6Tukon kalu komuyu loingiyomo tutuuno, kami basadia moukume sasaibino komian mo aki nataat.
7Siokai komuyu posadaliyo kondodoong nakanaan. Kalu memeeng komian mangangga baikon yana Kristus nalangge, siokai yana ingotiikene kobutongo susuungo tukon sadaliyo baikon kami koidan Kristus nalangge pokakana Yana. 8Yaku aki kumammaa kalu lobian badaang daku banggal-banggaalkanano kakuasaanoo mo lapamo Temeneno beekene doi kami, sabab kakuasaanoo bineekon doi kami sulano mai bangune komuyu, bolikon kai sulano nai lubang. 9Yaku aki kuyase komuyu poaanggene yaku tolongo ododiiyo komuyu tukon daku sulat-sulatoo. 10Mian bantile, “Paulus nasulat-sulatoo togaas tukon taangga, bai kalu yana susuungo daanomo doi kita nia, kona pombawaan mantalamuyuk tukon bantilan-bantilan akiyo koalatino!” 11Siokai komian mo buno doiya sadaliyo baikon kalu kami daano doi komuyudoo, komai kokubai tontong buno oila komai tinulis doi sulat-sulatoo lalomo.
12Takainomo aki mai barani mopokakanakene kabai moabese kobutonggami pokakana komian mo aanggene kobutongo tatandak. Bukan maen yanila nabodoan! Yanila mongkubai ukulan susuungo tukon palesayo kobutongo susuungo tukon ukulanoo. 13Kami aki mai buno doiya. Kalu kami banggal-banggaal, aki mai lupaiyo kobatas. Kami dungol doi batas-batas lipu balimangan lalomo Mian Bisa mo lapamo tantukene doi kami. Tukon komuyu tongusokon doi lipudoo lalomo. 14Jadi salataa kami lubotiiyo komuyu tukon babayo ko Bilita Monondok tentang Kristus doikoo, kami bisa-bisa aki mai kalual doi batas-batasoo lipu mai balimangan. 15Aki mai nggaale kobutonggami doi mian bailon nalimang mo daano doi batasoo tonggulungo Mian Bisa mo tantukenemo tuuk doi kami. Kobalino kami tataap doi batas-batasoo lalomo Mian Bisa mo tantukanggenemo tuuk doi kami tukon moinikene baikon komuyu pololokon mangangga doi Kristus, sulano kami moola kubaiyo kolimang mo lobian kona babasalan doi komuyudoo. 16Tukon bunomo doiya kami moolamo babilitakene koidan do Bilita Monondok doi lipu-lipu bailon mau naaki mai binggat-binggate kobutonggami doi limang mo lapamo linakukon doi lipu mian bailon nameleleanian.
17 #
Yer. 9:24
Doi Kitab Moliyous lalomo totulis, “Mian mo yase banggaalkene komeeng kolangge, sio nabanggaalkene oila komo lapamo Temeneno kubaiyo.” 18Sabab komian mo tanggaal siokai mian Temeneno mo nggaale, bolikon mian mo nggaale kobutongo susuungo.
Currently Selected:
2 KORINTUS 10: LAIBGZ
Highlight
Copy
Compare
Share
Want to have your highlights saved across all your devices? Sign up or sign in
